Nangkambelai popalimpuru doi pewai
9
1 Kakonona, momamo komi kutulihika nangkambelai pewai hi todea Alatala i Yerusalem. 2 Ncanikumi kalori rarami. Etu pade laipolingaku komi i tingoora to Makedonia, pade iuliku iwei, “Lako mpae to naliuramo to Akhaya nahadia hante pewaira.” Nadea tauna naroho wukura nampahilo kalori rarami etu mai hampena mingki muirahawo mewai. 3 Laihuroku Titus hante rodua ompita hangu kaparahayaa etu tulau hi komi, bona napa to laipolingakaku komi, nemo rauli kalowo moto. Aji, kabelo-belona mahadiamo komi hante pewaimi, apa iulikakuramo ane nahadiamo komi. 4 Nemo mei maratara to Makedonia hingkani-ngkani hante aku, poma komi mahadia. Maea kami mei, apa bela iuli kamimi ane nahadiamo komi hante pewaimi. Moma wuwu kami to maea, komi mui maea. 5 Etu pade laihurokura Titus hante ompita to rodua etu mampoilodoka'a, bona rauruhira ami pewai to laitipamimi. Hante iwee, nanotomi rahilo ane pewaimi ee mai laipopewaimi hante kalori rarami, moma laipopewaimi hante pokahurumi.Newai hante goe rara nangkeni nadea rahi
6 Linga belo komi baha to nanguli iwei: Tauna to nohawu hodi, hodi moto mui pae nasangki, pade tauna to nohawu nadea, madea mui pae nasangki. 7 Butu tauna kana mewai hante kalori rarana, nemo mewai hante dua rara ba habana laipahuru, apa Alatala nampotowe tauna to newai hante goe rarana. 8 Alatala nabaraka mampawaika komi rahi hampe melabi-labi, bona magana moto oa kaparaluami. Hante iwee, mamala komi mobabei madea ngaa bago to nabelo mantulungi tau ntanina. 9 Rara Buku to Nagaha laitulihi iwei,
“Laitira-tira-Na rahi,
laiwaika-Na hi to netowei.
Belo rara-Na moma naria kahuduana.”
10 Alatala to nopahadia hawua hi to pohawu pade pangkoni hi kita. Hia mui kana mampatambaiki napa to naria hi komi, bona mantambaiki kadea pewaimi hi tau-tauna to namparaluu. 11 Alatala mei mampawaika komi rahi rarana hangu hangaa, bona mamala komi mewai oa hante kalori rarami. Pade tempo kami mampopewai doi pewaimi etu hi todea Alatala i Yerusalem, madea tauna mosukuru hi Alatala. 12 Apa bago belo to laibabeita hante pewaita ei, moma aga mampakagana kaparaluara todea Alatala i Yerusalem, naupawee madeaki mui tauna to mosukuru hi Alatala. 13 Pade lako belo rarami to laihilo rara bago belo ei, todea Alatala i Yerusalem mampaune Alatala habana nampahilo katigu rarami nampoingkuka patudu Kareba Belo nangkambelai Kristus to laiparahayami. Raunera mui Alatala habana nabelo mpuu rarami notira napa to naria hi komi hi hira pade hi tau ntanina. 14 Aji, rahambayanira komi mei hante towe rarara apa nabohe mpuu towe Alatala hi komi. 15 Maita mosukuru hi Alatala, habana pewai-Na to momami nateuli.