4
1 Kana kupakanoto hi komi: Ane rapana maria hadua ngana to namatemi tuamana, natantu humawee gagu tuamana ee, hia purami tumpuna. Naupawee ane nanganadipi, hia moma naria pontaniana hante batua. 2 Apa nariaradapa to nampodoo ngana ee mai pade nouruhi humawee gaguna, duuna marata tempo to laipakatantu tuamana. 3 Wee mui kita, kapomata nangincani patudu to nakono, ewa ngana eetadapa pade laipobatua atura kaparahayaa-kaparahayaa dunia ei to laiulita mamala mampakahalamata. 4 Naupawee naratami tempona, Alatala nantudu Ana-Na narata i dunia. Ana Alatala ee mai laiote hadua bangkele, pade Ngana ee mai natuwu nanturuhi patudu Taurat. 5 Alatala nantudu Ana-Na tumai mampabakahara tauna to laipahuru nanturuhi patudu Taurat, bona humaweeta to laibakaha Kristus raongko mawali ana Alatala. 6 Aji apa ana Alatala puramo komi, Alatala nantudu Inoha Ana-Na natida i rarami pade i raraku. Inoha ee mai to nanguli, “Papa, Tuamaku.” 7 Ane wee momamo komi batua, apa nawali ana Alatalamo komi. Ane nawali ana Alatalamo komi, komi mei mantarima humawee to laipahadiaka-Na ana-ana-Na.Namere rara Paulus hi to Galatia
8 Ilodo, kapomana laincanimi Alatala, komi laipobatua baraka-baraka ntanina to kakonona momara Alatala. 9 Naupawee, tempo ei laincanimimi Alatala, ba nabelo laupi rauli, Alatala to nangincani komi. Bewa pade negoliki muimo komi hi kaparahayaa-kaparahayaa dunia to moma bukuna mantulungi komi pade moma mui bukuna mangkenika komi rahi? Bewa pade mingki napobatua nculi komi? 10 Natigudamo komi nobabei eo-eo bohe to Yahudi, wula-wula to laipakatantu pade mpae-mpae to laipakatantu, nantuku atura agama Yahudi. 11 Namere raraku nemo-nemo mei moma naria bununa to laipobagoku hi komi.
12 Ompi-ompi, kuperapi bona komi mahibali hante aku, ewa aku mui nahibali hante komi. Moma naria to nahala laibabeimi hi aku. 13 Tantu lailingami moto bewa'a pamula-mulana noparata Kareba Belo hi komi. Tempo ee, nadua'a. Etu pade naria logaku noparata Kareba Belo hi komi. 14 Tempo ee, hakiku ee mai nawali pehori bohe hi komi bona nemo'a mitarima. Naupawee moma komi narungku hi aku. Laitarimami belo moto'a ewa nantarima hadua malaeka Alatala, ba ewa nantarima Kristus Yesus moto. 15 Nagoe mpuu komi tempo ee mai. Rimami kagoemi ee mai? Laincaniku ane tempo ee mai, ane ke mamala, madota pura komi modungki matami pade mipopewai hi aku. 16 Hilo-hiloku, laipowalimi balimi'amo, habana laiulikaku komi napa to nakono.
17 Hira to noparata patudu to moma nakono narajira nampalanai komi mehua dohera, naupawee patujura moma nabelo. Kakonona patuju rarara mampopogaa komi hante kami, bona maraji komi mantukura. 18 Nabelo ami ane maria tauna to naraji mobabei ingku to nabelo. Aga kana rababei dola, nemo wule rababei ane tempoku maria dohemi moto. 19 Ompi-ompi to laipowaliku anaku, napepa iepeku habana ingkumi etu mai, ewa kapepa hadua bangkele nantodokaha noana. Mapepa dola kuepe ane hipa Kristus poma'i mipohipa. 20 Mingki mpuu'a welau ei mai ritu dohemi, bona mamala'a manguli ihi raraku to kakonona hampena mincani bewa to lairasaiku, apa napumi akalaku nantingohi komi.
Hagar pade Sara namparapaika rongaa tipa Alatala
21 Ompi-ompi, komi to mingki matuwu manturuhi patudu Taurat, epe ku'ulika komi, napa kakonona to laitulihi rara buku Taurat. 22 Rara buku Taurat laitulihi ane Abraham noana rodua. Hadua anana laiote bangkele to laipobatua, bo to hadua laiote bangkele to moma laipobatua. 23 Anana lako bangkele to laipobatua ee mai, laiote habana dota manuhia, bo anana lako bangkele to moma laipobatua ee mai laiote habana tipa Alatala hi Abraham.
24 Tutura ei laipake halaku porapa. Rodua bangkele ee mai namparapaika rongaa tipa. Hagar namparapaika tipa Alatala hante to Israel i Bulu Sinai, pade ana-ana Hagar namparapaika humawee tauna to laipobatua atura-atura rara patudu Taurat. 25 Aji, Hagar namparapaika Bulu Sinai i pongataa to Arab pade namparapaika mui Yerusalem tempo ei, to laipobatua atura-atura rara patudu Taurat puraramo todeana. 26 Naupawee Sara namparapaika Yerusalem to i huruga. Hiami tina humawee to neparahaya hi Kristus, apa Sara ee moma'i laipobatua pade kita momata laipobatua atura-atura rara patudu Taurat. 27 Apa rara Buku to Nagaha laitulihi iwei,
“Kagoemoko bangkele to nalalo,
to momako naria noana!
Kagoe-goemo hante kasana raramu,
iko to moma namparasai kaduana noana!
Apa bangkele to laipalahi balailona madeapi anana
lako bangkele to natuwu hante balailona.”
28 Ompi-ompi, komi etu mai ana-ana Alatala to laiote habana tipa Alatala, nahibali hante Ishak. 29 Wee mui tempo ei kita to laiote nantuku dota Inoha to Nagaha laipakaheha tauna to nampodota bona kita manturuhi patudu Taurat, nahibali ewa Ishak, ana to laiote nantuku dota Inoha to Nagaha, laipakaheha Ismael, ana to laiote lako dota manuhia. 30 Naupawee, napa to laiuli rara Buku to Nagaha nangkambelai Ismael pade Ishak? Laiuli iwei, “Popalaimi bangkele to laipobatua etu hante anana, apa to mamparata gagu tuamana, ana lako bangkele to moma laipobatua, moma ana lako bangkele to laipobatua ee mai.” 31 Aji ompi-ompi, kita ei mai momata ana-ana lako bangkele to laipobatua. Kita ei mai ana-ana lako bangkele to moma laipobatua, apa kita ei momata laipobatua atura-atura rara patudu Taurat, naupawee kita namparahaya tipa Alatala.