Ingku pade kahehaa Paulus noparata Kareba Belo
4
1 Laipobago kami bago ei, habana kabelo rara Alatala. Etu pade moma nahau rara kami. 2 Laitadi kamimi humawee ingku to nepakaea. Moma naria to laitabuhini kami. Moma kami nampa'akalani ba nampahalatara lolita Alatala. Laikarebai kami napa to nakono hante kanoto-notona, pade laiharumaka kami humawee tauna mampahilo ane to laipobago kami nakono i tingoo Alatala. 3 Ane Kareba Belo to laikarebai kami ee poma mui laipahara tauna, tauna to maropu aga to moma nampaha Kareba Belo ee. 4 Magau Heta to noparenta i dunia ei nampawunta pekirira tauna to moma neparahaya, bona baa lako Kareba Belo nemo mampakabaa rarara, pade nemo rancanira kabohe baraka Kristus to nahibali hante Alatala. 5 Apa kareba to laikarebai kami, moma kareba nangkambelai woto kami moto. Naupawee kami nangkarebai ane Yesus Kristus ee mai Pue pade kami ei batuami habana dota Yesus. 6 Tempo Alatala nopajadi langi bo dunia, Hia nanguli iwei, “Lako kalimauana kana mewanta baa.” Pade Alatala mui to nobabei hampena baa-Na newanta i rarata bona mamala tancani kabohe baraka Alatala to newanta i lence Kristus.7 Kareba Belo ee mai mamala rarapaika gagu to nahuli olina, pade kami manuhia biaha to laibabei lako tana ei, laipobolii Alatala gagu to nahuli ee mai. Alatala nobabei ewa ee bona manoto rahilo ane karoho kami nangkarebai Kareba Belo ee mai lako Alatala, moma lako hi kami moto. 8 I rima-rima kami laiewa, naupawee moma kami nadagi. Naharo moma ncani kami napa to kana kibabei, naupawee moma nahau rara kami. 9 Laihehaki kami naupawee moma kami laipalahi-Na Pue. Nadungka pura kami laikadungkui, naupawee moma kami namate. 10 Lairasai kami oa pehehaki to mamala kipomate ewa to lairasai Yesus, bona baraka lako katuwu nculi Yesus mamala rahilo i rara katuwu kami. 11 I rara katuwu kami ei nadea tauna mingki mampatehi kami habana neparahaya kami hi Yesus. Lauria nadupa bona humawee tauna mampahilo katuwu nculi Yesus i rara woto kami to mamala mamate ei. 12 Aji, weemo kami natuwu eo-eona nantingohi hangu hangaa to mamala kipomate. Naupawee moma itapari kami, bona lako bago kami ei, komi mamparata katuwua to moma maria kahuduana.
13 I rara Buku to Nagaha naria laitulihi iwei, “Aku neparahaya hi Alatala, etu pade nojarita'a.” Hante peparahaya to nahibali ewa eemile hampena nojarita kami, apa neparahaya kami. 14 Apa laincani kami ane Alatala to nampakatuwu nculi Pue Yesus, Hia mui mei mampakatuwu nculi kami hingkani-ngkani hante Yesus. Pade Alatala mangkeni kami hingkani-ngkani hante komi i tingoo-Na. 15 Humawee kahehaa to namparumpa kami ee nangkeni belo i rara katuwumi, bona madeaki tauna to meparahaya pade mamparasai kabohe towe Alatala, madeaki mui tauna to mosukuru hi Alatala. Hante iwee Alatala rapemabohe.
Nemo mahau rara mantingohi kahehaa
16 Etu pade moma nahau rara kami. Naupa woto kami kalee-lentea, rara kami laipakabou dola butu eona. 17 Habana humawee kahehaa to lairasai kami tempo ei, hangoni aga pade moma'i nantomo. Kahehaa ee nangkeni kami namparata katuwua to neliu kabelona duu kahae-haena. Neliu mpuu kabelona katuwua to kitarima hampena kahehaa to lairasai kami moma'i hangkuana. 18 Apa moma kami nampekiri napa to namala laihilo i dunia ei, naupawee kami nampekiri napa to moma namala laihilo i dunia ei. Habana to namala laihilo i dunia ei, hangoni aga naria. Naupawee to moma namala laihilo i dunia ei naria duu kahae-haena.