14
Avha Paavhuli nu Balinaaba ku Ikooniya
1 Lwe avha Paavhuli nu Balinaaba vhali mu Ikooniya, vhahinjila mwi sinagoogi ilya Vhayuuda inza vwe amaata gaavho gáamile. Vhahavhasambiilizya avhantu muumwo izya Yeesu ku vhudandamazu. AVhayuuda avhinji, pooka na vhantu avhinji vhe te Vhayuuda, vhahamwitiha uYeesu. 2 Ileelo aVhayuuda vhamo vhahahaana kumwitiha uYeesu. Ivho vhahanda kuvhasonjeelezya vhe te Vhayuuda, kuuti vhavhaviitilwe aVhachilisiti. 3 Pe, avha Paavhuli nu Balinaaba vhahatendama ku manda aminji pa Ikooniya, vhahavhavhuzyaga avhantu izya vhwila uvhwa Mwene uYeesu ku vhudandamazu, uku vhakumusuuvhila uweene. UMwene ahasimishizyaga kuuti amazwi gaavho ga nalyoli, kwi dala ilya kuuvhapa amaha aga kuvhomba ivilolesyo na amafindango ku vhwinji. 4 Pisinda, avhantu avha mu nkaaya yiila vhahatapunkana, vhamo vhahavha ku Vhayuuda vhe vhámuhaanile uYeesu, vhamo vhahavha ku vhatumwa.
5 Pe aVhayuuda na vhasongo vhaavho, pooka na vhantu vhe te Vhayuuda, vhahitinkana kuvhavhomba ahavhiivhi nu kuvhahoma na mavhwe avha Paavhuli nu Balinaaba. 6 Vhoope lwe vhaamanya ulwivwano ulwo, vhahashimbiilila mu nsi iya mu Likawooniya, umwo vhahasogola mu nkaaya iya ku Lisitila na ku Deelibe, na mu nkaaya impalamani. 7 Ukwo vhahalumbililaga Izwi iLyinza.
Avha Paavhuli nu Balinaaba ku Lisitila
8 Mu Lisitila mwámile umuntu wumo we álemaaye ivinama. Umuntu uyo áamile wu ntendya kufuma kupaapwa kwakwe, atájenzite naalumo. 9 Lwe uPaavhuli akulumbiilila, umuntu uyo woope átendiime pe paala ahamutejelezyaga. UPaavhuli ahamutontomela, ahalola kuuti umuntu uyo ali nu lwitiho ulwa kupona. 10 UPaavhuli ahayanga kwi izwi ipiti ahati, “Yimiliila! Golooha!” Pe umuntu uyo ahimiilila naluvhiilo, ahanda kujenda wuuyo weeka.
11 Avhantu avhinji vhávhungiine paala. Lwe vhaalola vwe uPaavhuli amuponia umuntu uyo, vhahanda kuzuma ahalanga mu njango yaavho iya Shilikawooniya. Vhahati, “Avhalungu vhatwishiiye ku shiholanyo isha vhantu!” 12 Vhahaavhapa amazina aga vhalungu vhaavho. UBalinaaba vhahati wu Zeewu, uPaavhuli vhahaamupa izina ilya Helime,a mwe pe we ahayangaga nkaani. 13 Inyumba imfinjile iya Zeewu yáamile kunzi iya nkaaya. Pe umupuuti uwa Zeewu ahaleeta ivipambwi vwe vhátavhiiye amayembo ni nkambaku zivhili pa mulyango uwa nkaaya. Uweene pooka na vhanji, vhahanzaga kuvhavhoolela avha Paavhuli nu Balinaaba inkambaku izyo, kuuti zivhe mpuutile.
14 Ileelo avha Balinaaba nu Paavhuli lwe vhiivwa izyo, vhahazepulanya amenda gaavho kulolesya kuuti vhiliilwe. Vhahashimbila, vhahinjila mu mpuga iya vhantu. Vhahazuma ahalanga, 15 vhahati, “Mwe vhantu! Shooni she mukuvhomba izi? Niiswe swe vhantu inza imwe! Tukuvhalumbiilila Izwi iLyinza, inga mupindushe nu kuzileha izya shaaha izi, havhili mumulandate uMulungu we mulanzi. Uweene we ahapela imwanya ni nsi nu sumbi, na vwonti vwe vili muumwo. 16 Amanda aga hali, uMulungu ávhalesile avhantu vhonti vhe te Vhayuuda, kuuti vhajendelelaje mu zye vhakwanza vhuuvho. 17 Ileelo, atahaleha kulolesya kuuti ali pooka navho, mwe pe ahavhavhombelaga inyinza. Ahavhapanga imwe imvula ni viyavho ku havhaliilizyo he hahondeeye, havhili, ahavhapanga ishaakulya isha kuvhakwila nu kugiizuzya amooyo giinyu uluseshelo.” 18 Avha Paavhuli nu Balinaaba vhahavhadinda avhantu kufumwa impuutile. Ileelo shitáali shitonsu kuvhahaana poosye ku mazwi igo.
19 Pisinda, aVhayuuda vhamo vhahinza kufuma ku Antiyookiya na ku Ikooniya. Vhahavhasonjeelezya avhantu avhinji, vhahamuhoma uPaavhuli na mavhwe. Vhahamudendemula vhahamutwala panzi pa nkaaya, mwe pe vhahasiivhaga kuuti aafwa. 20 Ileelo avhalandati avha Yeesu vhahamuzyunguula, woope ahavhuuha, ahagaluha mu nkaaya. Indaavhi yaakwe, aheepa penepo, ahasogola pooka nu Balinaaba ku nkaaya iya Deelibe.
Avha Paavhuli nu Balinaaba vhakugaluha ku Antiyookiya iya ku Siiliya
21 Avha Paavhuli nu Balinaaba, lwe vhali mu Deelibe, vhahalumbililaga avhantu Izwi iLyinza, avhinji vhahavha vhalandati avha Yeesu. Pisinda vhahagaluha mu Lisitila na mu Ikooniya na mu Antiyookiya. 22 Umwo mwonti vhahavhagomwaga avhalandati amooyo nu kuvhasuvhaalizya kuuti vhasimpaje mu lwitiho. Vhahavhavhuzyaga kuuti, “Tukwanzilwa kutuushila amayimba aminji, kwinjila mu vhumwene uvhwa Mulungu.”
23 Avha Paavhuli nu Balinaaba vhahasavhulaga avhasongo mu vivhanza vwonti. Vhahalaavhaga nu kuyiima kulya ishaakulya, pe vhahavhavhiihaga kwa Mwene uYeesu we vhámwitisile. 24 Pisinda avha Paavhuli nu Balinaaba vhahatuuha mu nsi iya Pisidiya, vhahinjila mu wilaaya iya Pamufiiliya. 25 Vhahafiha mu nkaaya iya Peelige. Vhahasambiilizya izwi ilya Mulungu umwo, pe vhahasogola mu nkaaya iya Ataaliya. 26 Kufuma ipo, vhahasogola ni meeli ku Antiyookiya iya Siiliya. Ipo pe ishivhanza shávhalavhiiye uvhwila uvhwa Mulungu ku mbombo ye vhápezile vhayimala. 27 Lwe vhaafiha pa Antiyookiya, vhahavhavhungaaniha avhantu avha mu shivhanza. Vhahavhavhuuzya zyonti zye uMulungu ávhomvile kutuushila ku kwavho nu kuuti avhalolesiizye vhe te Vhayuuda, idala ilya kumwitiha uYeesu. 28 Vhahatendama amanda aminji pa Antiyookiya pooka na vhalandati avha Yeesu.