Mometulungi moto oa komi
6
1 Ompi-ompi, ane maria tauna to mobabei doha, komi to natuwu nantuku Inoha to Nagaha kana mantulungi'i manculiki i dala to nanoro. Naupawee ane mitulungi'i, miulika belo moto'i, pade mainga komi bona nemo komi mui rapehori mobabei doha. 2 Mometulungi komi mangkolo kahehaami, apa ane ewa ee mai, laituruhimimi parenta Kristus. 3 Apa ane maria tauna manguli hia nadea pobununa, bo moma'i iwee kakonona, tauna ee mai nokalowoni wotona moto. 4 Butu tauna kana mopareha ingkuna moto, nabelodi ba nadaadi. Ane mabelo ingkuna, moma'i mahala ane napolinga ingkuna. Naupawee nemo napekiri ane nabelopi ingkuna hia lako ingku tau ntanina. 5 Apa butu tauna hore-hore mangkolo pangkolona moto i tingoo Alatala. 6 Kita to nantarima popatudu nangkambelai lolita Alatala, mahipatota mantulungi to nopatuduta ee pade mantiraka'i hangu hangaa to nabelo to naria hi kita.7 Nemo mahalatara! Alatala moma namala rapopo'ore, apa napa to tahawu, ee moto mui to tahompoi. 8 Batuana, hema to matuwu mantuku dota rarana to nadaa, mamate'i mei duu kahae-haena habana ingkuna to nadaa ee mai. Naupawee hema to matuwu mantuku dota Inoha to Nagaha, natarima mei katuwua to moma maria kahuduana lako Inoha to Nagaha. 9 Nemo takaohai mampoingkuka to nabelo, apa marata mei tempona, ane momata mentuu mampoingkuka to nabelo, tatarima mei wua ingkuta to nabelo ee mai. 10 Aji, lawina nariadipi logata, maita mampoingkuka to nabelo hi humawee tauna, koropokona hi ompi-ompita to hangu kaparahayaa.
Pepalingai pade petabe
11 Ompi-ompi, bagia hura to kahuduana ei, aku motomi to notulihi. Hilomi motomi bewa kabohe tulihiaku.a 12 Tauna to nopahuru komi bona kana ratini, kakonona hira ee mai wule mingki mampahiloi ane natigura nantuku atura-atura agama. Patujura, bona nemora rapakahehara to Yahudi. Apa ane to raharumakara wuwu kamate Kristus i kau salib aga, rapakaheha to Yahudiramo. 13 Apa hira to nantuku atura popatini ee mai, moma muirahawo nampoingkuka humawee atura patudu Taurat. Naupawee komi laipahurura ratini, bona ane ratini komi, mamalara mampolinga wotora habana laituruhimi atura ee mai. 14 Naupawee moma'akuna madota mampolinga hangu hangaa, wuwu salib Pueta Yesus Kristus aga to kupolinga, apa hante kamate Kristus i kau salib, nanotomi hi aku ane momami naria napa-napa i dunia to laiharumakaku. Pade moma'amo natepou hante hangu hangaa to naria i dunia. 15 Laitini ba moma laitini moma naria pontaniana. To koropokona nawali manuhia to nabou. 16 Kuperapi hi Alatala bona Nawaikara katuwu to nanone pade ahi rara-Na hi hira to natuwu nantuku patuduku lauria. Hira eemi to nawali todea Alatala, to Israel to kakonona.
17 Kahuduana ku'uli, nemopi mipakaheha'a, apa walea baka pekadungkui to naria i wotoku nawali tanda ane aku ei mpuu-mpuu batua Yesus.
18 Ompi-ompi, mohambaya'a bona kabohe towe Pueta Yesus Kristus mampodohe moto oa komi. Amin.