Hura Paulus rau hi Jumaa i Galatia
Popailodoa
Galatia ilodo, hangu propinsi to laiparenta Magau Bohe Roma. (Tempo ei Galatia ee mai nehua rara negara Turkimi.) Todea to natida i propinsi Galatia momara to Yahudi. Hira nepue hi pue ntanina. Karata Paulus nangkarebai Kareba Belo hi hira, nadea to nawali neparahaya hi Kristus.
Hangka momapi no'oha i Galatia ria'i Paulus, narata muirahawo tau ntanina nangkeni patudu to nahala. Iwei patudura, “Moma nagana ane wuwu neparahaya hi Yesus. Kana ratinita pade mantuku humawee atura rara patudu Taurat bona mamalata rapemakono i tingoo Alatala.” Nariara to Galatia namparahaya patudu to nahala ee.
Pangepena humawee lauria, nahodo mpuu'i Paulus. Etu pade laitulihikanara to Galatia hura ei. Rara hurana ei mai Paulus nampakanoto ane kita rapemakono i tingoo Alatala habana peparahayata hi Kristus, moma habana laitinita ba habana kita nantuku humawee atura rara patudu Taurat. Naupawee nemo muita mantuku dota rarata moto, apa tauna to neparahaya hi Kristus nantuku dota Inoha to Nagaha.
Iulina mui Paulus ane Yesus Kristus moto to nampaongko'i nawali rasul. Moma manuhia to nampaongko'i. Pade Kareba Belo to laiparatana hi to Galatia, laitarimana lako Yesus Kristus moto.
Ihi buku ei
1. Tabe pade jarita pamulana (1:1-10)
2. Paulus mpuu-mpuu rasul Kristus (1:11–2:21)
3. Alatala nampaongkota nawali ana-Na (3:1–4:31)
4. Kristus nampabakahata lako atura-atura rara patudu Taurat, bona matuwutamo mantuku dota Inoha to Nagaha (5:1–6:10)
5. Kahuduana (6:11-18)