Hura Paulus karongkanina rau hi jumaa i Korintus
Tabe
1
1 Lako Paulus, to laipelihi Alatala nawali rasul Kristus Yesus, pade lako Timotius ompita hangu kaparahayaa. Hura ei laipakatu kami hi komi jumaa Alatala i ngata Korintus pade humawee todea Alatala i propinsi Akhaya. 2 Mohambaya kami bona kabohe towe pade katuwu to nanone lako Alatala Tuamata, pade lako Pue Yesus Kristus mampodohe komi.Peune habana karoho rara lako Alatala
3 Maitamo mampaune Alatala, Tuama Pueta Yesus Kristus. Alatala eemi to nabohe mpuu towe-Na, pade Hiami Alatala to nampakaroho rarata rara hangu hangaa. 4 Hiami to nampakaroho rara kami butu ngkanina kami lairumpa kahehaa, hampena namala kami nampakaroho rara tauna to lairumpa nadea ngaa kahehaa. Kami nampakaroho rara tauna hante karoho rara to laiwaika-Na kami Alatala. 5 Apa kahehaa to lairasai Kristus nadeami lairasai kami, naupawee nadea muimi lairasai kami karoho rara to laiwaika-Na kami Kristus. 6 Lairasai kami kahehaa, ee mai bona mamala kami mampakaroho rarami pade mamala komi rapakahalama. Laipakaroho rara kami, ee mui bona mamala kami mampakaroho rarami, hampena maroho pade mohabara komi mantingohi kahehaa to nahibali hante to namparumpa kami. 7 Etu pade moma namere rara kami nampekiri komi, tempomi lairumpa kahehaa nahibali hante kami. Apa laincani kami Alatala kana mampakaroho rarami hingkani-ngkani hante kami.
8 Ompi-ompi, iuli kami lauria, bona mincani kahehaa to namparumpa kami i propinsi Asia. Kahehaa to namparumpa kami, neliu lako bukua kami mantingohi kahehaa ee mai hampena momami laiharumaka kami ane matuwudapa kami. 9 Pekiri kami, ewa to laihuku matemo kami. Naupawee lauria nadupa bona nemo kami mampaharumaka roho kami moto. Kami kana mampaharumaka Alatala to nampakatuwu nculi to mate. 10 Alatala to nampakahalama kami lako kahehaa to ke nono kipomate ee. Laiparahaya kami mpuu ane Alatala mui mei mampakahalama oa kami lako kahehaa-kahehaa to ewa ee, 11 apa komi mui nampatulungi kami hante hambayami. Alatala mampatiroi kami habana nadea tauna nampahambayani kami. Alaana madea mei tauna mosukuru hi Alatala.
Paulus nobaliki liwona
12 Laipolinga kami woto kami apa laincani kami ane ingku kami natuwu i dunia ei nanoro bo nagaha habana kabohe towe Alatala. Pelabi-labinapi pokaingku kami hi komi. Humawee pokaingku kami lauria moma laibabei kami nantuku noto manuhia, naupawee nantuku kabohe towe Alatala. 13 Apa hura to laitulihi kami hi komi namala laibahami pade laipahami. Moma naria patuju ntanina to laipopalerui kami i rara hura ee. Kuharumaka hangkani tempona mei humawee patuju kami mipaha. 14 Tempo ei habagiadipi patuju kami laipahami. Ane mipahadimi humawee patuju kami, mipaha muimi ane tempo karata nculi Pue Yesus mei, komi mampolinga kami, nahibali hante kami mui mampolinga komi.
15 Laiparahayaku mpuu ane mipolinga'a mei. Etu pade naria'a wengi noliwo tulau mantako komi bona rongkani komi mantarima rahi, apa rongkani'a mantako komi. 16 Napu ee, kupadola pomakoaku rau propinsi Makedonia. Lako Makedonia mehani nculi mui'a hi komi bona mitulungi'a mopadola pomakoaku rau i Yudea. 17 Naupawee laibalikikumi liwoku ee mai. Iulimi komi moma'a nampekiri ncala pade noliwo'a? Ba iulimi komi, aku ei noliwo nantuku dotaku moto? Mapu ku'uli, “Io,” ku'uli mui, “Moma”? 18 I tingoo Alatala to namala raparahaya, ku'ulika komi ane to iuli kami hi komi, moma hangkani kiuli, “Io,” hangkani mui kiuli, “Moma.” 19 Yesus Kristus Ana Alatala eemi to laikarebai kami Silwanusa pade Timotius hi komi. Yesus ee moma Tauna to hangkani Nauli, “Io,” pade hangkani mui Nauli, “Moma.” Ane Nauli, “Io,” io mpuumi. 20 Apa humawee tipa Alatala laipakadupa i rara katuwu Kristus. Etu pade kita to nohangu rara hante Kristus namala nanguli, “Amin.” Hante iwee, Alatala laipemabohe. 21 Alatala motomi to nobabei hampena kami pade komi naroho pohangu rarata hante Kristus. Alatala moto muimi to nampaongkota 22 pade nomereta nawali todea-Na, pade laiwaika-Nata Inoha to Nagaha i rarata halaku popakaroho ane humawee to laitipa Alatala kana madupa.
23 Ompi-ompi, to iuliku ei mai nakono, Alatala moto habiku. Laincani-Na raraku ane kamomaku najadi tulau i Korintus wengi, malohe'a tulau mampakadua rarami. 24 Patujuku, moma dota-dota kami mampahuru komi nangkambelai napa to kana miparahaya. To ipodota kami, mobago hingkani-ngkani hante komi bona magoe komi, apa narohomi peparahayami hi Kristus.