Patudu kahuduana.
13
1 Ei mai katolu ngkanina'amo tulau mantako komi. Rara Buku to Nagaha laitulihi iwei, “Butu uruhia kana rahabiti rodua ba tolu dua habi pade mamaladi rabotuhi.” 2 Tempoku narata karongkanina ritu dohemi, laipalingaiku amiramo to ilodo wengi nobabei doha pade tau ntanina bona mentuuramo mobabei doha. Welau ei, naupa nohingka'awata, kupalingai nculi mui komi bona ane marata nculi'a ritu dohemi, humawee to nadoha kana kuhuku. 3 Kubabei ewa ee, apa nerapi tanda komi ane nakono aku ei mpuu-mpuu laitudu Kristus nojarita ba moma. Mihilodimi mei ane ritu'apa dohemi. Moma komi mei Napengkorui Kristus, naupawee Napahiloi mpuu komi mei baraka-Na. 4 Nakono ami tempo Yesus laisalib, nalente-'I. Naupawee natuwu nculi-'I habana baraka Alatala. Wee moto mui kami, nalente kami habana nohangu rara hante Kristus, naupawee ane marata kami mei ritu dohemi, mihilo motomi mei roho to laiwaika-Na kami Alatala hingkani-ngkani hante Kristus.5 Pareha motomi wotomi, natuwu halaku tauna to neparahayada komi ba moma? Pareha belo wotomi bona manoto mincani, nariadi Kristus Yesus no'oha i rarami ba moma? Apa ane moma naria Kristus i rarami, batuana moma komi tauna to mpuu-mpuu neparahaya hi Kristus. 6 Naupawee laiharumakaku, bona mincani ane kami ei tauna to mpuu-mpuu neparahaya hi Kristus. 7 Nohambaya kami hi Alatala, bona nemo komi mobabei to nadaa. Patuju kami, bona batena moto komi moingku manoro, moma bona mampakanoto ane kami ei tauna to mpuu-mpuu neparahaya hi Kristus. Ane manorodimi ingkumi, moma mongkua ane maria tauna manguli ane kami ei moma tauna to mpuu-mpuu neparahaya hi Kristus. 8 Apa moma kami mamala mobabei napa-napa mampaewa to nanoro. To mamala kibabei, mampahuko to nanoro aga. 9 Moma nongkua nalente kami. Ane naroho komi, nagoemo kami. Nohambaya kami, bona mabelo pura ingkumi. 10 Etu pade laitulihiku hura ei hi komi tempona poma'a ritu dohemi. Bona ane marata'a mei ritu dohemi, moma'a mahodo mantuku baraka to laiwaika-Na'a Pue. Baraka ee laiwaika-Na'a Pue bona mamala'a mampatulungi komi, moma mampakagero komi.
Tabe kahuduana
11 Kahuduana ompi-ompiku, kagoemo pade pehimukuimi bona humawee ingkumi mabelo. Pairara humawee patuduku. Mohangu rarahawo pade matuwu mohingkabelo hante to ntanina, bona Alatala puu towe pade katuwu to nanone mampodohe komi.
12 Pometabe komi hante towemi hadua bo hadua halaku to po'ompi.a Tabe hi komi pura lako humawee todea Alatala.
13 Mohambaya'a bona kabohe towe lako Pue Yesus Kristus, towe lako Alatala pade Inoha to Nagaha mampodohe pura komi.