Laipemakono habana peparahaya
3
1 Komi to Galatia, neliu mpuudi kadoyomi! Ba nariamidi to nopahalatara pekirimi. Apa poma nanotodi to laiulikaku komi nangkambelai patuju kamate Kristus i kau salib? 2 Hangaa ei to mingki kuncani lako hi komi: Laitarimami Inoha to Nagaha habana nampoingkuka patudu Taurat? Tantu moma. Laitarimami Inoha to Nagaha habana laiepemimi Kareba Belo pade neparahayamo komi hi Kristus. 3 Napa pade nadoyo gaga komi? Lako pamulana komi neparahaya hi Kristus, laitarimamimi katuwu to nabou lako Inoha to Nagaha. Apa mipakuledi mamparata patuju katuwumi to nabou ee hante mampaharumaka rohomi moto? Tantu moma! 4 Apa moma nariadi bununa humawee to nadupa rara katuwumi hinungkaimi neparahaya hi Yesus? Moma'i parahayaku ane humaweena ee mai moma naria bununa. 5 Hilo, laiwaika-Namo komi Alatala Inoha-Na pade laibabei-Na mui hangu hangaa to nepakahera i tingoomi. Humawee lauria laibabei Alatala apa laiparahayami Kareba Belo to laiparata hi komi, moma habana laipoingkukami patudu Taurat.6 Iwee moto mui to nadupa hi Abraham, to laitulihi rara Buku to Nagaha iwei, “Abraham neparahaya hi Alatala, pade habana peparahayana ee mai Alatala nantarima'i halaku tauna to nanoro.” 7 Aji, nanotomi hi kita, hemara to neparahaya hi Alatala, hira eemi mai muli Abraham. 8 Naria amimi laitulihi i rara Buku to Nagaha ane Alatala mei mampemakonora to moma Yahudi, ane meparahayara hi Hia. Lomona Kareba Belo ee mai laikewoka Alatala hi Abraham, to laitulihi rara Buku to Nagaha, iwei, “Habana iko humawee manuhia i dunia ratiroi.” 9 Aji, habana peparahayana hi Alatala, Abraham laitiroi. Wee moto mui humawee tauna to neparahaya hi Alatala, ratiroi nahibali ewa Abraham.
10 Apa humawee tauna to nampekiri ane Alatala nantarimara habana nampoingkuka patudu Taurat, hira ee mei Nahuku Alatala. Ewa naria laitulihi rara Buku to Nagaha iwei, “Mahilakaramo tauna to moma natigu nampoingkuka humawee to laitulihi rara buku Taurat.” 11 Nanotomi ane moma naria hadua tauna to laipemakono i tingoo Alatala habana nampoingkuka patudu Taurat, apa naria laitulihi i rara Buku to Nagaha iwei, “Tauna to nanoro i tingoo Alatala habana peparahayana, hiami to matuwu.” 12 Naupawee koropokona patudu Taurat ee, moma peparahaya. Apa naria laitulihi rara buku Taurat iwei, “Hema to nampoingkuka humawee patudu ee, matuwu'i habana patudu ee mai.” 13 Kakonona kita mahipato Nahuku Alatala, apa laitibokita patudu Taurat. Naupawee laitolohi-Natamo Kristus hante kamate-Na i kau salib. Naria laitulihi, “Mahilakami tauna to laitoe i kau salib.” Kristus namate i kau salib ee nampahambeita namparata hilaka. 14 Humawee lauria laibabei-Na bona habana Kristus Yesus tau-tauna to moma Yahudi mamparata rahi to laitipa Alatala hi Abraham, hampena kita to neparahaya hi Alatala mantarima Inoha to Nagaha to laitipa-Na ee mai.
Patudu Taurat pade tipa Alatala
15 Ompi-ompi, kuwaika komi hangu porapa nangkambelai katuwu eo-eona. Rapana maria rodua tauna to motipa. Ane manotopi potipara ee mai, moma hema mamala mopoti ba motambai hangu hangaa i rara potipara. 16 Nadea ngkani Alatala notipa hi Abraham pade hi mulina. Rara Buku to Nagaha moma laitulihi, “pade hi muli-mulimu” to batuana muli Abraham to nadea. Naupawee laitulihi iwei, “pade hi mulimu,” to batuana hadua aga. Etumi Kristus. 17 Batuana to iuliku lauria iwei: Naria amimi tipa Alatala to laipakaroho-Na hi Abraham. Opo atu tolu mpulu mpae kahaena lako tipa ee mai pade laipopewai-Nadi Alatala patudu Taurat hi Musa. Aji, moma'i mamala patudu Taurat mopoti ba molali tipa Alatala ee mai. 18 Apa ane nampoingkuka patudu Taurat ee pade lairatata rahi to laipahadia Alatala, tantu rahi ee moma'i lairata lako tipa Alatala ee mai. Naupawee Alatala nampawaika Abraham rahi habana tipa-Na.
19 Ane iwee, napa bununa patudu Taurat laiwaika manuhia? Honoiana, patudu Taurat ee laipopewai Alatala, bona lako patudu Taurat ee rancanimi ane laitibokimi dota Alatala. Patuju Alatala, bona patudu Taurat ee mai wuwu rapake duuna karata muli Abraham to laiuli rara tipa ee mai. Pade hilo belo ane patudu Taurat laipopewai Alatala hi manuhia moma'i nahibali ewa pampopewai-Na tipa-Na hi Abraham. Malaeka-malaeka noparata patudu Taurat hi Musa, pade Musa nopadola patudu Taurat ee hi todea Israel. 20 Naupawee tipa Alatala hante Abraham moma nampake to iolona, apa Alatala moto to nobabei humaweena.
21 Ane wee, nohihala'i patudu Taurat hante potipa Alatala? Moma ntoto! Apa ane ke namala'i patudu Taurat mampawaika manuhia katuwua duu kahae-haena, tantu patudu Taurat eemi to mampemakono manuhia i tingoo Alatala. 22 Naupawee rara Buku to Nagaha laitulihi ane humawee manuhia laibalangku baraka doha. Aji, moma naria dala ntanina to mampemakonota i tingoo Alatala. Wuwu meparahaya hi Yesus Kristus aga pade mamaladi tatarima rahi to laitipa Alatala hi Abraham.
Patudu Taurat nopanuntuta duu karata Kristus
23 Kapomana narata tempota neparahaya hi Kristus, patudu Taurat ee mai nampatuhuta ewa to laitarungku duuna neparahayata hi Kristus. 24 Aji patudu Taurat ee mai nampajagaita duu karata Kristus, bona rapemakonota habana peparahayata hi Yesus Kristus. 25 Welau ei naratami tempota neparahaya hi Kristus. Aji momatamo laijagai patudu Taurat.
26 Nawali ana-ana Alatala puramo komi habana peparahayami hi Yesus Kristus. 27 Humaweemi to laidiu rara hanga Kristus, laipahangu hante Kristus pade laitarimami humawee hipa Kristus. 28 Momami naria pontaniana to Yahudi pade to moma Yahudi, batua bo to moma laipobatua, balailo bo bangkele, habana laipahangu puramo komi apa nohangu raramo komi hante Kristus Yesus. 29 Ane todea Kristus komi, komi muimi muli Abraham to mantarima napa to laitipa Alatala.