Jagai belo katebakahami lako patudu Taurat
5
1 Patuju Kristus nampabakahata lako patudu Taurat, bona mpuu-mpuutamo matebakaha. Etumo, jagai belo katebakahami. Nemopa komi madota rapobatua atura-atura rara patudu Taurat. 2 Pairara belo komi. Aku Paulus, mangulika komi: Ane miperapi ratini, moma naria bununa Kristus hi komi. 3 Hangkanipi ku'uli: Komi to nerapi ratini kana matigu komi mampoingkuka humawee parenta ntanina rara patudu Taurat. 4 Nahala komi ane mipehimukui manturuhi patudu Taurat bona rapemakono komi i tingoo Alatala. Ane iweedamo komi, nategaamo komi hante Kristus pade natuwu i hawaliku kabohe towe Alatalamo komi. 5 Naupawee ompi-ompi, hante petulungi Inoha to Nagaha laiharumaka kami, rapemakono kami mei i tingoo Alatala habana peparahaya kami hi Kristus. Eemi to laipopea kami hante rara mpuu kami. 6 Apa ane mohangu raratadamo hante Kristus, to laitini pade to moma laitini nahibali aga. To koropokona peparahayata hi Kristus, to mamala rahilo lako toweta hi tau ntanina.7 Ilodo, nabelomi pantukumi patudu Kareba Belo nangkambelai Kristus. Hemadi to nampakakoo rarami hampena momamo komi nadota nantuku patudu to nakono? 8 Natantu amimi, to laibabeira lauria moma'i lako Alatala to nangkio komi nawali todea-Na. 9 Ewa naria pangengko iwei, “Ragi to hodi nampopengkahe labu gando to nadea to rapobabei roti.” Wee moto mui patudu to moma nakono, kahaa-haea nadea tauna to laipakagerona pekirira. 10 Naupawee laiparahayaku moto ane moma naria kaparahayaami to ntanina, habana nohangu raratamo hante Pue Yesus. Laiparahayaku moto mui ane tauna to nampakagado pampekirimi etu kana Nahuku Alatala'i, bonau hema mui'i tauna ee mai. 11 Ompi-ompi, epe komi. Ane ke laipatudukuradapa tauna nangkambelai popatini bona Natarimara Alatala, tantu moma'a rahehakira to Yahudi. Naupawee moma iwee popatuduku. To laipatuduku, kita laipemakono i tingoo Alatala habana kamate Kristus i kau salib. Ee mai to laipodaara to Yahudi. 12 Aginalau tauna to nampakagado pampekirimi etu ratompora laumi parewa wotora.
Matuwu mantuku pepanuntu Inoha to Nagaha
13 Ompi-ompi, Alatala nangkio komi bona matebakahamo komi lako katigumi nanturuhi patudu Taurat. Naupawee nemo katebakahami ee mai mipake mobabei humawee dota rarami. Kana momepotowe pade momehuko komi hadua bo hadua. 14 Apa humawee to laitulihi rara patudu Taurat, laipahangu rara patudu ei, “Potowemi hingka manuhiamu ewa pampotowemu wotomu moto.” 15 Naupawee ane wule momehingki pade mobungka aga bagomi, pakabelo, nemo mei momepakaropu komi.
16 Patujuku nanguli lauria, bona matuwu komi mantuku pepanuntu Inoha to Nagaha, nemo mantuku dota rara manuhia to nadaa. 17 Apa dota rara manuhia moma nahibali hante dota Inoha to Nagaha, pade dota Inoha to Nagaha moma nahibali hante dota rara manuhia. Hore nonepobalira. Aji, ane Inoha to Nagaha nopanuntu katuwumi, moma komi namala nobabei napa to ipodotami. 18 Ane laipopewaimi tuwumi Napanuntu Inoha to Nagaha, momami paraluumi matuwu manturuhi patudu Taurat.
19 Nanotomi ingku tauna to nantuku dota rara manuhia to nadaa. Ingkuna iwei: nogau hala, nogau to moma nahipato, nogau hampa-hampana, 20 nepue ntani, nedoti, nobungka, nonehalapaha, nohiri, nahodo, nampomaihi woto moto, nampakagero hintuwu bo pohingkabeloa, 21 nehingki, nalangu-langu, nobabei pohuhaa nantuku dota rara, pade ntani-ntanina ingku to nadaa. Kupaingai komi welau ei, ewa to laipaingaikaku komi lodo wengi, ane tau-tauna to nobabei humawee lauria moma naria bagiara rara poparentaa Alatala.
22 Naupawee ane tauna to laipanuntu Inoha to Nagaha, iwei ingkuna: natowe, nagoe rarana, pokonona nohingkabelo, nohabara, nadoli netulungi, nabelo rarana, natigu, 23 nadole, pade namala nantanee dota rarana. Moma naria atura to nampetagii humawee lauria. 24 Hema-hema to nawali todea Kristus Yesus, kakonona laipatehirami dota rarara to nadaa hingkani-ngkani hante kamate Kristus i kau salib. 25 Laiwaika-Natamo Inoha to Nagaha tuwu to nabou. Aji, mahipatotamo matuwu mantuku dota Inoha to Nagaha ee mai. 26 Nemotapa mahombo, nemotapa momepakadua mporara, pade nemotapa momepohirii.