Muntu Pue aga to pebotuhi
4
1 Aji, kami ei kana mihilo halaku batua-batua Kristus to laiparahaya Alatala nangkarebai liwo-Na to ilodo laipopalerui-Na hi manuhia. 2 Koropokona ratuntu lako hi kami batua ei mei, bewa kami mamala raparahaya. 3 Ane aku ei, moma mongkua ane komi ba to ntanina mampabotuhi'a. Pade aku mui, moma kubotuhi wotoku moto. 4 To laincaniku moma naria kahalaaku rarana hangu hangaa. Naupawee moma ee to nampemakono'a. Pue aga to mampabotuhi, nahala'ada ba moma. 5 Etumo, nemo mebotuhi ane poma tempona. Tempo pebotuhia ee mei, ane marata nculidimi Pue Yesus. Apa Pue mei mampakarawa humawee to nateleru rara kalimauana pade mohungke humawee patuju rara manuhia. Tempo eedimi mei pade butu tauna mantarima peune lako Alatala.Ingku Paulus pade Apolos mahipato ratukura to Korintus
6 Ompi-ompiku hangu kaparahayaa, to laiuliku lauria nangkambelai wotoku moto pade Apolos bona mantulungi komi. Patujuku, bona mamala komi mampenau kami pade mipaha napa batuana to laiuli iwei, “Nemo meliu lako to laitulihi rara Buku to Nagaha.” Bona nemo komi mahombo hampena mampolinga hadua to pangkenimi pade to pangkenimi ntanina mihalai. 7 Apa hema to nanguli ane nelabipa komi lako to ntanina? Apa moma hangu hangaana laitarimami lako Alatala? Aji, ane humawee to naria hi komi laiwaika Alatala moto komi, napa pade laipolingami wotomi? 8 Moma amimi naria to laiparaluumi, apa nahugimo komi pade noparenta ewa magau, bo kami moma. Nabelo laumi ane nawali magaupa komi bona mamala kami moparenta hingkani-ngkani hante komi. 9 Apa ane popantaruiku, kami rasul ei laibabei Alatala ewa tauna to moma naria bununa, nahibali hante tauna to rahuku mate. Kami ei nawali tauna to laidulu rono dunia ei, belo manuhia, belo malaeka. 10 Kami laiuli nadoyo, apa neparahaya kami hi Kristus. Naupawee komi nataualu habana Kristus. Kami nalente, komi naroho. Kami laipopore, komi laiune. 11 Duu welau ei naoro tai kami, nabai wuu kami, moma naimpo powaru kami, laiduahi pade moma natantu katidaa kami. 12 Nobago ntomo kami nampali pangkoni kami. Ane kami laipopore tauna, laibalahi kami hante namperapikara rahi hi Alatala. Ane laiduahi kami, nohabara moto kami. 13 Ane laipakudaa kami, laiulika belo kami motora. I dunia ei, kami laiuli rumpu pade rewa to moma naria bununa, duu welau ei.
14 Lauria laitulihikaku komi halaku pekamaroku hi komi to laipowaliku ana-anaku to laipotoweku. Moma patujuku mampakaea komi. 15 Apa nau ncobuna gurumi to nampatudukii komi nangkambelai Kristus, moma nadea to nawali tuamami. Aku nawali tuamami, apa akumi pamulana noparata Kareba Belo hi komi hampena neparahaya komi hi Kristus Yesus. 16 Etu pade laiperapiku mpuu hi komi bona mituku ingkuku. 17 Pade laituduku mui Timotius to laipowaliku anaku to ipotoweku pade natigu hi Pue tulau hi komi, bona napalingai komi bewa ingkuku hangka neparahaya'apa hi Kristus Yesus. Ingku to ewa eemi to laipatudukaku hi humawee jumaa to laikarataiku.
18 Naria bahangkua dua lako hi komi to nawali nahombo apa iulira hira, moma'amo marataki hi komi. 19 Naupawee ane Napodota Pue, moma'amo mahae tulau mantako komi. Ane marata ritu'adamo pade kuhilodi napa to mamala rababeira tauna to nahombo etu, nemo-nemo mei nalangko jaritara motodi. 20 Apa ane hadua tauna nawali todea rara poparentaa Alatala, moma laihilo lako jarita to laiulina, naupawee laihilo lako ingkuna. 21 Aji, pelihi motomo komi napa to mipodota! Tulau'a mopatudu komi hante hodokudi, ba tulau'a hante towe bo belo rarakudi?