Kareba Belo to laikarebai Paulus laipemakonora rasul
2
1 Naliu hampulu opo mpae lako hee, rauki mui'a i Yerusalem hante Barnabas. Pade laikeniku mui Titus. 2 Alatala moto to nantudu'a hampena rau'a i Yerusalem. Karataku i Yerusalem, nahiromu'a muntu hante hira to laipemabohe i rara jumaa i ria. Rara kahiromua ee mai iulikakura nangkambelai Kareba Belo to laiparataku hi tau-tauna to moma Yahudi. Patujuku bona nemo humawee to laipehumukuiku laipobagoku ilodo ba to laipobagoku tempo ei moma maria bununa. 3 Laipemakonora napa to iuliku. Etu pade Titus, to Yunani to laipodoheku ee mai, moma'i laipahuru ratini mantuku atura agama Yahudi. 4 Naria moto mui bahangkua dua tauna nanguli bona kana ratini'i. Tauna eera mai moma rarara mpuu nawali to pantuku Kristus. Hira ee nehua bongo doheta, bona mamalara mopahuruta mantuku atura-atura agama Yahudi. Naupawee momami mingki tatuku atura-atura agama Yahudi bona rapemakonota i tingoo Alatala, apa laibakahatamo lako atura-atura ee mai habana nohangu rarata hante Kristus Yesus. 5 Naupawee nau hangkania moma naria to laipodotara laituruhi kami, bona batena moto komi mantuku Kareba Belo to nakono to nariami hi komi.6 Hira to laipemabohe i rara jumaa ee mui momami napa-napa iulira mampatambai Kareba Belo to laiparataku. Ba nalangko pangkara ba moma, moma tapariku. Apa Alatala moto moma-'I nampelihi tauna. 7 Naupawee tauna to laipemabohe i rara jumaa eera mai, laincanira ane Alatala namparahayaka'a bago mangkarebai Kareba Belo hi tau-tauna to moma laitini. Nahibali hante Petrus to laiparahaya Alatala mangkarebai Kareba Belo hi tau-tauna to laitini. 8 Apa Alatala to nampawaika Petrus roho bona mawali rasul hi tau-tauna to laitini, Hia moto mui to nampawaika'a roho bona mawali rasul hi tau-tauna to moma laitini. 9 Hangka Yakobus, Petrus pade Yohanes to laipowalira tuama humawee jumaa Yerusalem nampahilo bago to laiwai-Na'a Alatala ei mai, laitabera'amo hante Barnabas halaku tanda laipohitujura ane kami rau moparata Kareba Belo hi to moma Yahudi pade hira rau moparata Kareba Belo hi to Yahudi. 10 Hangaa aga to laiperapira hi kami, bona nemora kikalingani to netowei katuwura. Kakonona ee amimi to laipehimukuiku kubabei.
Paulus nampahalai Petrus
11 Karata Petrus i Antiokhia, laihalai mataku'i, habana nahala'i. 12 Apa hangka naratara bahangkua dua tauna to Yahudi to neparahaya hi Yesus to laitudu Yakobus lako Yerusalem, nekangkaurami nampa'awaki tauna to neparahaya hi Yesus to moma Yahudi, apa naeka'i rahalaira to Yahudi to nanguli ane tauna kana ratini bona mahalama. Bo pamulana momara popontanina to Yahudi bo to moma Yahudi, nangkoni moto'i dohera to moma Yahudi to neparahaya hi Yesus. 13 Pade hira to Yahudi ntanina mui nantuku ingku Petrus to nabelo wongko ee mai. Moma wuwu hira, Barnabas muihawo nantuku ingkura. 14 Naupawee, pampahiloku ingkura to nohihala hante ihi Kareba Belo, laiulika mataku Petrus i tingoo humawee tauna to naria i hee, “Napa pade mupahurura to moma Yahudi matuwu ewa to Yahudi? Bo iko moto to Yahudidako, naupawee natuwu ewa hira to moma Yahudimoko.”
Manuhia laipemakono habana neparahaya hi Yesus Kristus, moma habana nantuku patudu Taurat
15 Mantuku pangotea kami, kami ei mai to Yahudi. Moma kami to moma Yahudi to nadoha. 16 Naupawee laincanita amimi ane moma hema haduaa tauna laipemakono Alatala habana nampoingkuka patudu Taurat. Tauna laipemakono habana peparahayana hi Yesus Kristus. Wee mui kami, neparahaya hi Yesus Kristus, bona rapemakono kami habana peparahaya kami hi Kristus, moma habana nampoingkuka patudu Taurat. Apa kakonona, moma hema haduaa tauna to laipemakono Alatala habana nampoingkuka patudu Taurat. 17 Aji, ane kami to Yahudi nampaharumaka bona rapemakono kami i tingoo Alatala habana nohangu rara kami hante Kristus, batuana momamo kami nampaharumaka patudu Taurat. Bo ane momadamo kami nampaharumaka patudu Taurat, batuana kami ei nahibali hante tauna to moma Yahudi to laiuli nadoha habana momara nantuku patudu Taurat. Naupawee, moma mamala tauli ane Kristus to nantudu kami nobabei doha. 18 Ane rapana kuharumaka nculi patudu Taurat to laibakahakumi, natantu aku ei mai tauna to nahala. 19 Ilodo tempoku nampehimukui nanturuhi patudu Taurat, patudu Taurat ee mai wule nampahiloi doha-dohaku, hampena ewa to laihuku mate'amo habana patudu Taurat ee mai. Naupawee, tempo ei natebakaha'amo lako patudu Taurat lauria, bona mamala'a matuwu mohingkabelo hante Alatala. Hante kamate Kristus i kau salib, mamala rauli aku mui namate'amo hingkani-ngkani hante Hia. 20 Aji katuwuku ei, momami aku to natuwu naupawee Kristusmi to natuwu i raraku. Katuwuku i dunia ei, natuwu'a neparahaya hi Ana Alatala to nampotowe'a pade to nampopewai woto-Na namate bona rapemakono'a i tingoo Alatala. 21 Moma'a namporau kabohe towe Alatala ee. Apa ane rapana mamalata rapemakono i tingoo Alatala habana mantuku patudu Taurat, tantu momami naria bununa kamate Kristus!