3
UYeesu akumuponia we ahataliiye inyoovhe
(Mataayi 12:9-14; Luuka 6:6-11)
1 UYeesu ahinjila havhili mwi sinagoogi limo, umwo mwámile umuntu we áhataliiye inyoovhe. 2 AVhafalisaayi vhámufinjiiye, vheenye inga akumuponia pi siku ilya Sabaato. 3 UYeesu ahamuvhuuzya umuntu ula ahati, “Yimiliila pahati ipa.” 4 Ahavhavhuziilizya aVhafalisaayi ahati, “Kulandatana ni ndajizyo zya Moose isiku ilya Sabaato hinza kuvhomba inyinza, pamo kuvhomba imbiivhi? Kupoha uvhupuuma pamo kugoga?” Vhahapuuma, vhahapootwa kumwamula.a 5 Ahavhazyamila ku vhuhali, ahasimiililwa mwe pe avhwenyi uvhugomu uvhwa mooyo gaavho. Ahamuvhuuzya umuntu ula ahati, “Golosya inyoovhe yaaho.” Woope ahagolosya, inyoovhe yaakwe, yihapona. 6 AVhafalisaayi lwe vhaalola vwe uYeesu amuvhombela umuntu ula, vhahasogola kupanzanya na vhatuuli avha Heelodib vwe kwe vhamugoje uYeesu.
Impuga iya avhantu kufuma intala zyonti yikumulandata uYeesu
7-8 UYeesu aheepa peneepo pooka na vhasundikwa vhaakwe, ahasogola kwa sumbi uwa Galilaaya, ni mpuga iya vhantu kufuma mu mukowa uwa Galilaaya, yihamulandata. Avhantu avhinji kufuma intala inyinji, lwe vhiivwa zyonti zye ahazivhombaga, vhahamwinzila kufuma mu Yelusaleemu na mu mukowa uwa Yudeeya wonti na mu mukowa uwa Idumayi na mwisyila ilya ijenje uYolodani na mu nkaaya iya Tiilo ni Siidoni. 9 Ahavhavhuuzya avhasundikwa vhaakwe vhasengaanye ivhooti inga ayiime mweneemwo, lwe akuvhasambiilizya, mwe pe impuga iya vhantu yihamuviganyaaga. 10 Ávhavhuziizye avhasundikwa isho mwe pe ávhaponiizye avhavhinu avhinji na vhonti avha mpungo vhahabunchilanaga vhahanzaga kumupalamansya. 11 Ulwinji vhonti vhe vháamile ni mpepo imbiivhi, ponti pe vhahamulolaga vhahagwanga pansi pilongolela lyakwe. Vhahahoolaga kuuti, “Iwe we Mwana wa Mulungu.” 12 Ileelo uYeesu ahavhalesyaga nkaani kuuti vhatamumanyisyaje.
UYeesu akusevha avhatumwa kumi na mbiili
(Mataayi 10:1-4; Luuka 6:12-16)
13 UYeesu ahazuvha pi gamba, ahavhiita vhe ahavhanzaga, vhoope vhahamulandata. 14 Ahavhasevha avhantu kumi na mbili, vhe vhahiima vhatumwa vhaakwe avha kwima pooka nawo nu kuuti avhasonteelezye kulumbiilila. 15 Havhili vhiime na maha aga kwefwa impepo inkandamanu. 16 Ivha kumi na mbiili amazina gaavho ge gano: uSiimoni (ahamwita izina ilya Peeteli), 17 uYaakobu nu Yoohani, avhaana vha Zebedayi (UYeesu ahaavhapa izina ilya Shihebuuli kuuti, Boanalige, kwe kuuti avhaana avha kujilima) nu 18 Andeleeya nu Fiilipo nu Batolomaayo nu Mataayi nu Toomasi nu Yaakobu uwa Alufaayo nu Tadayo nu Siimoni uKananayoc 19 nu Yuuda uwa ku Kalyoti, we pisinda ámulonjeleeye uYeesu.
UYeesu mupiti kuluusya uSetano
(Mataayi 12:22-32; Luuka 11:14-23; 12:10)
20 Lwe uYeesu agaluha kuhaaya pooka na vhasundikwa, impuga yihamuvhungatila havhili. Uweene na vhasundikwa vhaakwe vhahapootwa nu kulya ishaakulya mwe pe imbombo iya kuvhavhombela avhantu yáali mpiti. 21 Avhajenzi avha Yeesu vhívuuye ku vhantu kuuti uYeesu alalusile, pe vhahati vhasogole vhamunyatule.
22 Avhasambiilizi avha ndajizyo izya Moose vháfumile ku Yelusaleemu vhahafiha kwa Yeesu, vhahati, “Alemiilwe nu Belizabulid umupiti uwa mpepo inkandamanu. Akwefwa impepo inkandamanu ku maha aga Belizabuli.” 23 UYeesu ahavhiita, ahayanga navho ku viholanyo ahati, “Nalyoli uSetano angayeefwa wuuyo weeka? 24 Uvhumwene inga vhwaluuhana vhuuvhwo vhweka vhutangimiilila havhili, vhukugwa. 25 Ni nyumba inga yaluuhana yiiyo yeeka yitangimiilila, yikugwa. 26 Vhwope uvhumwene uvhwa Setano inga vhwaluuhana vhweka, vhutangimiilila, nkandi, vhukupeleela. 27 Umuntu atanginjila kupuma ivintu mu nyumba iya muntu uwa maha inga atamupinyile. Inga amupinya pe akuyeleleha kupuma ivintu vwakwe.
28 “Nalyoli nkuvhavhuuzya, avhantu vhaliswilwa imbiivhi nu musaamu wonti, 29 nkandi umuntu we akumusaamula uMupepo uMufinjile atangaswilwa nziila uvhunanzi uvhwo vhukwima wa shiima.” 30 Áyanzile vhwevhulo mwe vhátili, “Ali ni mpepo inkandamanu.”
Unyina na vhanine vhakumulondola uYeesu
(Mataayi 12:46-50; Luuka 8:19-21)
31 Unyina na vhanine avha Yeesu vhahafiha, vhahimiilila panzi, vhahamusonteelezya umuntu kumwita. 32 Impuga ye yátendiime kumuzyunguula yihamuvhuuzya yihati, “Umaayi waaho na vhanine vhaaho vhali panzi, vhakukwita.” 33 Ahavhaamula ahati, “Umaayi waane na vhanine vhaane vhe vha naanu?” 34 Ahavhenyeelezya vhe vhátendiime kumuvhungatila imbazu zyonti ahati, “Ivha vhe vhamaayi vhaane na vhanine vhaane. 35 Umuntu wonti we akuvhomba zye uMulungu akwanza, uyo we munine waane havhili we wu maayi waane.”