Doha rara jumaa
5
1 Laiepekumi kareba ane naria lako hi komi to nogau hala. Pogau hala ee mai nelabi kadaana, apa naria to nampolairi awona moto, bangkele tuamana. Moma mui iwee ingkura tauna to moma nangincani Alatala. 2 Iweemi ingkumi, nahombo muidapa komi. Kakonona, majuu rarami pade mipopalai tauna to nogau hala ee mai lako lentongomi. 3 Aku ei, wotoku na'awa lako hi komi. Naupawee raraku dohemi i ritu. Laibotuhikumi, tauna to nogau hala etu kana rahuku. 4 Aji, tempomi mahiromu mantuku dota Pueta Yesus, raraku mui mahiromu hingkani-ngkani hante komi. Tempo ee mei, hante baraka Pueta Yesus, 5 tauna to nogau hala etu kana tapopewai hi Magau Heta, bona naupa rapakaropu wotona, inohana rapakahalama moto'i tempo karata nculi Pueta Yesus. 6 Moma komi mahipato mampolinga wotomi. Laincanimi motomi batua pangengko to laiuli iwei, “Ragi to hodi nampopewoke humawee labu gando to napumi laigonta.” 7 Tadimi ragi to nahae, etumi ingkumi to nadaa to nampakadoha komi, bona komi mawali labu gando to nabou to moma lairagii. Laincaniku ane nagahamo komi lako ingku to nadaa habana Kristus namate nampatolohi dohata. Kristus ee mai nahibali hante bimba to laipatehi tempo eo bohe Paskah to Yahudi. 8 Aji nemotapa mobabei doha pade ingku to nadaa, apa ee mai nahibali hante mobabei huha Paskah to Yahudi hante roti to laibolii ragi to nahae. Maitamo matuwu hante kalori rarata pade moingku to manoro, apa ee mai nahibali hante mobabei huha Paskah to Yahudi hante roti to moma lairagii.9 Rara huraku to laipakatuku ilodo, laitulihikumi hi komi bona nemo komi mampodohera to nogau hala. 10 Patujuku, tauna to moma amira nangincani Alatala naupa nogau halara, naliu ganta, nebagiu pade nepue ntani, moma mongkua mipodohe. Apa ane momara mipodohe, natantu amimi kana mehuwu komi lako dunia ei. 11 Naupawee, patujuku notulihi hi komi, bona tauna to nangaku ompi hangu kaparahayaa pade nogau hala, naliu ganta, nepue ntani, nepakudaa, nalangu pade nebagiu, nemora mipodohe. Tauna to noingku ewa ee mai, nau mangkoni aga nemora mipodohe. 12 Moma uruhiaku mampabotuhira tauna to momara ompi hangu kaparahayaa. Naupawee ane tauna to nawali jumaami, komimi to kana mampabotuhira. 13 Alatala moto to mampabotuhira tauna to momara ompi hangu kaparahayaa. Rara Buku to Nagaha laitulihi iwei, “Popalaira tauna to nadaa ingkura lako lentongomi.”