Nangkambelai poncamoko
7
1 Welau ei ku'ulika komi honoia hangu hangaa to laipekunemi rara hurami hi aku. Nabelo ami ane hadua balailo moma'i mogau hante bangkele. 2 Naupawee nampalinga nadea pogau hala, agina butu balailo maria hadua bangkelena pade butu bangkele maria hadua balailona. 3 Butu balailo kana mampodohe oa bangkelena moturu, wee mui butu bangkele kana mampodohe oa balailona moturu. 4 Bangkele moma mamala manguli ane wotona hia moto tumpuna, apa naria balailona. Wee mui balailo moma mamala manguli ane wotona hia moto tumpuna, apa naria bangkelena. 5 Nemo komi moma madota moturu dohe balailo ba bangkelemi. Naupawee ane maria hintuwumi ncamoko moma komi olu modohe moturu bahangkua kahaena bona mamala komi mohambaya, moma nongkua. Napu ee modohe nculimo komi, bona nemo komi napehori Magau Heta apa moma ibukumi nantaha dota rarami. 6 To laiuliku ei moma parenta, naupawee ane maria hintuwura to poncamoko ee bona momara olu modohe moturu bahangkua kahaena, moma nongkua. 7 Nabelo mpuu ane humawee tauna naloa nahibali ewa aku. Naupawee butu tauna laiwaika Alatala pampakulea to natantumi. Pampakulea to laiwaika Alatala ee mai hore nontani hi butu tauna.8 Naupawee hi balailo to namatemi bangkelera pade hi bangkele to namatemi balailora, kupatudura bona nabelo laupi ane maloa motoramo ewa aku. 9 Naupawee ane moma rabukura mantanee dota rarara, agina moncamokoramo. Apa nabelopi ane moncamokora, bona nemo mapepa raepera mantaha dota rarara.
10 Hi komi to poncamoko, ku'ulika komi hangu parenta. Parenta ei moma lako hi aku, naupawee lako hi Pue. Iwei parenta ee: Bangkele moma mamala mampogaaka balailona. 11 Naupawee, ane kana napogaaka balailona, moma'i mamala mobalailoki. Ane moma'i nabuku matuwu moma mabalailoa, agina mohingkabelo nculi'i hante balailona. Wee mui balailo moma mamala mampogaaka bangkelena.
12 Naria mui to ku'ulika tau ntanina. To ku'uli ei lako hi aku moto, moma lako hi Pue. Iwei to ku'uli: Rapana maria to poncamoko, pade balailona neparahayami hi Yesus naupawee bangkelena poma'i neparahaya, ompita hangu kaparahayaa ee mai nemo'i mampogaaka bangkelena ane madotadipi bangkelena ee matuwu dohena. 13 Wee moto mui ane bangkelena neparahayami hi Yesus naupawee balailona poma'i neparahaya, ompita hangu kaparahayaa ee mai nemo'i mampogaaka balailona ane madotadipi balailona ee matuwu dohena. 14 Apa balailo to poma neparahaya hi Yesus ee mai laipohireke rara jumaa Alatalami habana bangkelena, pade bangkele to poma neparahaya hi Yesus ee mai laipohireke rara jumaa Alatalami habana balailona. Ane moma iwee tantu ana-anara mei mawali ana-ana to moma nahipato i tingoo Alatala, bo kakonona ana-anara ee mai laipohireke rara jumaa Alatala. 15 Naupawee ane to poma neparahaya hi Yesus ee mai mingki mogaa, palele'imi mogaa. Apa hante kajadia ewa ee, balailo ba bangkele to neparahaya hi Yesus ee mai momami natehoo hante tipana noncamoko, apa Alatala nangkio komi bona matuwu mohingkabelo komi. 16 Poma ncanimi napa mei to madupa. Baka mamala komi bangkele to neparahaya mangkeni balailomi rapakahalama. Wee moto mui komi balailo to neparahaya, baka mamala komi mangkeni bangkelemi rapakahalama.
Matuwu ewa pamulanata laikio Alatala nawali todea-Na
17 Kapolaana butu tauna kana batena moto'i matuwu ewa to laipakatantu-Na amimi Pue hi hia lako pamulana'i laikio Alatala nawali todea-Na. Eemi atura to laipatudukaku hi humawee jumaa. 18 Ane naria lako hi komi to laitinimi kapomana laikio Alatala nawali todea-Na, nemo napehimukui molali tanda-tanda potinina ee mai. Wee moto mui ane naria to moma laitini tempo Alatala nangkio'i nawali todea-Na, nemo'i merapi ratini. 19 Apa laitini ba moma laitini, moma naria bununa. To nobunu, manturuhi humawee parenta Alatala aga. 20 Aji, butu tauna kana matuwu ewa pamulana'i laikio Alatala nawali todea-Na. 21 Ane laipobatuadapako tempomu laikio Alatala nawali todea-Na, wetumi mupekiri pampobatuako ee. Naupawee ane murata loga bona momamoko rapobatua, pakemi loga ee mai. 22 Habana tauna to laipobatuadipi tempona laikio Alatala nohangu rara hante Pue, kakonona tauna ee mai laibakaha Puemi. Wee mui tauna to moma laipobatua tempona laikio Alatala, hia ee mai batua Kristusmi. 23 Laiolimo komi pade olimi napumi laibayari. Etumo, nemopa komi mawali batua manuhia. 24 Ompi-ompi, butu tauna kana batena moto'i matuwu i tingoo Alatala ewa pamulana'i laikio Alatala nawali todea-Na.
Nangkambelai to poma noncamoko pade to noncamoko
25 Nangkambelai komi to poma noncamoko, moma naria parenta to laitarimaku lako hi Pue. Naupawee halaku tauna to mamala raparahaya habana pampakulea to laiwaika-Na'a Pue lako ahi rara-Na, ku'uli pampekiriku hi komi. 26 Iwei pampekiriku: Nampalinga kahehaa to nadupami tempo ei, nabelo laupi ane butu tauna batena moto'imi matuwu ewa katuwuna ami. 27 Ane nariapi bangkelemi, nemo mipogaaka'i. Ane poma komi nobangkele, wetumo komi mobangkele. 28 Naupawee moma komi madoha ane moncamoko komi. Wee moto mui ane hadua toronaa mobalailo, moma'i nadoha. Naupawee tauna to noncamoko kana mangkolo madea kahehaa rara katuwura. Pade dotaku moma komi mangkolo kahehaa ee mai. 29 Ompi-ompi, patuju raraku iwei: Momami nadea logata. Etumo butu tauna to nobangkelemi, nemo aga mampekiri bangkelena. 30 Tauna to nakeo habana najuu rarana, nemo aga mampekiri kajuu rarana. Pade tauna to nagoe, nemo aga mampekiri kagoena. Tauna to nangoli rewa, nemo aga mampekiri rewa to iolina. 31 Pade tauna to nouruhi uruhia i dunia ei, nemo aga mampekiri humawee uruhiana ee mai. Apa dunia to incanita ei momami mahae maronto. 32 To ipodotaku bona nemo mamere rarami rara katuwumi. Tauna to momara nobangkele, mampake logara mampobago bago Pue, apa mingkira mampakagoe rara Pue. 33 Tauna to naria bangkelera mampomaihi uruhia dunia ei, apa mingkira mampakagoe rara bangkelera, 34 alaana, pampekirira tauna ee mai matebagi-bagimi. Bangkele to momaramo nabalailoa pade toronaa, mampake logara mampobago bago Pue, apa mingkira mampopewai wotora bo inohara hi Pue. Bangkele to naria balailora mampomaihi uruhia dunia ei, apa mingkira mampakagoe rara balailora.
35 Humaweena lauria laiulikaku komi, bona mampatulungi komi, moma mampatagi komi mobabei hangu hangaa. Kakonona to ipodotaku bona moingku belo komi pade maloga komi mampobagoka Pue hante pekiri to moma matebagi-bagi.
36 Naupawee ane hadua balailo nampekiri momami nabelo ingkuna hi karohoana, bo karohoana ee mai nantambaimi katuanaa pade ipekirina mahipatoramo moncamoko, aginalau moncamokoramo. Ane iwee moma'i madoha. 37 Naupawee ane maria mui tauna to moma hema nampahuru'i pade nabulolimi rarana moma'i moncamoko hante karohoana, to laibabeina ee mai nabelo ane maroho rarana. 38 Aji, tauna to nampobangkele karohoana, nabelo ingkuna. Pade tauna to moma nampobangkele karohoana, nelabipi kabelo ingkuna.
39 Bangkele to nabalailoa moma'i mamala mobalailoki hante to ntanina. Naupawee ane mamatedimi balailona, mamala'i mobalailoki hante to laipokonona. Naupawee to napobalailo ee, kana tauna to neparahaya hi Pue. 40 Kakonona masana laupi katuwuna ane momami mobalailoki. Lauria pampekiriku moto. Naupawee laiparahayaku mui ane naria Inoha Alatala hi aku.