Paulus rara pobagoana nampobagoka Pue
6
1 Halaku dohe hampobagoa Alatala, kiperapi mpuu hi komi, bona nemo kabohe towe Alatala to laiwaika-Na komi moma maria bununa i rara katuwumi. 2 Apa Alatala nololita i rara Buku to Nagaha iwei,“I tempo to laipakatantu-Ku, laiepe-Kuko.
Pade i eo to laipakatantu-Ku mampakahalama manuhia, laitulungi-Kuko.”
Kakonona, eimile tempo to laipakatantu ee. Eo ei muimi to laipakatantu mampakahalama manuhia.
3 Rarana hangu hangaa laipehimukui kami mpuu bona nemo maria tauna to madua rarara nampahilo ingku kami, apa moma kami madota bago kami nangkarebai Kareba Belo rahalai tauna. 4 Rarana hangu hangaa laipahiloi kami ane kami ei mai batua-batua Alatala. Nohabara kami naupa nadea ngaa kahehaa bo kapepaa to namparumpa kami. 5 Nohabara kami tempo kami laiduahi, laitarungku pade laidulu kadungkui. Nobago ntomo kami, naharo kami moma natepoturu pade naharo mui kami moma nangkoni. 6 Naupawee hante kalori rara, kataualua nangkambelai lolita Alatala, habara pade belo rara, laipopahiloi kami ane kami ei mai batua Alatala. Laiharumaka kami Inoha to Nagaha, pade laipotowe kami tau ntanina hante rara kami mpuu. 7 Nanotomi ane kami ei batua Alatala apa kami nangkarebai patudu to nakono, pade baraka Alatala laihilo i rara katuwu kami. Batena moto kami noingku nanoro. Ingku kami to nanoro eemi to laipentidai kami tempo kami nampaewa bali kami bo nampotolawai woto kami. 8 Laibila kami naupawee laipopore mui kami. Laiune kami naupawee laipakudaa mui kami. Naupa nanoro ingku kami, lairai kami nokalowo. 9 Naria tauna moma nampangaku kami halaku rasul, naupawee i rima-rima kami laincani halaku rasul. Ke nono mamatemo kami, naupawee natuwudapa kami. Naupa laiduahi kami, moma kami namate. 10 Naupa laipakadua rara kami, nagoe moto kami. Netowei katuwu kami, naupawee nadea tauna laipakahugi kami. Moma naria gagu kami, naupawee humaweena naria hi kami.
Nemo mohangu rara hante to moma neparahaya hi Kristus
11 Ompi-ompi kami to Korintus, laiuli kami purami ihi rara kami hi komi. Laipotowe kami mpuu komi. 12 Nadea mpuu towe kami hi komi, naupawee towemi hi kami hodi aga. 13 Aji, ku'ulika komi halaku ana-anaku, bewa katowe kami hi komi, kana wee moto mui katowemi hi kami.
14 Nemo komi mohangu rara hante tau-tauna to moma neparahaya hi Kristus, apa natantu ami moma nahibali tauna to noingku nanoro hante tauna to noingku moma nanoro. Pade natantu ami kabaana moma'i namala nopahangu hante kalimauana. 15 Moma ami naria kahibalia Kristus hante Magau Heta!a Tauna to neparahaya hi Kristus moma ami mamala mohangu rara hante tauna to moma neparahaya hi Kristus. 16 Moma ami namala pue ntanina no'oha i rara Hou Alatala. Kitami hou Alatala, pade Alatala ee mai Alatala to natuwu, ewa naria laitulihi rara Buku to Nagaha, Alatala nanguli iwei,
“Aku mei matida hingkani-ngkani hante hira
pade matuwu dohera,
pade Aku mei mawali Alatalara,
pade hira mei mawali todea-Ku.”
17 Iuli-Na mui Pue iwei,
“Pehuwumo komi lako lentongora tauna to moma neparahaya etu,
nemorapa mipodohe.
Nemo mitui to narumu,
bona Kutarima komi.”
18 Pade naria mui iuli-Na iwei,
“Aku mei mawali Tuamami,
pade komi mei mawali ana-ana-Ku balailo pade ana-ana-Ku bangkele.
Iweemi lolita Pue to Nabaraka.”