Hura Paulus karongkanina rau hi jumaa i Korintus
Popailodoa
Hura ei mai laitulihi Paulus rau hi jumaa i Korintus. Korintus ee mai hangu ngata bohe i propinsi Akhaya to ilodo laiparenta Magau Bohe Roma. Tempo ee mai, Korintus laincani apa nadea mpuu to podaga lako humangkulili dunia nobalu rewa-rewa to nahuli olina i ria. Nadea tauna narata nobalanca i Korintus pade nepue hi Afrodite, dewi pohintaa to Yunani, pade nagoe-goe hante ingku to moma nahipato. Tempo ei, Korintus ee nehua bagia tana Yunanimi.
Paulusmi to pamulana ntoto nangkarebai Kareba Belo i Korintus (Kis. 18:1-17). Nehuwupi Paulus lako Korintus, narataramo bahangkua dua guru to moma nakono i Korintus. Hira ee mai nanguli ane Paulus moma'i nakono rasul Kristus. Pade iulira mui wetumi raepe patudu Paulus. Nangepe kareba lauria, Paulus notulihi hura pade laituduna Titus dohe hampobagoana nangkeni hurana ee rau hi jumaa i Korintus. Hura to laikeni Titus ei mai narontomi. Rara hurana ee Paulus nampalingaira tauna to nobabei kahalaa, hampena hura ee mai nampakadua rarara jumaa i Korintus, ewa to laiuli Paulus rara 2Kor. 2:3-4 pade 7:8-13.
Nanculipi Titus lako Korintus, laikewona hi Paulus ane nadea to neparahaya hi Kristus i Korintus, nobali nculimi pampekirira nangkambelai Paulus, pade nalentoraramo mingki motomu hante Paulus. Naupawee naria moto muira to nakoo rarara pade nalohera nangepe patudu Paulus apa iulira hira, Paulus ee moma'i rasul Kristus.
Nangepe to iuli Titus lauria, Paulus notulihi hura ei to laiulita hura Paulus to karongkanina rau hi jumaa i Korintus. Rara hurana ei, Paulus nampotutura bagona nangkarebai Kareba Belo. Iulina mui bewa pampotowenara to Korintus, pade kagoe rarana nangepe kareba ane nancororamo lako dohara. Rara hurana ei mui Paulus namperapi hi hira to Korintus bona rapadolara moto mopahiruru doi petulungi to rapakatuka ompi-ompi hangu kaparahayaa i Yerusalem. Laitulihina mui pekamarona hi tau-tauna to moma nadota namparahaya'i halaku rasul Kristus.
Ihi buku ei
1. Tabe pade peune Paulus (1:1-11)
2. Bago Paulus halaku batua Alatala to noparata Kareba Belo hi to Korintus (1:12–7:16)
3. Popahiruru doi petulungi to rapakatukara ompi hangu kaparahayaa i Yerusalem (8:1–9:15)
4. Paulus nampotolawai wotona halaku rasul Kristus pade nampakamarora to moma nantarima'i (10:1–13:10)
5. Tabe kahuduana (13:11-13)