To pobago-to pobago potipa to nabou
3
1 Nemo mipekiri ane nopamula muimo kami nampolinga woto kami moto. Moma kami nahibali hante hira to narata hi komi nangkeni hura lako hi tau ntanina to namperapi hi komi bona mitarimara. Pade ane meongkora lako ngatami raperapira mui hura lako hi komi. Moma iparaluu kami hura ewa ee. 2 Komi etumi hura to natetulihi i rara kami, to laincani bo namala laibaha humawee tauna. 3 Apa lako ingkumi nanotomi ane komi etu mai hura lako Kristus, wua lako bago kami nangkarebai Kareba Belo. Hura ee laitulihi hante Inoha Alatala to natuwu, moma hante tinta. Moma mui laitulihi i watu, naupawee laitulihi i rara manuhia.4 Nabati kami nanguli ewa ee apa laiharumaka kami Alatala. Pade laiharumaka kami Alatala apa nohangu rara kami hante Kristus. 5 Moma kibuku mampobago bago ee ane hante pampakulea kami moto. Pampakulea to naria hi kami laitarima kami lako Alatala. 6 Laiwai-Na kami Alatala pampakulea hampena namala kami nawali to pobago nangkarebai potipa to nabou. Potipa to nabou ee moma atura-atura to laitulihi, naupawee to laipopewai Inoha to Nagaha. Apa atura to laitulihi nangkeni kamatea, naupawee Inoha to Nagaha nangkeni katuwua.
7 Ilodo, Alatala notulihi atura-atura-Na i watu pade laiwaika-Na hi Musa. Tempo atura ee laiwaika hi Musa, baa baraka Alatala newanta hi Musa, hampena lence Musa nabaa pade moma ibukura to Israel nampanaa lence Musa, naupa baa i lence Musa ee hangoni aga. Ane atura Alatala to nangkeni kamatea ee mai narata hante baraka to ewa ee, 8 natantu amimi neliupi barakana atura to nabou to laipobago Inoha to Nagaha. 9 Apa ane atura to nangkenita rahuku ewa ee barakana, natantu amimi neliupi barakana atura to nampemakonota i tingoo Alatala. 10 Atura to nahae nabohe barakana. Naupawee ane rapopohibali'i hante atura to nabou, mamala rauli, atura to nahae ee momami naria barakana. 11 Apa ane atura to nahae ee narata hante baraka to hangoni aga, natantu amimi neliupi barakana atura to nabou, to nantaha duu kahae-haena.
12 Aji, nabia kami noparata Kareba Belo habana laiharumaka kami mpuu atura Alatala to nabou ee. 13 Moma kami nahibali hante Musa owi, to nampabungu lencena hante kae, bona to Israel moma mampahilo baa baraka Pue naora lako i lencena. 14 Naupawee, natebungumi pekirira, apa duu tempo ei ane rabahara potipa to nahae natebungu oadipi pekirira. Apa mohangu rara hante Kristus aga pade malalidi to nampabungu pekirira ee. 15 Duu tempo ei, butu ngkaninara nobaha buku Musa, naria oadipi to nampabungu pekirira. 16 Naupawee, ane maria tauna to megoli hi Pue, to nampabungu pekiri ee ralalimi lako hi hia. 17 Pue ee mai Inoha. Ane Inoha Pue naria i rarata, ee batuana natebakahatamo lako atura to nampopogaata lako Alatala. 18 Pade humaweeta nampopahiloi baa baraka Pue hante lence to moma laibungu. Pade baa baraka Pue ee mai nampabalikita bona mahibalitamo hante Hia hampena kahaa-haea mantambai baa barakata. Baa baraka ee mai narata lako hi Pue, etumi Inoha to Nagaha.