Nangkambelai pewai hi todea Alatala i Yerusalem
8
1 Ompi-ompi, dota kami bona mincani nangkambelai kabohe towe Alatala to laipopewai-Na hi jumaa-jumaa i propinsi Makedonia. 2 Tempora laipehori hante nadea ngaa kahehaa to nantomo rara katuwura, neliu mpuu kagoe rarara. Naupa netowei mpuu katuwura, nangaa moto oa rarara newai hi tau ntanina. 3 Laihiloku motoramo newai. Momara newai wuwu nantuku pakuleara, naupawee neliu lako pakuleara. 4 Hante kalori rarara moto, perapira mpuu hi kami bona mamala muirahawo mewai hi todea Alatala i Yerusalem. 5 To laipopewaira nelabi lako to laiharumaka kami. Pamula-mulana laipopewaira rarara hi Pue, pade hante dota Alatala laipopewaira mui rarara hi kami. 6 Etu pade laiperapi kami mpuu hi Titus bona tulau'i mampotomuka komi pade mopadola bago belo ei, apa hiami to nopamula. 7 Laitiroimo komi rarana hangu hangaa. Narohomi peparahayami, laincanimimi patudu to nakono, nataualumo komi nopatudu tau ntanina, nelabimi dotami nampatulungi kami pade nelabimi towemi hi kami. Wee moto mui rara bago belo ei, kana madea pewaimi.8 Aku nanguli lauria moma halaku parenta hi komi. Naupawee patujuku nangulika komi nangkambelai pewai tau ntanina, bona mamala kuhilo bewa kabohe towemi. 9 Apa laincanimimi bewa kabohe towe Pueta Yesus Kristus. Naupa nahugi-'I, laibakaha-Na humawee kahugia-Na ee bona mamala-'I mantulungi komi. Hia nawali manuhia to netowei katuwu-Na bona komi mawali mahugi i tingoo Alatala.
10 Iwei popantaruiku nangkambelai popahiruru pewai hi jumaa i Yerusalem ee. Mpae to naliu, komimi to pamulana nampekiri bewa dalana mopahiruru doi petulungi ee mai, pade komi muimi to pamulana nopahiruru doi ee. 11 Aji, nabelopi mipahudu olu bagomi etu. Babeimi bago etu hante kalori rarami ewa kalori rarami to pamulana, pade popewaimi mantuku pakuleami. 12 Apa ane malori rarami mewai, napa to laipopewaimi ratarima. Apa pewaimi ee mai nantuku napa to naria hi komi, moma nantuku napa to moma naria hi komi. 13 Apa komi laipakoloi, moma bona tau ntanina mangaa pangkolora, naupawee bona mahibali moto pangkolomi. 14 Aji, welau ei nelabi katuwumi, mamala komi mantulungira to nakakuraa katuwura. Hangkani tempo, ane makakuraa mui komikowo pade hira melabi, mamala muirahawo mantulungi komi. Ane weedimi mahibalimi kantomo pangkolomi. 15 Ewa naria laitulihi rara Buku to Nagaha, iwei, “Tauna to nopalimpuru nadea, moma'i nelabi, pade tauna to nopalimpuru hodi, moma'i nakakuraa.”
Titus hante rodua dohena laihuro
16 Nosukuru kami hi Alatala, habana laiwaika-Na hi Titus dota rara to naroho mantulungi komi, nahibali hante dota rara to naria hi kami. 17 Laitarimana ami napa to iuli kami, naupawee hante dota rarana to naroho ee mai, hampena hia moto tumpu dota tulau hi komi. 18 Laitudu kami mui hadua ompita hangu kaparahayaa nampodohe Titus rara pomakoana tulau hi komi. Ompita ee mai hadua to laibila humawee jumaa habana bagona nangkarebai Kareba Belo. 19 Moma wuwu ee, ompita ee mui laitudo jumaa-jumaa mampodohe kami mangkeni doi petulungi ee. Patuju kami mangkeni doi petulungi ee, bona Pue rapemabohe, pade manoto rahilora tau ntanina ane nalori mpuu rara kami netulungi. 20 Apa nainga mpuu kami, bona nemo mei maria tauna manguli moma kami nanoro nangkakamu doi pewai to nadea ei. 21 Mingki kami moingku manoro, moma wuwu i tingoo Pue, naupawee i tingoo manuhia mui.
22 Naria muipi hadua ompita to ntanina laitudu kami nampodohera Titus hante ompita etu. Ompita ee naharomi laihilo kami ane nangaa mpuu rarana netulungi. Nabohe mpuu rarana mantulungi komi apa laiparahayana mpuu ane nangaa rarami mewai. 23 Titus etu mai dohe hampobagoaku nantulungi komi. Ompita to rodua etu mai laihuro jumaa-jumaa, pade habana ingkura ompita to rodua etu nadea tauna nampemabohe Kristus. 24 Aji, pahiloimi hi Titus pade dohe-dohena, ane mpuu-mpuu nabohe towemi, bona rahilora mui jumaa-jumaa ntanina ane moma kami nokalowo nampolinga komi.