Paulus nampotolawai bagona halaku rasul
10
1 Ompi-ompi, naria tauna ritu nanguli naeka'a nojarita ane nonetingohi hante komi, naupawee nabia'a nojarita ane nohingka'awa'a hante komi. Aji, hante kadoleku bo kabelo raraku to nahibali hante kadole bo kabelo rara Kristus moto, aku Paulus mampalingai 2 pade mamperapi mpuu hi komi nemo hampe kupahiloi kabiaku mojarita ane marata'a mei hi komi, apa noliwo ami'amo mangulika poo bahangkua dua lako hi komi to nanguli ane kami ei natuwu nantuku dota dunia. 3 Nakono natuwu i duniadapa kami, naupawee moma kami nampaewa to nadaa nantuku kabiahaa manuhia i dunia ei. 4 Apa parewa to laipake kami nohiwali moma parewa lako dunia, naupawee parewa lako baraka Alatala, hampena namala kami nampadagira bali kami, nau bewa karohora. Laidagi kami akalara bali kami 5 pade laipakaropo kami bente to laibabeira hante kahombora to nampalawa tauna mangincani Alatala. Laidagi kami mui humawee pampekiri to nampaewa patudu nangkambelai Kristus, hampena notingkodura i tingoo Kristus. 6 Ane mpuu-mpuu matundupa komi hi Kristus, nahadiamo kami mampahuku humawee tauna to moma natundu.7 Ompi-ompi, hilo belo ka'adaa to laitingohimi. Ane maria tauna manguli hia mpuu-mpuu hadua lako todea Kristus, kana nalinga ane kami mui todea Kristus, nahibali hante hia. 8 Ane laipekirimi nelabi gaga jaritaku nampolinga baraka to laiwaika-Na kami Pue, moma'a maea. Apa baraka etu laiwaika kami bona mampakaroho peparahayami, moma mampakagero peparahayami, 9 bona nemo rauli aku nampaekai komi hante hura-huraku. 10 Naria ami tauna nanguli ane hura-huraku natada pade nemoho, naupawee ane nonetingohi, nalente'a pade pojaritaku moma naria bununa. 11 Tauna to nanguli lauria kana manoto rarara, ane marata kami mei hi komi ingku kami mahibali aga hante to laitulihi kami rara hura-hura kami tempota nohingka'awa.
Panguli Paulus nangkambelai katoa pobagoana
12 Moma ami kami mabia mopahibali woto kami hante tauna to nampaune wotora moto. Hira ee mai neliu kadoyora, apa laipantaruira wotora hante pampekirira moto. 13 Moma kami nahibali hante hira, apa moma kami madota mampolinga bago kami meliu lako katoa pobagoa to laipakatantuka-Na kami Alatala. Komi mui nehua rara pobagoa kami. 14 Moma kami nobago nampaliu katoa pobagoa kami. Ane ke poma kami naria narata hi komi, natantu ami lailiu kami katoa pobagoa kami. Naupawee kamimi to pamulana narata hi komi nangkarebai Kareba Belo lako hi Kristus. 15 Moma kami nampolinga woto kami moto habana bago tau ntanina to laipobagora i hawaliku katoa to laipakatantu Alatala hi kami. Naupawee kiharumaka mantambai karoho peparahayami hi Kristus, hampena mantambai mui kaluo pobagoa kami hi komi. 16 Ane wee, mamala kami mangkarebai Kareba Belo i ngata-ngata to na'awa lako ngatami pade moma kami mampolinga wua lako bago tau ntanina i ngata to laitudoka hi hira. 17 Rara Buku to Nagaha laitulihi iwei, “Nemo mupolinga wotomu moto. Pue aga to kana mupolinga.” 18 Apa tauna to laitarima Pue, moma tauna to nampaune wotona moto, naupawee tauna to laiune Pue.