Paulus moma nahibali hante rasul-rasul to moma nakono
11
1 Ompi-ompi, kuperapi bona mohabara komi olu mangepe'a mojarita ewa to nadoyo. Laincaniku ane nohabara amimo komi hi aku. 2 Nohiri'a nampekiri komi, ewa pohiri Alatala moto. Komi etu mai lairapaika hadua toronaa to poma'i nambela balailo, to laitipakumi ranika hante hadua balailo to laikahangai Kristus. 3 Naupawee, naeka'a nemo-nemo mei pampekirimi rapahalatara hampena momamo komi matigu bo mampotowe Kristus hante rarami mpuu, ewa Hawa owi, nahalatara habana laipatiwoo ule hante kamomi pojaritana. 4 Apa laihiloku moma'i napa iulimi ane naria tau ntanina narata hi komi nangkarebai Yesus to nontani lako to laikarebai kami. Pade nadota mui komi nantarima inoha pade kareba belo to nontani lako to laikarebai kami. 5 Naupawee, mantuku pampekiriku, tau-tauna to iulimi rasul bohe etu, momara nelabi lako hi aku. 6 Moma ami'a nataualu nojarita i tingoo todea, naupawee nadea ngaa to laincaniku nangkambelai Kareba Belo. Ee mai laihilomi motomi rara hangu hangaa to laibabei kami.7 Tempoku noparata Kareba Belo lako Alatala hi komi, moma naria to laiperapiku hi komi. Hante iwee, aku motomi nobabei hampena wotoku moma mahipato rabila. Lauria laibabeiku bona rabila komi. Iulimi komi, to laibabeiku ee nahala? 8 Pangkeniku Kareba Belo hi komi, jumaa-jumaa ntanina to nampaongkohoni'a. Mamala rauli, hira to ipakarugiku bona mamala'a mantulungi komi. 9 Pade tempoku no'oha dohemi, ane makakuraa'a moma komi naria haduaa laipakahehaku. Apa napa to nakura hi aku, laipakaganara ompita hangu kaparahayaa to narata lako propinsi Makedonia. Rarana hangu hangaa laijagaiku moto bona nemo'a mampakaheha komi, pade batena moto oa kubabei ewa ee. 10 Moma hema haduaa i propinsi Akhaya to mamala mampatagi'a mampolinga ingkuku ee mai! Napa to iuliku lauria nakono, apa patudu Kristus to nakono naria i raraku. 11 Napa pade iuliku ewa ee? Ba iulimi komi, moma komi potoweku? Laincani-Na moto Alatala ane laipotoweku komi!
12 Batena moto'a moma merapi napa-napa lako hi komi, bona nemo maria logara tau ntanina etu mampolinga wotora pade mangaku ane hira ee nahibali hante kami. 13 Apa tauna etura mai, bagora nebagiu aga pade nangaku rasul Kristus, bo momara rasul mpuu. 14 Wetumi rapohera ingkura lauria, apa Magau Heta mui namala nobali wotona ewa malaeka to nangkeni kabaa. 15 Aji, moma muita mahera ane to nampobagoka Magau Heta mui nangaku tauna to nampobagoka Alatala. Kahuduana mei kana ratarimara pebalahia lako ingkura to nadaa ee mai.
Paulus nampolinga kahehaana
16 Hangkanipi ku'uli, nemo miuli ane nadoyo'a. Naupawee, ane kana miuli nadoyo'a, palele'amo to nadoyo ei mai mampolinga muikuwo hodi wotoku. 17 Aji, ane kupolinga wotoku moto, moma Pue to nantudu'a nojarita naupawee ee mai laibabeiku halaku tauna to nadoyo. 18 Nadea tauna nampolinga wotora moto habana napa to laibabeira hante karohora moto. Iwee moto mui aku, mingki kupolinga muikuwo wotoku. 19 Apa hiloana nagoe moto komi hi tauna to nadoyo, apa pekirimi nataualu komi. 20 Laipalelemi moto tauna nampobatua komi, nampapu komi, nampali kauntua hi komi, nahombo hi komi, pade nampahapa komi. 21 Nakono ami, ane rapahibali hante hira ee mai, nalente kami, apa moma ibuku kami nobabei to ewa ee. Pekirimi komi, maea kami ane moma kibabei ewa ee?
Ane tau ntanina nabia nampolinga wotora moto, mabia moto mui'akuwo mampolinga wotoku moto. Aku ei nojarita ewa to nadoyo'amo! 22 Ane raulira to Ibranira, aku mui to Ibrani. Ane raulira to Israelra, aku mui to Israel. Ane raulira muli Abrahamra, aku mui muli Abraham. 23 Ane raulira to nampobagoka Kristusra, pelabi-labinapi aku. Nojarita ewa to gila'a ei! Neliupi kalengeku lako hi hira, naharo'apa laitarungku, pade naharo'apa laiduahi, pade nadea ngkani'a ke nono mamate. 24 Alima ngkani'a laihuku cambura to Yahudi. Butu ngkanina'a laihuku cambu, tolu mpulu hahio mbela. 25 Tolu ngkani'a laiweba to poparenta Roma hante lua kau, hangkani'a ke nono mamate laiwunu hante watu, tolu ngkani kapala to laihawiku natala i tahi, pade haeoa hamengia'a nolumanto i tahi. 26 Nadea ngkani kahehaa namparumpa'a i rara pomakoaku. Naria ue mowo, naria to perampaki, pade naria'a laihehakira to Yahudi bo to moma Yahudi. Lairataku kahehaa i ngata bohe, i tongo mpada, i lentongo tahi, pade kahehaa to laibabeira tauna to nangaku ompi-ompi hangu kaparahayaa, bo momara nakono to neparahaya hi Yesus. 27 Napepa iepeku nobago ntomo, nadea ngkani'a moma noturu, naoro bo nabai wuuku, nadea ngkani'a nakakuraa pangkoni, nakolu bo moma nagana waruku. 28 Moma wuwu ee, butu eona muipi namere raraku nampekiri humawee jumaa i butu ngata. 29 Ane maria ompi-ompiku hangu kaparahayaa to malente, aku mui namparasai kalentera ee mai. Ane maria tauna to mampakadoha tau ntanina, hante aku mui nadua raraku nampekirira.
30 Ane kana kupolinga wotoku moto, to kupolinga nangkambelai hangu hangaa to nampopahiloi ane aku ei manuhia to nalente moto mui'akuwo. 31 Alatala, Tuama Yesus Kristus Pueta, to laiune duu kahae-haena, nangincani ane moma'a nokalowo. 32 Tempoku i Damsyik, gubernur to laiongko Magau Aretas i ria, nantudu tantarana nampodoo womo pehuaa i rara ngata bona rahokora'a. 33 Naupawee, bahangkua dua ompi hangu kaparahayaa nopahua'a i rara karanci to nabohe, pade laiulura'a rau hawaliku ngata lako wulou to naria i wala ngata. Iweemi hampena moma'a namala laihoko gubernur ee mai.