7
1 Ompi-ompi to laipotoweku, apa laitarimatami humawee tipa Alatala ee mai, kana tabakahami humawee ingkuta bo pampekirita to nadaa. Kita kana mantuku Alatala hante rarata mpuu, habana nengkoruta hi Alatala.Goe rara Paulus
2 Ompi-ompi, dota kami bona mipotowe kami pade mitarima kami hante kalori rarami. Moma kami naria hangkania nobabei hala hi tau ntanina, moma naria tauna to laipakarugi kami ba laibagiu kami. 3 Patujuku nanguli ewa ee, moma mampahalai komi. Apa ewa to laiulikumi ilodo he, laipotowe kami mpuu komi. Matuwu ba mamate, batena moto kami mampotowe komi. 4 Moma nakoroa raraku nampojaritaka komi. Nasana mpuu raraku hi komi. Laipakarohomi mpuu raraku. Naupa lairasai kami nadea kahehaa, nagoe moto oa raraku.
5 Karata kami i propinsi Makedonia, moma naria loga kami nondodo. I rima-rima kami laipakaheha. Hamali kami nantingohira tauna to nampaewa kami, hamalina mui kami nantingohi eka kami moto. 6 Naupawee, Alatala to nampakaroho rara tauna to lairumpa kahehaa, nampakaroho rara kami hante peonga Titus. 7 Moma aga peonga Titus to nampakaroho rara kami, naupawee naroho mui rara kami nangepe tutura Titus nangkambelai bewa komi nampakaroho rarana. Laikewonami Titus hi kami ane nalentora mpuu komi motomu hante aku, laihohomi rarami habana ingkumi to naliu pade nahadiamo komi mampatulungi'a. Humaweena lauria nampatambai kagoe raraku.
8 Aji, naupa huraku to laipakatuku hi komi nampakadua rarami, moma laihohoku raraku notulihi hura etu. Naria mpuu laihohoku raraku, apa laincaniku ane hura ee nampakadua rarami, naupa moma nahae kadua rarami. 9 Welau ei nagoemi raraku. Moma'a nagoe habana nadua rarami, naupawee nagoe'a habana kadua rarami etu nangkeni pobali ingkumi. Dua rarami etu Alatala tumpu dota, bona pampekirimi to nahala mobalimi. Aji, moma komi laipakarugi kami. 10 Habana dua rara to laipodota Alatala nangkeni kancoroa lako ingku to nahala bona mahalama komi pade moma mihoho rarami. Naupawee, dua rara to neumba lako dota manuhia, ee mai wule nangkeni kamatea. 11 Hilo motomi napa to nawali hi komi habana dua rara to laipodota Alatala etu. Eimile wua dua rara to laipodota Alatala hi komi: Nadota mpuumo komi noingku nanoro. Laipehimukuimi mpuu nampopahiloi ane nanoromi ingkumi. Laipodaamimi doha pade naekamo komi nobabei doha, nalentoramo komi motomu hante aku, narajimo komi nampoingkuka napa to laipatuduku, pade laihukumimi tauna to nahala. I rara humaweena lauria laipahiloimimi ane moma naria kahalaami. 12 Patujuku notulihi hura ee wengi, moma habana tauna to nobabei kahalaa, moma mui habana tauna to laipakadua rarana. Naupawee, laitulihiku hura ee mai, bona manoto hi komi ane nabohe mpuu towemi hi kami i tingoo Alatala. 13 Etumi habana pade naroho rara kami. Moma wuwu naroho rara kami, nagoe mui kami nampahilo kagoe Titus, apa tempona laipodohemi ritu mpuu-mpuu laipakasanami rarana. 14 Naria ami komi wengi laipolingaku i tingoo Titus. Pade ingkumi to laihilo Titus moma nampakaea'a. To nakono moto oa laiuli kami hi komi. Wee moto mui napa to laiuli kami nampolinga komi i tingoo Titus, to iuli kami ee nakono. 15 Towe Titus hi komi nantambai kabohena, apa lailingana bewa pampaturuhimi'i pade bewa komi nantarima'i hante pebilami bo pengkorumi hi hia. 16 Nagoe mpuu raraku, habana namala komi laiparahaya rarana hangu hangaa.