Paulus nampotutura napa to laipahiloi Pue hi hia
12
1 Kana kupolinga wotoku moto naupa moma naria bununa. Aji, ku'uli olu napa to laipahiloi bo laipakarawa Pue hi aku. 2 Naria hadua tauna to laincaniku. Tauna ee mai to neparahaya hi Kristus. Hampulu opo mpae to naliu, tauna ee laiongko rau i huruga katolu uncuna. Moma laincaniku, hante wotonadi laiongko rau huruga, ba inohana motodi. Alatala aga to nangincani. 3 Ewa to laiulikumi, laincaniku tauna ee. Naupawee, moma incaniku, hante wotonadi laiongko rau huruga, ba inohana motodi. Alatala aga to nangincani. 4 Tauna ee mai ngkali laiongko rau Firdaus pade laiepena baha-baha to moma nateuli pade moma mamala rauli manuhia. 5 Dotaku, tauna ee to kupolinga, moma wotoku. To kupolinga nangkambelai wotoku humawee kalenteku aga. 6 Kakonona ane mingki'a mampolinga wotoku moto, moma'a moingku ewa to nadoyo, apa napa to ku'uli ee mpuu-mpuu nakono. Naupawee moma'a madota mobabei ewa ee, bona nemo maria tauna mampaune'a habana napa to laipolingaku ee. Aginapi raunera'a habana napa to laihilora i rara katuwuku bo napa to laiepera lako hi aku. 7 Pade laiwaika'a kahehaa to ewa rui nampatohu wotoku bona nemo'a mahombo hante pehiloa-pehiloa to moma naria hibalina. Kahehaa ee mai ewa hadua huro Magau Heta nampahehaki'a bona nemo'a mahombo. 8 Nangkambelai huro Magau Heta ee mai, tolu ngkani'amo nohambaya hi Pue bona malai'i lako hi aku. 9 Naupawee, Pue nampahonoi'a iwei, “Naganami kabohe towe-Ku hi iko, apa tempomu nalente, lairasaimu mpuu karoho baraka-Ku rara katuwumu.” Etu pade pokonokupi nampolinga kalenteku apa ane nalente'a lairasaiku mpuu roho baraka Kristus nampatulungi'a. 10 Aji bonau nalente'a, nagoe moto raraku. Nagoe moto mui'a ane habana Kristus aku laipakudaa, laihehaki, laiduahi pade lairumpa kahehaa. Apa ane nalente'a, naroho lau'a.Kamere rara Paulus
11 Mpuu-mpuu nojarita ewa to nadoyo'amo aku ei, nampolinga wotoku moto. Komi to nobabei hampena ewa ei'a. Kakonona komi to kana mampaune'a. Apa nau moma naria bunuku hodia, moma'a nadagi hante hira to iulimi rasul bohe etu. 12 Tempoku ritu dohemi, laibabeiku tanda-tanda to nampakanoto ane aku ei mpuu-mpuu rasul Kristus. Nohabara'a nobabei tanda-tanda to nepakahera pade kajadia-kajadia bohe hante baraka lako Alatala. 13 Hangaa aga to moma laibabeiku hi komi naupawee laibabeiku hi jumaa ntanina, moma komi laipakahehaku nampaongkohoni'a. Iulimi komi nahala'a ane moma komi kuperapi mampaongkohoni'a? Ane nahala'a, merapi ampu'a.
14 Ei mai katolu ngkanina'amo tulau mantako komi, pade moma'a madota mampakaheha komi. Habana moma doimi to laipaliku naupawee mingki'a mantulungi komi. Apa moma hira ngana to kana mampali kaparalua totuara, naupawee totua to kana mampali kaparalua ana-anana. 15 Etu pade hante goe raraku laipopewaiku hi komi humawee napa to naria hi aku. Moma wuwu ee, wotoku mui laipopewaiku. Ane wee katoweku hi komi, napa pade hodi moto towemi hi aku?
16 Aji, natantumi ane nahitujumo komi moma'a nampakaheha komi. Naupawee, naria mui to nanguli ane aku ei nadea akalaku pade nadea kauntua lairataku lako pebagiuku. 17 Apa nariara to laihuroku nangala kauntua lako hi komi pade laiwaikara aku? 18 Laihuroku mpuu Titus hante ompita hangu kaparahayaa etu mai tulau hi komi. Apa naria'i Titus nangala kauntua lako hi komi? Apa moma aku pade Titus nahibali moto pekiri bo patuju kami pade nahibali mui pobago kami? 19 Ba nahaemidi laipekirimi ane kami ei nampehimukui nampotolawai woto kami i tingoomi? Ompi-ompi to laipotoweku, nahala pampekirimi! Laincani-Na moto Alatala ane humawee to laiuli kami lauria, laiuli kami habana nohangu rara kami hante Kristus. Humawee to laibabei kami, bona mampakaroho peparahayami. 20 Namere raraku, nemo-nemo mei ane marata'a ritu, moma komi ewa to laiharumakaku pade aku mui moma'a ewa to laiharumakami. Nemo-nemo mei maria komi to mohihala, to momepohirii, to mahodo, to mampomaihi wotona moto, to mepakudaa, to mangkeni jarita, to mahombo pade to mobabei pogehoa. 21 Namere mui raraku, nemo-nemo mei ane marata'a ritu, Alatala mampakaea'a i tingoomi pade madua raraku apa madea lako hi komi to naliu-liu wei nobabei doha, pomara nancoro. Pomara nentuu nobabei ingku to nadaa, nogau hala pade nobabei ingku to moma natimotoa.