13
Avha Saavhuli nu Balinaaba vhakusaavhulwa
1 Mu shivhanza isha mu Antiyookiya mwámile avhakuvhwi na vhasambiilizi. Ivho vháali vhe vha Balinaaba nu Simiyooni (we vhahatinji uNiigelia) nu Luukiyo uwa ku Kileene nu Manayeeni (we ásunjiliilwe pooka nu mwene uHeelodi) nu Saavhuli. 2 Isiku limo, lwe vhonti ivho vhakumupuuta uMwene uYeesu nu kuyiima kulya,b uMupepo uMufinjile ahavhavhuuzya ahati, “Munsavhulile avha Balinaaba nu Saavhuli ku mbombo ye imbitiiye.” 3 Lwe vhamupuuta uMulungu nu kuyiima kulya havhili, vhahavhavhiishila inyoovhe avha Balinaaba nu Saavhuli kuvhaloota, pe vhahavhaleha kuuti vhasogole.
UPaavhuli akudalinkana nu Eelima umukuvhwi uwa ilenga
4 Pe lwe uMupepo uMufinjile avhasonteelezya avha Balinaaba nu Saavhuli, vhahasogola mu nkaaya iya Selukiya. Kufuma ipo vhahashuula ni meeli kusogola mu nkaaya iya Salaami, insi iya Kiipulo ye yáamile pahati pa sumbi. 5 Lwe vhaafiha ukwo, vhahalumbililaga izwi ilya Mulungu mu masinagoogi aga Vhayuuda. Vháamile pooka nu Yoohani we vhahatinji uMaaliko, umutuuli waavho.
6 Vhahashuula mu nsi yonti iya Kiipulo, vhahafiha mu nkaaya yimo iya umwo ye vhahatinji iPaafo. Ukwo vhahamwaga uMuyuuda wumo umulozi, umukuvhwi uwa ilenga, izina lyakwe vhahatinji uBali-Yeesu. 7 Áamile nu Selugiyo uPaavhuli umupiti uwa mukowa uwa Kiipulo, we áamile muntu uwa njeele nkaani. Pe umupiti uyo ahavhiita avha Balinaaba nu Saavhuli, kuuti vhasogole ku kwakwe inga atejeelezye izwi ilya Mulungu. 8 Ileelo uBali-Yeesu umulozi (izina lyakwe mu Shiyunaani wu Eelima), ahadalinkana na vha Balinaaba nu Saavhuli, ahalinga kumusonganya umupiti uyo, inga atahiitishe insambiilizyo zyavho kuzya Yeesu.
9 Pe uSaavhuli, we izina lyakwe ilyamwavho vhahatinji uPaavhuli,c she ayizuuye uMupepo uMufinjile, ahamuzyamila uEelima, 10 ahamuvhuuzya ahati, “Iwe we mwana wa Mukwalanzi, we mulugu uwa zyonti izya nalyoli ku minso aga Mulungu! Uyizuuye uvhushevu uvhwa kuhopenkanya avhanji nu vhuvhiivhi vhwonti. Shooni she utakuleha kupuvwa amadala amagolosu aga MWENE uMulungu? 11 Ishi, uMWENE kwe akupe isunde, kuuti uvhe we ntonko, te uvhulole uvhuzelu uvhwa izuvha ku havhaliilizyo hamo.”
Naluvhiilo, ahiisi hahamudinda uEelima ku minso, ahaleha kulola, ahanda kupulumba kulondola umuntu uwa kumulema inyoovhe, inga amulongole. 12 Umupiti ula lwe aalola zye zyavhombeha, ahamwitiha uMwene uYeesu. Havhili ahasukumila nkaani insambiilizyo zye ázyivuuye kuzya Mwene uYeesu.
UPaavhuli akulumbiilila mu Antiyookiya iya Pisidiya
13 UPaavhuli na vhamwavho vhaheepa ni meeli ku Paafo, vhahafiha mu nkaaya iya Peelige mu wilaaya iya Pamufiiliya. Ileelo uYoohani uMaaliko ahavhaleha kunuukwo, ahagaluha ku Yelusaleemu. 14 Pe uPaavhuli nu Balinaaba vhaheepa ku Peelige, vhahajendeelela nu vhulendo, vhahafiha mu nkaaya iya mu Antiyookiya ye yáali papiipi ni nsi iya Pisidiya. Isiku ilya Sabaato, vhahinjila mwi sinagoogi, vhahatendama. 15 Lwe vhatendama, umuntu wumo ahavhaazya mwi kalaata ilya ndajizyo izya Moose, na mu mazwi aga vhakuvhwi. Pe avhasongo avha isinagoogi vhahasonteelezya umuntu kwa Paavhuli nu Balinaaba, avhavhuuzye ati, “Vhamwitu, inga muli ni zwi ilya kuvhavhuuzya avhantu kuvhagomwa amooyo, muyanje.”
16 Pe uPaavhuli ahimiilila, ahavhahandanizya ni nyoovhe kuuti vhamutejeelezye, ahavhavhuuzya ahati, “Mwe vhantu vha mu Isilayeeli, niimwe muvhanji mwe mwinjiiye mu shipuuto isha Vhuyuuda, tejeelezyi! 17 UMulungu wiitu twe Vhaisilayeeli we ávhasavhuuye avhasookulu vhiitu. Ahavhaliilizyo he vhahatendamaga ku vhujeni mu nsi iya mu Miisili, ahavhavhiiha kuvha luho ulupiti nkaani. Pisinda ahavhalongozya nu kuvheefwa mu Miisili ku maha gaakwe amapiti. 18 Ahavhajimbiilila ku havhaliilizyo aha maaha alubaayini ishi mwi laala. 19 Ahazilovwa inkolo saba mu nsi iya mu Kanaani, ahaavhapa avhasookulu vhiitu insi iyo yivhe yaavho. 20 Zyonti izyo zyávhombesile ku havhaliilizyo aha maaha ge gáfishiiye miya ine hamusiini ishi.
Pisinda, uMulungu ahaavhapa avhasookulu vhiitu avhaamuzi avha kuvhalongozya, kufishila mu havhaliilizyo aha mukuvhwi uSaamweli. 21 Pe vhahalaavha kuuti vhavhe nu mwene. UMulungu ahaavhapa uSaavhuli, umwana wa Kiishi, uwa mu luho ulwa Benjamiini, woope ahakonzya ku havhaliilizyo aha maaha alubaayini. 22 Pe uMulungu ahamwefwa uSaavhuli, ahamusaavhula uDaavhudi avhe wu mwene waavho. UDaavhudi uyo, uMulungu ahamusimishizya ahati, ‘Namulola uDaavhudi umwana wa Yeese, akuwuhondezya umwoyo waane, havhili we kwe avhombaje zyonti zye nkwanza zivhombeshe.’d
23 Kufuma mu mpaapo izya mwene uDaavhudi, mwe uMulungu avhaleteeye aVhaisilayeeli uMuposhi uYeesu, inza vwe áfinzile. 24 Lwe uYeesu ashiili kwanda imbombo yaakwe, uYoohani álongoleeye kuvhalumbiilila aVhaisilayeeli vhonti kuuti, vhatonte uvhutalamalandu vhwavho nu kwozelwa. 25 UYoohani lwe akumaliilizya imbombo yaakwe, ahavhavhuzyaga avhantu kuuti, ‘Mukusiivha kuuti ine ne naanu? Ine te ne we wula we mukumuguliilila! Ileelo uweene akwinza inga ine natuuha we intahondeeye poosye kuvha ne muvhomvi waakwe uwa kuzevwa nu kusatula inkusa izya vilyatu vwakwe.’”e
26 UPaavhuli ahajendeelela kuyanga kuuti, “Mwe vhamwitu, mwe vhaana avha luho ulwa Abulahamu, niimwe muvhanji mwe mwinjiiye mu shipuuto isha Vhuyuuda, iswe swenti swe uMulungu atuleteeye izwi ili ilya vhuposhi. 27 Avhantu vhe vhahaaya mu Yelusaleemu pooka na vhapiti vhaavho vhatámumanyile uYeesu kuuti we Muposhi. Havhili vhatágamanyile na mazwi aga vhakuvhwi kuzya Yeesu, ge vhakuvhaazya insiku zyonti izya Sabaato. Vhahagalunjisya kwi dala ilya kumulonga uYeesu nu kuumupa isunde ilya kumugoga. 28 Pooka nu kuuti vhatályazile izwi ilya nalyoli lye likulolesya kuuti yihondeeye kumugoga uYeesu, ileelo vhahamulaavha nkaani uPilaato amulonje kuuti vhamugoje. 29 Lwe zyalunjiha zyonti zye uYeesu ásimviliilwe, vhahamwisya pa shihovhenkanyo, vhahamusyila mu mbiipa. 30 Ileelo uMulungu ahamuzyusya. 31 UYeesu woope ahayilolesya insiku inyinji ku vhantu vhe ásogooye pooka navho kufuma ku Galilaaya, kusogola ku Yelusaleemu. Ivho vhe vhahoome vhaakwe ku vhantu vhiitu aVhaisilayeeli.
32 Iswe tukuvhalumbiilila Izwi iLyinza, kuuti ziila zye uMulungu áfinzile ku vhasookulu vhiitu, 33 avhomvile ku kwitu tuvhazukulu vhaavho kwi dala ilya kumusaavhulaf uYeesu, inza vwe yisimviilwe mu Zabuuli iya vhuvhili kuuti,
‘Iwe we Mwana waane,
ileelo ili navha ne Yise waaho.’g
34 Havhili uMulungu ahamuzyusya uYeesu, inga atahafishile kuvhola. Kuli izyo uMulungu átili:
‘Ndiivhapa imwe uvhulootwe uvhufinjile uvhwa nalyoli vhwe náfinzile kuumupa uDaavhudi.’h
35 Woope uDaavhudi ásimvile apamwavho kuuti,
‘Te uhitishile kuuti umuvhili uwa Mufinjile waaho vhufishile kuvhola.’”i
36 UPaavhuli ahajendeelela kuyanga kuuti, “UDaavhudi lwe avhomba zyonti zye uMulungu ahasiivhaga ku vhantu avha havhaliilizyo haakwe, ahafwa. Vhahamusyila mu mbiipa zya vhayise vhaakwe, ahavhola. 37 Ileelo ula we uMulungu ahamuzyusya, uweene atahavhola.
38 Ishi imwe vhamwitu, mumanye kuuti kutuushila kwa Yeesu uyo we mukulumbiililwa, mukuswilwa uvhutalamalandu vhwinyu. 39 Wonti we akumwitiha uweene, akuvhaazilwa kuuti ahondeeye pilongolela ilya Mulungu, inongwa zye zitangavhombeha kutuushila kuzilandata indajizyo izya Moose. 40 Muvhe minso, zitahinze zivhaaje zye zisimviilwe mwi kalaata ilya vhakuvhwi kuuti,
41 ‘Yeenyi imwe mwe muli ni suufwo,
musukumile nu kuteejela ukutali.
Nkuyanga isho, mwe pe ndivhomba zimo mu manda giinyu,
zye te muhiitishe naalumo, poosye inga umuntu angavhalovhoosezya!’”j
42 Avha Paavhuli nu Balinaaba, lwe vhaakwepa mwi sinagoogi, avhantu vhahavhalaavha kuuti vhagalushe iSabaato ye yikwinza, inga vhayanje amazwi igo havhili. 43 Lwe avhantu vhasogola kuhaaya, aVhayuuda avhinji, pooka na vhantu vhe te Vhayuuda ileelo vhínjiiye mu shipuuto isha Vhuyuuda, vhahavhalandata avha Paavhuli nu Balinaaba. Avhatumwa vhavhili ivho vhahayangaga navho kuvhagomwa amooyo, kuuti vhajendelelaje kusuuvhila uvhwila uvhwa Mulungu.
44 Isiku ilya Sabaato lye lihalandata, avhantu avhinji nkaani avha mu nkaaya yiila vhahinza kutejeelezya izwi ilya Mwene uYeesu. 45 Ileelo aVhayuuda lwe vhaalola avhantu vhavhungiine impuga impiti, vhahavha nu mwone. Vhahanda kuhaana amazwi ge uPaavhuli ahayangaga nu kumusaamula. 46 Pe avha Paavhuli nu Balinaaba vhahavhaamula aVhayuuda ivho ku vhudandamazu vhahati, “Yáhondeeye izwi ilya Mulungu lilumbiililwe suuti kuli imwe muVhayuuda. Ileelo mwalihaana, nu kuyilola kuuti mutahondeeye kuvha nu vhulanzi uvhwa shiima shiima. Ishi, twavhaleha, twasogola ku vhantu vhe te Vhayuuda, 47 mwe pe uMwene uYeesu átulajiziizye átili,
‘Nkuvhiisile kuvha we vhuzelu ku vhantu vhe te Vhayuuda,
inga uvhatwalile uvhuposhi kufishila mwe insi yihasilila.’k”
48 Avhantu vhe te Vhayuuda, lwe vhiivwa amazwi igo, vhahaseshela, vhahalitiima izwi ilya Mwene uYeesu. Vhonti vhe vhasavhuliilwe kuvha nu vhulanzi uvhwa shiima shiima, vhahamwitiha uMwene.
49 Izwi ilya Mwene lihajendeelela kukumuha mu nsi yiila yonti. 50 Ileelo aVhayuuda vhahavhasonjeelezya avhantanda avha mushinzi vhe te Vhayuuda vhe vhínjiiye mu shipuuto isha Vhuyuuda, na vhapiti avha nkaaya iyo. Ivho vhahavhasonjeelezya avhantu kuuti vhavhayimvwe avha Paavhuli nu Balinaaba, vhahavhashimbizya mu nsi yaavho. 51 Pe avha Paavhuli nu Balinaaba vhahavhakunyuntila ulusuuto lwe lwámile mu vinama vwavho kuvhasoha,l vhahasogola mu nkaaya iya mu Ikooniya. 52 Ileelo avhalandati avha Yeesu avha pa Antiyookiya vhahaseshelaga nkaani, nu kwizula uMupepo uMufinjile.