5
1 Wotota ei mamala rarapaika bamaru to laipo'ohaita. Laincanita, ane bamaru po'ohaata i dunia ei ragerohi, laipahadiaka-Natamo Alatala po'ohaata i huruga, po'ohaa to moma magero duu kahae-haena. Po'ohaa ee mai moma laibabei mpale manuhia. Po'ohaa to i huruga ee mai wotota to nabou. 2 Tempota natuwu i dunia ei nekakaita apa nalentora mpuuta mingki mamparata wotota to nabou to i huruga ee. 3 Apa ane taratadimi wotota to nabou ee, mamala rauli nampake warutamo, momatamo noleno. 4 Tempota natuwu i dunia ei nekakaita apa lairasaita napepa katuwuta. Momata madota mamate pade mampalahi wotota i dunia ei. Naupawee mingkita mampake woto to nabou lako huruga bona wotota to mamala mamate ei matehambeimi hante wotota to nabou ee, to matuwu duu kahae-haena. 5 Alatala motomi to nobabei bona mahadiata mantarima woto to nabou ee pade laiwaika-Nata Inoha to Nagaha halaku popakaroho ane humawee to laitipa Alatala kana madupa.6 Etu pade naroho moto oa rara kami, naupa laincani kami ane tempo kami natuwu i dunia eidipi, na'awadapa kami lako po'ohaa to kikatidai hingkani-ngkani hante Pue. 7 Apa kami ei natuwu habana neparahaya hi Kristus, moma habana napa to laihilo. 8 Aji, naroho moto rara kami pade mingki mpuu kami moencu lako woto kami i dunia ei, rau mo'oha dohe Pue i huruga. 9 Pade pehimukui kami mpuu mampakagoe rara-Na, belo tempo kami natuwu i dunia ei, belo mui tempo kami mampalahi dunia ei. 10 Apa humaweeta mei kana mantingohi Kristus i kadera pobotuhia-Na, bona butu dua tauna mantarima napa to mahipato natarima mantuku bewa ingkuna natuwu i dunia ei, nabelodi ba nadaadi.
Kristus nampopohingkabelo manuhia hante Alatala
11 Laincani kami napa batuana nengkoru hi Pue, etu pade laipehimukui kami mpuu bona tauna meparahaya hi Pue. Laincani-Na Alatala rara kami. Kuharumaka, komi mui mangincani rara kami. 12 Moma kami nampolinga woto kami moto i tingoomi, naupawee mingki kami mampawaika komi loga mampolinga kami bona mamala komi mantingohira tauna to wule nampolinga napa to laihilo manuhia, moma nampolinga rara tauna to mpuu-mpuu nabelo. 13 Apa ane kami ei mai noingku ewa to gila, ee mai bona magoe-'I Alatala. Pade ane kami ei noingku ewa tauna to moma nagila, ee mai bona magoe komi. 14 Kami noingku ewa ee habana towe Kristus to noparenta kami. Apa laiparahaya kami ane Kristus namate nampahambei humawee tauna. Aji, mamala rauli humawee tauna namate puraramo. 15 Patuju Kristus namate nampahambei humawee tauna, bona humawee tauna to natuwu i dunia ei momaramo matuwu mantuku dotara moto, naupawee matuwu mantuku dota Kristusradamo to namate nampahambeira pade laipakatuwu nculi.
16 Etu pade momamo kami nopantarui tauna nantuku pampekiri manuhia. Ane lodo kami nopantarui Kristus nantuku pampekiri manuhia, naupawee tempo ei momamo kami ewa ee. 17 Aji, hema to nohangu rara hante Kristus, hia nawali manuhia to nabou. To nahae naliumi. Hilo, to nabou naratami. 18 Humawee lauria Alatala to nampobago. Hante kamate Kristus, Alatala nampopohingkabelota hante woto-Na moto, pade kami laiwaika-Na bago mangkarebai pohingkabeloa ee mai. 19 Apa hante kamate Kristus, Alatala nampopohingkabelo nculi manuhia hante Hia. Momami lailinga-Na doha-dohara. Pade kami laiwaika-Na bago mangkarebai pohingkabeloa ee mai hi tau ntanina bona hira mui mohingkabelo hante Alatala.
20 Aji, kami ei mai to laihuro Kristus. Napa to iuli kami, kakonona ee mai patudu Alatala hi komi. Halaku huro Kristus kiperapi mpuu hi komi, bona madota komi mohingkabelo nculi hante Alatala. 21 Kristus moma-'I nadoha. Naupawee Alatala nampahibali-'I hante tauna to nadoha bona mampahambeita mangkolo dohata. Alatala nobabei ewa ee, bona ane mohangu rarata hante Kristus Napemakonota Alatala.