2
1 Aji, laibotuhikumi moma'a olu tulau hi komi, bona moma'a wule tulau mampakadua rarami. 2 Apa ane kupakadua rarami, hemapi mei to mampakasana raraku? Tantu moma naria ntanina, wuwu komi to laipakaduaku rarami aga to mampakasana raraku. 3 Eemile patujuku notulihi hura to ipakatuku hi komi to naliu wei. Moma'a nadota tulau mantako komi, pade mipakadua raraku, bo komimi to kakonona kana mampakagoe raraku. Apa laiparahayaku mpuu, ane magoe'a, komi mui magoe. 4 Potulihiku hura to naliu wengi, naheha pade nadua mpuu raraku, pade nadea ue mataku natudo. Patujuku notulihi hura ee, moma bona madua rarami, naupawee bona mincani ane laipotoweku mpuu komi.Tauna to nahala kana ra'ampuni
5 Tauna to nepakadua mporara etu, kakonona moma aku to laipakaduana raraku, naupawee humaweemi. Naupawee bona nemo miuli naliu gaga to iuliku, aginapi ku'uli laipakaduana rara bahangkua dua lako hi komi. 6 Ane habagia bohemo komi nampahuku tauna ee, naganami. 7 Naupawee ku'ulika komi, kana miampuni'i pade mipakaroho nculi rarana, bona nemo maliu gaga kadua rarana, hampena mahaumi rarana. 8 Etu pade kuperapi mpuu hi komi, bona mipahiloi hi hia ane laipotowemi'i. 9 Apa eemi patujuku notulihi hura to naliu wei hi komi, bona kuncani, laituruhimidi ba moma patudu-patudu to laiulikaku komi. 10 Apa ane mi'ampuni hala tauna, aku mui mampa'ampuni'i. Ane maria tauna to nahala hi aku, kana kuampuni'i i tingoo Kristus bona mangkeni belo hi komi. 11 Laibabeiku ewa ee bona nemo maria loga Magau Heta mampatiwoota, apa laincanita amimi patuju Magau Heta ee.
Paulus nampojarita bagona noparata Kareba Belo
12 Karataku i Troas mangkarebai Kareba Belo nangkambelai Kristus, Pue nobeaka'a dala bona mamala'a mobago i hee. 13 Naupawee moma narodo raraku, apa moma'i naria ompiku Titus lairataku i hee. Etu pade nehabi'amo pade neongko rau propinsi Makedonia.
14 Nosukuru mpuu'a hi Alatala, apa laipanuntu-Na moto oa kami pade laiwaika-Na kami popabeta habana nohangu rara kami hante Kristus. Alatala nampake kami nangkarebai Kareba Belo nangkambelai Kristus, bona Kareba Belo ee mai motolele i rima-rima, nahibali ewa dupa to laitunu pade laienga i rima-rima. 15 Apa i tingoo Alatala, kami ei ewa dupa to nawongi lako hi Kristus i lentongora to rapakahalama pade hira to rapakaropu. 16 Hi hira to rapakaropu, kami ei ewa hoa ule pope to nangkeni kamatea. Bo hi hira to rapakahalama, kami ei ewa hoa to nawongi to nangkeni katuwua. Moma hema haduaa to mampakule mampobago bago ei. 17 Apa moma kami nahibali hante nadea tau ntanina, to wule nampali kauntua lako bago nangkarebai lolita Alatala. Patuju kami nanoro pade to laiuli kami nakono, apa kami laihuro Alatala nangkarebai lolita-Na. Aji, kami nojarita hante baraka Kristus pade laihilo-Na moto Alatala napa to laibabei kami.