Nemo mangkeni uruhiami hi tauna to moma neparahaya hi Alatala
6
1 Bewa pade naria komi to nabia rau hi to pobotuhi to moma neparahaya hi Alatala, nampangaduka ompina hangu kaparahayaa habana naria pomehalapahara? Napa pade moma'i rau hi tauna to neparahaya hi Alatala? 2 Apa moma incanimi ane tauna to neparahaya hi Alatala mei mampabotuhi tauna i dunia ei? Aji, ane komidi mei to mampabotuhi tauna i dunia ei, napa pade moma ibukumi nampauruhi uruhiami to hodi moto etu? 3 Moma incanimi ane kita mei mampabotuhira malaeka? Ane iwee, kana tabuku mampauruhi uruhia to eo-eona rara katuwuata. 4 Aji, ane maria pomehalapahami, nemo mikeni hi tauna to moma neparahaya hi Alatala, to moma mahipato mampauruhi uruhia rara jumaa. 5 Patujuku nanguli ei bona maea komi. Apa naria moto komi to nanoto mampauruhi pomehalapahami hore ompi hangu kaparahayaa. 6 Molelau laikenimi ompimi hangu kaparahayaa rabotuhira tauna to moma neparahaya hi Kristusdi. 7 Naria pomehalapahami hore komi aga, kakonona nadagimo komi, apa ingkumi etu moma nahipato rababeira tauna to neparahaya hi Kristus. Aginapi rabagiu ba rapakarugi komi. 8 Naupawee komi motomi to nebagiu pade nampakarugi tau ntanina. Pade ingkumi ee mai laibabeimi hi ompimi hangu kaparahayaa! 9 Apa moma laincanimi ane tauna to moma nanoro ingkura momara mamala mawali todea i rara poparentaa Alatala? Nemo komi mahalatara. To pogau hala, to nepue ntani, to pebualohi bo to peago, balailo to nakabangkelea to moma natimotoa ingkura, balailo to nampogau balailo,a 10 to pangio, to naliu ganta, to nalangu, to nepakudaa pade to pebagiu momara mamala mawali todea i rara poparentaa Alatala. 11 Ilodo naria bahangkua dua lako hi komi noingku ewa ee. Naupawee laipakagahamo komi lako dohami pade nawali todea Alatalamo komi. Laipemakono-Namo komi Alatala habana peparahayami hi Pue Yesus Kristus hante baraka Inoha Alatalata.Nemo mogau hala
12 Naria komi to nanguli ane mamalata mobabei hangu hangaa. Naupawee ane aku, moma humaweena nobunu. Aji naupa mamala'a mobabei hangu hangaa, naupawee moma'a madota napobatua hangu hangaa. 13 Naria mui komi to nanguli pangengko to iwei, “Konia rapake mokahini tai liko, pade tai liko nakahini konia, pade konia bo tai liko ee mei Napakaronto Alatala. Aji, moma mongkua ane dota-dotata mobabei hangu hangaa i wotota.” Kakonona, moma iwee. Woto manuhia moma mamala rapake mogau hala, naupawee rapake mampemabohe Pue aga, pade Puemi to nampiara wotota. 14 Alatala to nampakatuwu nculi Pue lako kamatea-Na, Hia mui mei mampakatuwu nculita hante baraka-Na. 15 Apa moma incanimi ane wotomi etu bagia lako woto Kristus? Apa mamala kuala bagia woto Kristus pade kupake mogau hante bangkele to nobalu wotona? Moma maria hangkania kubabei ewa ee. 16 Incanimi motomi ane hema to nogau hante bangkele to nobalu wotona nawali hangu wotomi hante bangkele ee mai. Apa naria laitulihi rara Buku to Nagaha nangkambelai to poncamoko iwei, “Roduara ee mawali hangu wotoradamo.” 17 Naupawee hema to nampopewai wotona hi Pue, inoha tauna ee nopahangu hante inoha Pue. 18 Nemo mpuu komi mogau hala. Humawee doha ntanina to laibabei tauna, nampakaheha tau ntanina. Naupawee tauna to nogau hala, ingkuna ee nampakaheha wotona moto. 19 Apa moma incanimi ane wotomi etu hou to laipo'ohai Inoha to Nagaha? Inoha to Nagaha no'oha i rarami. Alatala motomi to nampawaika komi Inoha to Nagaha ee mai. Aji, wotomi moma komi tumpuna, naupawee Alatala tumpuna. 20 Apa kakonona laioli-Namo komi Alatala pade napumi laibayari-Na. Etumo, pemabohemi Alatala hante wotomi.