Hura Paulus to pamulana rau hi jumaa i Korintus
Popailodoa
Hura ei laitulihi Paulus rau hi jumaa i Korintus. Korintus ee mai hangu ngata bohe i propinsi Akhaya, to nehua rara poparentaa Magau Bohe Roma ilodo. Korintus ee mai laincani habana nawali ngata podagaa pade habana ingku-ingku daa to laibabei i ria. Naria bahangkua ongu hou pepuea hi dewa-dewi. To koropokona hou pepuea hi Afrodite, dewi pohintaa to Yunani. Nadea bangkele to nobago i hou pepuea ee mai nobalu wotora hi tauna to nepue hi Afrodite. Ingku todea ngata Korintus neliu kadaana lako humawee ngata i poparentaa Magau Bohe Roma tempo Paulus notulihi hura ei. Tempo ei, Korintus ee nehua bagia tana Yunanimi.
Maria hampae hantanga kahaena Paulus no'oha i Korintus nangkarebai Kareba Belo (Kis. 18:1-17). Tempo ee mai nadea tauna i Korintus nawali neparahaya hi Pue Yesus. Nehuwupi Paulus lako Korintus, naratami hadua to neparahaya hi Pue Yesus to nataualu nopatudu lolita Alatala. Hanga tauna ee mai Apolos (Kis. 18:24–19:1). Apolos ee mai nampahambei Paulus nopatudu bo nantulungira to Korintus to neparahaya hi Pue Yesus. Naupawee, naria moto oa katekaia Paulus hante jumaa i Korintus.
Paulus notulihi hura ei mai, nampabalahi hurara to neparahaya i Korintus to laikeni bahangkua dua tauna to nohancou hante Kloe (1:11). Rara hura ee, laipekunera bahangkua ngaa hi Paulus nangkambelai ada poncamoko, nangkambelai bewa mepue, nangkambelai nangkoni pangkoni to laikeni nepue hi pue ntanina, pade nangkambelai baha Inoha to Nagaha. Tauna eera mai nangkewo mui hi Paulus ane hira to neparahaya i Korintus naria pomehalapahara pade ingkura moma natimotoa. Pade naria muira guru-guru to moma nakono narata i Korintus nanguli ane Paulus ee mai moma'i mpuu-mpuu rasul Pue Yesus. Aji Paulus notulihi hura ei mai, nampahonoi pepekuneara to Korintus pade nopatudura bona nemorapa mampoingkuka ingku-ingku to moma mahipato rababei halaku tauna to neparahaya hi Pue Yesus.
Ihi buku ei
1. Tabe pade posukuru Paulus (1:1-9)
2. Pomehalapahara to neparahaya i Korintus (1:10–4:21)
3. Patudu nangkambelai to poncamoko (5:1–7:40)
4. Patudu nangkambelai pangkoni to laikeni nepue hi pue ntanina (8:1–11:1)
5. Ingku to nahipato rara kahiromua to neparahaya (11:2-34)
6. Pampakulea to laiwaika Inoha to Nagaha pade nangkambelai towe (12:1–14:40)
7. Nangkambelai katuwu nculi to mate (15:1-58)
8. Peboha pade tabe kahuduana (16:1-24)