Hura Paulus rau hi Jumaa i Galatia
Tabe
1
1 Lako Paulus, to laipelihi nawali rasul moma nantuku dota manuhia, naupawee nantuku dota Yesus Kristus pade Alatala Tuama to nampakatuwu nculi Pue Yesus lako kamatea-Na, 2 pade lako humaweera ompi-ompi to hangu kaparahayaa to nodohe hante aku. Hura ei laipakatu kami hi komi jumaa-jumaa i Galatia. 3 Mohambaya'a bona kabohe towe bo katuwu to nanone lako Tuamata Alatala pade lako Pue Yesus Kristus mampodohe komi. 4 Pue Yesus nampopewai woto-Na laipatehi habana dohata, bona momatamo matuwu mantuku ingku to nadaa i dunia ei. Laibabei-Na humawee lauria nantuku dota Tuamata Alatala. 5 Raunemi Alatala duu kahae-haena. Amin.Hangu aga Kareba Belo
6 Nahera'akuna nangepe komi. Nahomi mpuu rarami negoli lako hi Alatala to hante kabohe towe Kristus nangkio komi. Rau komi nantuku kareba belo to ntanina, 7 to kakonona moma'i Kareba Belo. Naupawee, naria tauna to nampakaingu komi pade mingki mobaliki ihi Kareba Belo nangkambelai Kristus. 8 Alatala mampahuku duu kahae-haena tauna to nangkarebai kareba belo to nontani lako Kareba Belo to laiparata kami hi komi, naupa tauna ee mai to lako hi kami moto'i ba malaeka lako huruga'i. 9 Welau ei, ku'ulikipi hangkani ewa to nariami wengi laiuli kami hi komi: Ane maria tauna mangkeni kareba belo to nontani lako Kareba Belo to laitarimami, Alatala mampahuku tauna ee duu kahae-haena. 10 Aji, bewamo ompi-ompi? Laiuliku lauria bona maria tauna mampaune'a? Moma iwee patujuku. Patujuku bona Naune'a Alatala. Ba pekirimi bona mampakasana rara manuhia'a? Ane iweedipi patujuku, moma'a batua Kristus.
Alatala nangkio Paulus nawali rasul
11 Bona mincani ompi-ompi, Kareba Belo to laiparataku moma lako manuhia. 12 Kareba Belo ee moma laitarimaku lako manuhia pade moma mui manuhia to nopatudu'a nangkambelai Kareba Belo ee. Yesus Kristus motomi to nangkewoka'a ihi Kareba Belo ei mai.
13 Laiepemimi bewa katuwuku ilodo nantuku agama Yahudi. Bewa kahekeku nampakaheha humawee jumaa Alatala pade nampehimukui nampakaropura. 14 Ane manguli panturuhi atura agama Yahudi, rarana hangu hangaa aku nelabi lako humawee tauna to Yahudi to halapia hante aku. Apa naroho mpuu pantukuku humawee ada tumpuloko kami.
15 Naupawee, nabohe mpuu towe Alatala hi aku. Laipotianaka'adapa, laipelihi-Na'amo, pade naratapi tempo to laipakatantu-Na, laikio-Na'a nawali rasul. 16 Hante goe rara-Na Alatala nampakanotoka'a hema-'I kakonona Ana-Na ee, bona Kareba Belo nangkambelai Ana-Na mamala kuparata hi tauna to moma Yahudi. Tempoku laipokio Alatala nawali rasul, moma naria haduaa manuhia to laipekuneku nangkambelai humawee lauria. 17 Moma mui'a rau i Yerusalem nampotomukara to noilodoramo laiongko nawali rasul. Naupawee rau'a i Arab. Lako Arab nanculiki mui'a rau i Damsyik.
18 Tolu mpae lako hee, rau'a Yerusalem nampotomuka Petrus. Hampulu alima mengi'a no'oha i houna. 19 Moma naria rasul to ntanina laihiloku i ria, wuwu rasul Yakobus tuai Pue Yesus aga. 20 Napa to laitulihiku ei mai nakono. Alatala moto nampahilo ane moma'a nokalowo. 21 Napu ee mai rau'a i ngata-ngata i propinsi Siria pade propinsi Kilikia. 22 Tempo ee mai, moma'a laincanira jumaa to neparahaya hi Kristus i Yudea apa poma'a naria nampotomukara. 23 Wule iepera kareba ane tauna to ilodo nampakahehara pade mingki mampakaropura, negoli nawali to nampotolele Kareba Belomi. 24 Laipemabohera Alatala habana laiepera napa to laibabei Alatala rara katuwuku.