Nangkambelai pangkoni to laikeni nepue hi pue ntanina
8
1 Nangkambelai pangkoni to laikeni nepue hi pue ntanina, nakono to laiuli, “Laincanita purami.” Naupawee to laincani ee nampakahombo tauna. Bo towe, nampakaroho rara tauna. 2 Ane maria tauna manguli nadeami to laincanina, kakonona poma'i laincanina mpuu-mpuu napa to koropokona kana nancani. 3 Naupawee hema to nampotowe Alatala, hia laitarima Alatala.4 Nangkambelai nangkoni pangkoni to laikeni nepue hi pue ntanina, laincanita ane moma naria pue ntanina i dunia ei. Laincanita mui ane Alatala ee mai hadua aga, moma naria ntanina. 5 Nadea ami to laipue manuhia i dunia ei, belo to naria i langi, belo mui to naria i tana. 6 Naupawee ane kita, hadua aga Alatala. Hiami Tuamata to nopajadi hangu hangaa pade hi Hiami tajuju katuwuta. Wee mui Pueta hadua aga. Hiami Pue Yesus Kristus to habana Hia hangu hangaa laipajadi pade habana Hia mui natuwuta. 7 Naupawee moma humawee tauna to neparahaya hi Pue nangincani humawee to iuli lauria. Apa naria ompita, ilodora nepue hi pue ntanina. Etu pade duu ei, hira nampekiri ane rakonira pangkoni to laikeni nepue hi pue ntanina, ee mai batuana nepue hi pue ntanina motora. Aji, rara bongora nadohara, apa poma laincanira ba paliu-Nara Pue mangkoni ba moma. 8 Kakonona, moma pangkoni to nampakamohuta hante Alatala. Aji, takoni ba moma takoni, momata nauntu, moma muita narugi.
9 Laincanimi amimi ane moma komi laitagi mangkoni hangu hangaa. Naupawee maingahawo, bona nemo komi mei mampakadohara tauna to poma'i laincanira. 10 Apa ane komi to nangincani moncuna mangkoni i rara hou pepuea hi pue ntanina, pade maria ompimi to poma nangincani mangkahilo komi mobabei ewa ee, ompimi ee mei mawali maroho rarana mangkoni pangkoni to laikeni nepue hi pue ntanina. 11 Ane komi to nangincani nobabei ewa ee, laipakahilakami ompimi to poma nangincani, bo Kristus namate bona mampakahalama tauna ee mai. 12 Aji, nadoha komi hi ompimi to poma nangincani, apa ingkumi nangkeni'i nobabei ingku to laipekirina nampakadoha'i. Ane iwee, nadoha komi hi Kristus. 13 Aji, ane pangkoni ee mampakadohara ompiku, agina momami maria kukoni bau, bona nemo'a mampakadohara ompiku ee mai.