2
UYeesu ali na maha aga kuswila imbiivhi
(Mataayi 9:1-8; Luuka 5:17-26)
1 Lwe zyatuuha insiku nyinsi uYeesu ahagaluha ku Kapelanawuumu na vhantu vhahiivwa kuuti ali pa nkaaya. 2 Avhantu avhinji vhahiizula mu nyumba yonti na kunzi vhweleele, woope uYeesu ahalumbililaga aMazwi aga Mulungu. 3 Pe avhantu vhane vhámusenziinye pi zagala umuvhinu we áhataliiye, vhahamutwalaga kwa Yeesu. 4 Mwe pe páali impuga iya vhantu, vhahapootwa apakumwinjizya mu nyumba, vhahadovhola pamwanya pe uYeesu áamile. Pe vhahamwisya umuvhinu ula, lwe ali pi zagala lyakwe. 5 UYeesu lwe aalola ulwitiho lwavho, ahamuvhuuzya we áhataliiye ahati, “Mwana waane, waswilwa uvhutalamalandu vhwaho.”
6 Vhoope avhasambiilizi avha ndajizyo izya Moose vhe vháliipo paala, vhahanda kuyivhuziilizya mu mooyo gaavho kuuti, 7 “Shooni she akuyivhiiha kuuti mupiti? Akumusaamula uMulungu! UMulungu weeka we akumuswila umuntu uvhutalamalandu vhwakwe.” 8 Woope uYeesu lwe aamanya insiivho zyavho ahati, “Shooni she mukusivhiilila vhwevhulo? 9 Igomu lili kwoshi: kumuvhuuzya we ahataliiye kuuti, ‘Waswilwa imbiivhi zyaho’, pamo kuuti, ‘Yimiliila, unyatule izagala lyaho, ujendaje?’ 10 Ishi, nkwanza mumanye kuuti ne Mwana wa Aadamua indi na maha aga kuvhaswila avhantu uvhutalamalandu.” Pe ahamuvhuuzya ula we áhataliiye ahati, 11 “Yimiliila, nyatuula izagala lyaho, uvhwele ku kwaho!” 12 Pe paala ahimiilila, ahanyatula izagala lyakwe, aheepa she avhantu vhonti vhakumulola. Avhantu vhe vháliipo paala lwe vhaalola vhahasukumila nkaani, vhahamutiima uMulungu, vhahati, “Tutahalola naalumo amafindango inza iga!”
UYeesu akumwita uLaawi amulandataje
(Mataayi 9:9-13; Luuka 5:27-32)
13 UYeesu ahasogola havhili muluvhazu mwa sumbi uwa Galilaaya. Impuga iya vhantu yihamulandata, woope ahataliha kuvhasambiilizya. 14 Lwe akujenda ahamulola umuntu we vhahatinji uLaawi, umwana wa Alifayo, atendiime pe akusonchezya umusonko. UYeesu ahati, “Tujende, undandate!” Woope uLaawi ahataliha kumulandata.
15 Pisinda uYeesu na vhasundikwa vhaakwe vháali mu nyumba ya Laawi kulya ishaakulya. Avhasonchezya musonkob na vhatalamalanduc avhinji vhe vhahamulandataga uYeesu vhátendiime kulya ishaakulya nawo. 16 Avhasambiilizi avha ndajizyo izya Moose vhe vháali Vhafalisaayi,d lwe vhaalola uYeesu akulya na vhantu vhaala, vhahavhavhuziilizya avhasundikwa vhaakwe vhahati, “Shooni she akulya na vhasonchezya musonko na vhatalamalandu?” 17 UYeesu ahiivwa vwe vhakuyanga, ahavhavhuuzya ahati, “Avhapuuma vhatakumwanza umuganga, nkandi avhavhinu vhe vhakumwanza umuganga. Ine ntinzile kuvhalondola avha nalyoli vhandandate, nkandi kuvhalondola avhatalamalandu.”
UYeesu akusambiilizya izya vintu ivipwa ni vikaali
(Mataayi 9:14-17; Luuka 5:33-39)
18 Ahavhaliilizyo haala avhasundikwa vha Yoohani na Vhafalisaayi vháamile na maata aga kuyiima kulya ishaakulya. Isiku limo avhantu vhahinza kumuvhuziilizya uYeesu vhahati, “Shooni she avhasundikwa vha Yoohani na vha Vhafalisaayi vhakuyiima kulya, ileelo avhaaho ha?” 19 UYeesu ahavhaamula ahati, “We akwimala inga avhalanjiiye avhantu pa winga, vhatakwanzilwa kuyiima, lwe we akwimala ali pooka naavho. 20 Nkandi insiku zye vhalivheefezya we akwimala pe vhaliyiima kulya.
21 “Ataliipo umuntu we akulaakiha ishilaaka ishipwa pa mwenda umukaali, mwe pe ishilaaka ishipwa shikuzepulanya nu kunanganya nkaani umwenda umukaali. 22 Havhili, umuntu atakuvhiiha idivaayie mu mafuuku amakaali. Inga avhomba vhwevhulo, idivaayi yiila impwa yikuzepulanya ifuuku nu kwita idivaayi pansi. Nkandi shikwanzilwa kuvhiiha idivaayi mu mafuuku amapwa aga makwembe.”
UYeesu ali na maha ni Sabaato
(Mataayi 12:1-8; Luuka 6:1-5)
23 Isiku limo ilya pa Sabaato, uYeesu na vhasundikwa vhaakwe vhahatuuha mu magunda aga ngana, avhasundikwa vhaakwe vhahataliha kudumula amatwe aga ngana. 24 AVhafalisaayi vhahamuvhuziilizya uYeesu vhahati, “Shooni she avhasundikwa vhaaho vhakuvhomba imbombo ye mwiho pi siku ilya Sabaato?”
25 UYeesu ahati, “Mutahavhaazya vwe uDaavhudi ávhomvile lwe áamile ni nzala, uweene na vhantu vhaakwe? 26 Áyinjiiye mu nyumba ya Mulunguf mu havhaliilizyo he uAbiyatali áali Mupuuti uMupiti wa Vhayuudag nu kunyatula amakaati ge gáamile mafinjile. Amakaati gáali gakulya avhapuuti avha Vhayuuda vheeka, ileelo uDaavhudi ahalya ahaavhapa na vhamwavho.” 27 Ahonjezya ahati, “Isiku ilya Sabaato lyávhisiilwe kumwavwa umuntu, umuntu atápeziilwe kuyivhombela iSabaato. 28 Mwe muumwo uMwana wa Aadamu ali na maha poosye ni Sabaato.”