Popahiruru doi to rapakatu hi jumaa i Yerusalem
16
1 Nangkambelai popahiruru doi to rapopewai hi jumaa Alatala, babeimo komi mantuku patudu-patudu to laiulikakura jumaa i Galatia. 2 Butu eo mingku, kabelo-belona butu duami mipatani pade miboli habagia doi to lairatami mantuku kadea pamparataami. Bona ane marata'adamo, momamo komi leba mopahiruru doi. 3 Ane marata'adamo, kuhuroramo tauna to miuli mahipato mangkeni doi to laipahirurumi hante hura rau i Yerusalem. 4 Ane raparaluu, hante aku meongko rau dohera.Liwo Paulus
5 Tulau moto'a mei hi komi, naupawee moliliko ncala'a olu i propinsi Makedonia, apa mantara i Makedonia'a. 6 Dotaku mahae'a hodi mo'oha dohemi, ba duuna mahudu tempo lengi bona mamala komi mantulungi'a mopadola pomakoaku rau ngata ntanina. 7 Moma'a madota hangoni moto mo'oha dohemi, apa to iharumakaku, ane Napodota Pue mahae'a hodi mo'oha dohemi.
8 Naupawee mo'oha i Efesus'a olu duuna marata eo bohe Pentakosta. 9 Apa i Efesus ei nadea logaku mampobago bago to nadea bununa, naupa nadea to nampaewa'a.
Mantulungi ompi-ompi to nampobagoka Pue
10 Ane marata'i Timotius hi komi, pehimukui bona nemo'i maeka mo'oha dohemi, apa hia etu mai nampobago bago Pue nahibali hante aku. 11 Aji, nemo maria tauna to mampahauru'i. Naupawee tulungi'i bona mahalama'i mopadola pomakoana, bona marata nculi'i hi aku, apa aku nampopea karatana i hei hingkani-ngkani hante ompi-ompi hangu kaparahayaa ntanina.
12 Nangkambelai ompita Apolos, nadea ngkani'imi laipahuruku bona mampodohera ompi hangu kaparahayaa ntanina tulau mampatako komi, naupawee tempo ei poma'i nadota tulau. Ane maria mei loga belona pade tulau'idi.
13 Maingahawo. Pakaroho peparahayami. Kana mabia komi mantingohi hangu hangaa pade maroho moto rarami. 14 Napa-napa to mibabei, babeimi hante towe rarami.
15 Ompi-ompi, laincanimi ane Stefanus humancoura tauna to pamulana neparahaya hi Pue Yesus i propinsi Akhaya, pade hira ee mai hante goe rarara nampatulungi todea Alatala. Etu pade kuperapi hi komi, 16 turuhiramo tauna to ewa ee pade butu tauna to nobago ntomo hingkani-ngkani hante hira. 17 Nagoe'a habana karata Stefanus, Fortunatus pade Akhaikus, apa hira ee mai to nampahambei komi nantulungi'a i hei. 18 Bilaramo tauna to ewa ee, apa hira nampakasana raraku bo rarami.
Tabe kahuduana
19 Tabe hi komi lako jumaa-jumaa i propinsi Asia. Akwila, Priskila pade jumaa to naharo nahiromu i houra nopakatu tabera i rara hanga Pue hi komi. 20 Tabe hi komi lako humawee ompi hangu kaparahayaa. Pometabe komi hante towemi hadua bo hadua halaku to po'ompi.a 21 Tabe lako hi aku Paulus. Tabeku ei laitulihi mpaleku moto. 22 Mahilakami tauna to moma nampotowe Pue! Maranata, karatamo-Ko Pue! 23 Kabohe towe Pue Yesus mampodohe komi. 24 Laipotoweku pura komi i rara hanga Kristus Yesus.