AMazwi aMinza aga Yeesu Chilisiti
inza vwe gasimviilwe nu Maaliko
1
UYoohani akuvhasengaanya avhantu kumuposheela uYeesu
(Mataayi 3:1-12; Luuka 3:1-18; Yoohani 1:19-28)
1 Uvhu vhwe vhwandilo uvhwa Mazwi aMinza ge gakuyanga izya Yeesu Chilisitia uMwana wa Mulungu. 2 Gávhombesile inza vwe ágasimvile umukuvhwi uYisaayi vwe uMulungu áyanzile kuuti:
“Ndimusonteelezya umutumwa waane,
akulongolele kulingaanya idala lye ulituuha.b
3 Umuntu uyo alitaliha kuvhila imbila mwi laala kuuti,
‘Mumulinganizanye idala uMWENE,
mugolosye mwe alituuha.’”c
4 Uhoome uyo áali wu Yoohani we ahavhanga mwi laala, ahalumbililaga kuuti, avhantu vhatonte imbiivhi zyavho nu kwozelwa, pe uMulungu kwe avhaswile. 5 Avhantu kufuma mu nkaaya iya mu Yelusaleemu na mu mukowa wonti uwa mu Yudeeya vhahasogola kumutejeelezya, vhahatonta imbiivhi zyavho, woope ahavhoozya mwi jenje uYolodani. 6 UYoohani ahazwalaga amenda aga masepe aga ngamilad ni lamba ilya ikwembe mu musana. Ahalyanga avhamakanta nu vhwushi uvhwa mwi laala. 7 Ahalumbililaga ahatinji, “We akulandata mwisinda lyane mupiti, havhili ali na maha kundusya ine, we ntahondeeye kwima ne muvhomvi waakwe uwa kuzevwa nu kusatula inkusa izya vilyatu vwakwe.e 8 Ine nkuvhoozya na minzi, ileelo uweene alivhoozya nu Mupepo uMufinjile.”
UYeesu akwozelwa nu kulingwa
(Mataayi 3:13-4:11; Luuka 3:21-22; 4:1-13)
9 Ahavhaliilizyo he haala uYeesu ahafuma mu nkaaya ya Nazaleeti mu mukowa wa Galilaaya,f ahafiha kwa Yoohani, woope ahamwozya mwi jenje uYolodani. 10 UYeesu lwe akutumpuha mu minzi, ahalola kumwanya kukwiguha nu Mupepo uMufinjile we ali ngati nkunda ahamwishila pamwanya yaakwe. 11 Izwi ilya Mulungu lihimvwiha kufuma kumwanya, lihati, “Iwe we Mwana waane unkundwa, nahondezelwa niiwe.”
12 Pe uMupepo ahamuvhuuzya uYeesu kuuti asogole mwi laala. 13 Ahiima mwi laala insiku alubaayini pooka ni vihanu vwa mwi laala. Pe uSetano ahinza kumulinga. Lwe zyatuuha izyo avhahavhizya avha Mulungu vhahinza kumuvhombela.
UYeesu ataliha kuvhiita avhantu vhiime vhasundikwa vhaakwe
(Mataayi 4:12-22; Luuka 4:14-15; 5:1-11)
14 Pisinda uYoohani ahakungwa mu jeela, pe uYeesu ahasogola ku Galilaaya, ahataliha kulumbiilila Izwi iLyinza ilya Mulungu. 15 Ahati, “Ahavhaliilizyo aha vhumwene uvhwa Mulungu haafiha nu vhumwene uvhwa Mulungu vhwa palamila. Tontaji mupindushe, mugitishe Izwi iLyinza ilya Mulungu.”
16 Isiku limo uYeesu ahajendaga mu luvhazu mwa sumbi we vhakuti Galilaaya. Pe ahamulola umuntu we vhahatinji uSiimoni nu munine uAndeleeya. Vhahavuvhaga inswi ni honde mwa sumbi. 17 UYeesu ahavhavhuuzya ahati, “Mundandate, kwe mbavhiishe kuuti muvuvhaje avhantu.” 18 Pe paala vhahagaleha amahonde gaavho, vhahamulandata.
19 Lwe uYeesu asogola pilongolela hansi ahamulola umuntu we vhahatinji uYaakobu nu munine uYoohani, avhaana vha Zebedayi. Vháamile mwi vhooti, vhahalinganyaaga amahonde gaavho. 20 Lwe avhalola vhweleele ahavhiita, vhoope vhahamuleha uyise waavho uZebedayi muhati iya ivhooti pooka na vhavhomvi vhaakwe, vhahanda kumulandata uYeesu.
Uvhupiti uvhwa Yeesu, impepo zikwepa
(Luuka 4:31-37)
21 UYeesu na vhasundikwa vhaakwe vhahasogola ku nkaaya iya ku Kapelanawuumu. Lwe lyafiha isiku ilya Sabaato,g ahinjila mwi sinagoogih pooka na vhasundikwa vhaakwe, ahanda kusambiilizya. 22 Avhantu vhahasukumila nkaani lwe vhaalola vwe akusambiilizya, mwe pe ahasambiilizyaga ngati muntu uwa ndajizyo impiti, te inza vwe vhahasambilizyaga avhasambiilizi vhaavho avha ndajizyo izya Moose.i 23 Muhati mwi sinagoogi muula áliipo umuntu wooka, we álemiilwe ni mpepo inkandamanu. 24 Ahataliha kuhoola inkoolo kuuti, “Tuli na malandu vhuli niiwe, iwe Yeesu uwa ku Nazaleeti? Uyinzile kutulovwa? Inkumanyile iwe we Mufinjile wa Mulungu.” 25 UYeesu ahayihajila ku maha, ahayivhuuzya impepo ahati, “ahalanga! Fuma mwa muntu uno!” 26 Impepo yiila yihamutetemesya umuntu ula, ahahoola nkaani, yihafuma.
27 Vhonti vhahasukumila nkaani nu kuvhuzilizanya kuuti, “Nsambiilizyo vhuli injeni izi havhili izya maha? Umuntu uno ali ni ndajizyo impiti, mwe kwi izwi akuhajila poosye ni mpepo imbiivhi, zikumushindiha!” 28 Pe inongwa izya mbombo zya Yeesu zihayeela naluvhiilo mu mukowa wonti uwa mu Galilaaya.
UYeesu akuvhaponia avhavhinu avhinji
(Mataayi 8:14-17; Luuka 4:38-41)
29 Lwe vhaafuma mwi sinagoogi, uSiimoni nu Andeleeya vhahamuposheela uYeesu nu Yaakobu nu Yoohani ku nyumba yaavho. 30 Mu nyumba muula, unyinavwala wa Siimoni ákaasite, ávhinile inzegema. Lwe uYeesu aafiha paala, vhahamuvhuuzya izya vhuvhinu uvhwa maayi ula. 31 UYeesu ahamupalamila umuvhinu, ahamulema inyoovhe, ahamuponia inzegema, ahamwimiilisya. Woope, ahataliha kuvhavhombela.
32 Lwe haafiha hamazuuvha, izuvha lwe lyinjila, avhantu avha mu nkaaya yiila vhahamuleetela uYeesu avhavhinu vhonti na vhe vháamile ni mpepo imbiivhi. 33 Avhantu avhinji nkaani avha mu nkaaya yiila vhavhungiine pilongolela ilya nyumba yiila. 34 Ahavhaponia avhantu avhinji avha mavhinu aminji. Havhili, aheefwa impepo inyinji, ileelo ahazihaana zitamutahaje mwe zyámumanyile kuuti wu naanu.j
UYeesu akulumbiilila mu Galilaaya
(Luuka 4:42-44)
35 Indaavhi yaakwe inzanchi lwe kushiili kusha uYeesu ahadaamuha, aheepa mu nyumba, ahasogola pe patáali avhantu kulaavha. 36 Lwe hatuuha ahavhaliilizyo hamo uSiimoni na vhamwavho vhahasogola kumulondola. 37 Lwe vhamulola vhahamuvhuuzya vhahati, “Avhantu vhonti vhakukulondola.” 38 UYeesu ahati, “Tujende ukunji mu nkaaya izinji izya mupiipi, imsogole indumbiilile mwope, mwe pe ninzile ku vhantu vhonti.” 39 Pe ahasogola mu Galilaaya mwonti, ahalumbililaga mu masinagoogi nu kwefwa impepo inkandamanu.
UYeesu akumuponia uwa mambombo
(Mataayi 8:1-4; Luuka 5:12-16)
40 Umuntu wumo uwa mambombo ahinza kwa Yeesu, ahamusugamilila nu kumulambiilizya ahati, “Inga ukwanza umponie amambombo.” 41 UYeesu ahamufwila uvhwila, ahamupalamansya nu kumuvhuuzya kuuti, “Nkwanza. Pona!” 42 Pe paala umuntu ula, uvhuvhinu vhuhamwepa, ahapona. 43 UYeesu ahamuvhuuzya kuuti asogole, ahamuhomelezya ahati, 44 “Utahamuvhuuzye umuntu nuumo inongwa izi. Sogoola ku vhapuuti avha Vhayuudak uyilolesye vwe waapona. Havhili, ufumwe ishisugwa inza vwe uMoose ahalajizya,l shivhe shisimishizyo ku vhantu kuuti waapona.” 45 Ileelo umuntu ula atahapuuma, ahejendeelela kuvhila zye uYeesu amuvhombela zyonti. Pe mu nkaaya yonti yihavha shigomu kwa Yeesu, poosye kwinjila apazelu mwe pe avhantu vhahamuvhunganilaga, ahiima ku kwilu kwe kutáali avhantu. ileelo avhantu kufuma intala zyonti vhahamulandata kwe kuula kwe áamile.