Nangkambelai katuwu nculi Yesus
15
1 Pade welau ompi-ompi, mingki kupalingai komi nangkambelai Kareba Belo to laiparataku hi komi. Laitarimamimi Kareba Belo, pade mpuu-mpuu komi neparahaya hi Yesus Kristus habana Kareba Belo ee mai. 2 Ane maroho mpuu komi mangkakamu Kareba Belo to laiparataku hi komi ee mai, mahalama komi. Ane moma maroho pangkakamumi Kareba Belo ee mai, moma naria bunumi neparahaya.3 Apa to koropokona, laikewokakumo komi. To koropokona ee mai to laitarimaku muimikuwo, ane Kristus ee mai namate habana doha-dohata, ewa to laitulihi rara Buku to Nagaha. 4 Kristus ee laitana-'Imi, pade eo katoluna laipakatuwu nculi-'Imi, ewa to laitulihi rara Buku to Nagaha. 5 Nerawa-'Imi hi Petrus, pade hi hampulu rodua ana guru-Na. 6 Napu ee mai, nerawa mui-'I hangkaniliu hi alimatu labi to pantuku-Na. Nadeara to nangkahilo-'I nerawa ee mai natuwuradapa duu ei mai. Naria mui to namateramo. 7 Napu ee nerawa mui-'I hi Yakobus, pade hi humawee rasul. 8 Kahuduana ntoto, nerawa mui-'I hi aku, bo aku ei mai ewa ngana to laiote poma tempona.
9 Lako humawee rasul, aku ei mai to moma naria bununa. Kakonona moma'a mahipato rauli rasul habana aku ei to nampahehaki jumaa Alatala. 10 Naupawee habana kabohe towe Alatala, aku nawali ewa ei, pade towe-Na to laiwaika-Na hi aku nadea bununa. Apa neliupi pobago ntomoku lako humaweera. Pobago ntomoku ee mai moma habana aku moto, naupawee habana kabohe towe Alatala nampodohe moto oa'a. 11 Aji, ba aku to noparata Kareba Belo hi komi ba to ntanina, nahibali aga. Koropokona Kareba Belo ee mai laiparata kami hi komi pade komi nawali neparahaya.
Nangkambelai katuwu nculita
12 Aji, ane kami nangkarebai hi komi nangkambelai Kristus to laipakatuwu nculi lako lentongora to mate, bewa pade naria komi to nanguli ane moma maria katuwu nculira to mate? 13 Ane moma maria katuwu nculi to mate, Kristus mui moma-'I natuwu nculi. 14 Ane nakono Kristus moma-'I natuwu nculi, moma naria bununa Kareba Belo to laiparata kami, pade moma mui naria bununa peparahayami. 15 Neliu lako ee, ane nakono to mate moma rapakatuwu nculi, nokalowo kami nangkambelai Alatala, apa iuli kami Alatala nampakatuwu nculi Kristus. 16 Apa ane nakono to mate moma laipakatuwu nculi, Kristus mui moma laipakatuwu nculi. 17 Pade ane Kristus moma-'I laipakatuwu nculi, moma naria bununa peparahayami pade batena moto komi natuwu rara dohami. 18 Moma wuwu ee, humawee to neparahaya hi Kristus to namateramo momara mahalama. 19 Ane rara katuwu i dunia ei motota mampaharumaka Kristus, kita ei mai tauna to neliu petoweita lako humawee manuhia.
20 Naupawee to nakono, Kristus ee mai laipakatuwu nculimi lako lentongo to mate. Hiami to pamulana ntoto laipakatuwu nculi lako kamatea-Na. Katuwu nculi Kristus eemi to nampakanoto ane humawee tauna to namateramo kana rapakatuwu nculi. 21 Habana doha hadua tauna, manuhia kana mamate. Wee moto mui, habana ingku hadua Tauna, manuhia kana rapakatuwu nculi lako kamateana. 22 Apa nahibali hante Adam namate, humawee manuhia halaku mulina kana mamate. Wee moto mui, nahibali hante Kristus laipakatuwu nculi, humawee manuhia to nohangu rara hante Kristus kana rapakatuwu nculi. 23 Naupawee butu-butu tauna rapakatuwu nculi mantuku tempona to laipakatantu amimi. Kristus pamulana ntoto to laipakatuwu nculimi lako kamatea-Na. Napu ee mei, ane marata nculidimi Kristus, hira to pantuku Kristus rapakatuwu nculi. 24 Maliu ee maratami tempona kahudua dunia ei. Tempo ee mei Kristus mampadagi humawee poparentaa, baraka pade roho anudaa. Napu ee Kristus mampopewai baraka-Na halaku Magau hi Alatala Tuama. 25 Apa Kristus kana moparenta halaku Magau duuna Alatala mobabei humawee bali-Na madagi. 26 Bali-Na to kahuduana Nadagi ee mai, kamatea. 27 Rara Buku to Nagaha laitulihi iwei, “Alatala nobabei hangu hangaa natundu hi Kristus.” To moma natundu hi Kristus Alatala aga, apa Alatalami to nobabei hangu hangaa natundu hi Kristus. 28 Aji, ane humaweenadimi laipakatundu hi Kristus, Kristus mui mei halaku Ana Alatala rapakatundu hi Alatala, to nobabei humaweena natundu hi Hia. Hante iwee, Alatala motomi to moparenta humaweena.
29 Ane tauna to namate moma rapakatuwu nculi, napa pade naria tauna to laidiu nampahambei to mate? Ane moma'i nakono to mate rapakatuwu nculi, moma naria bununa laidiu nampahambei to mate. 30 Ane to mate moma rapakatuwu nculi, napa bununa kami ei butu eona nantingohi kahehaa bo pehehakia? 31 Ompi-ompi, butu eona'a nantingohi pehehakia hampena ke nono mamate. Moma'a nokalowo nanguli ee! Nanotomi ane nagoe mpuu raraku nampekiri komi to nohangu rara hante Pueta Yesus Kristus. Aji, nanotomi ane moma'a nokalowo nanguli lauria. 32 I ngata Efesus aku nampaewa tau-tauna to naheke ewa binata. Ane mantuku pampekiri manuhia, napa bununa hi aku mantingohi kahehaa ewa ee mai ane moma'a mampaharumaka rapakatuwu nculi? Ane to mate moma rapakatuwu nculi, nabelo laupi ane tatuku jarita to nanguli iwei, “Maitamo mangkoni pade manginu, apa maile mamatetamo.” 33 Nemo komi mahalatara. “Tauna to nabelo ingkuna mawali madaa ingkuna ane mobale ba moema'i hante tauna to nadaa ingkuna.”a 34 Pakanoto belo rarami pade nemopa mobabei doha! Apa naria komi to poma nangincani Alatala. Ei mai laiuliku bona maea komi.
Nangkambelai katuwu nculi wotota
35 Naupawee baka maria to mepekune iwei, “Bewa to mate rapakatuwu nculi? Pade hante woto to bewara mei matuwu nculi?” 36 Nadoyo mpuu tauna to nepekune ewa ee mai. Napa to laihawumi, moma'i matuwu ane moma'i mamate ncala. 37 Pade to laihawumi moma puu tinuda ee mai, naupawee behana aga, ewa beha gando ba beha ntanina. 38 Naupawee Alatala nampawaika beha ee mai hangu woto, nantuku dota-Na moto. Alatala nampawaika butu-butu beha hore wotora moto. 39 Humawee woto moma nahibali. Woto manuhia nontani hante woto binata, nontani hante woto tonci, nontani hante woto bau. 40 Iwee moto mui to naria i langi pade to naria i dunia. To naria i langi nontani moto muihawo karambana, iwee moto mui to naria i dunia. 41 Tari eo nontani hante tari wula, pade tari wula nontani hante tari betue-betue, pade tari betue to hangu nontani hante tari betue to ntanina. 42 Wee moto mui mei hante tauna to namate pade rapakatuwu nculi. Woto to laitana ee mai, woto to mamala mapope. Naupawee woto to rapakatuwu nculi ee mei, woto to moma mapope. 43 Tempo woto ee mai laitana, nadaa tarina pade nalente. Naupawee tempo woto ee mai rapakatuwu nculi, mabelo tarina pade maroho. 44 To ratana ee mai woto manuhia biaha, to rapakatuwu nculi ee mai woto to Napopewai Inoha to Nagaha. Aji, naria woto manuhia biaha, naria mui woto to Napopewai Inoha to Nagaha. 45 Ewa naria laitulihi rara Buku to Nagaha iwei, “Manuhia pamulana Adam, nawali to natuwu.” Naupawee Adam to ngkapuri nawali Inoha to nepakatuwu. 46 To pamulana narata, woto lako dunia, moma woto to Napopewai Inoha to Nagaha. Napu ee pade maratadi woto to Napopewai Inoha to Nagaha. 47 Manuhia to pamulana, manuhia biaha to laipajadi lako awu tana. Naupawee Manuhia to ngkapurina narata lako huruga. 48 Woto humawee manuhia i dunia nahibali hante woto Adam, laipajadi lako awu tana. Naupawee humawee manuhia to nawali todea huruga mamparata woto to nahibali hante woto Kristus to narata lako huruga. 49 Tempo ei, wotota nahibali hante woto Adam to laipajadi lako awu tana. Wee moto mui ngkapurina, wotota mei mahibali hante woto Kristus to narata lako huruga.
50 Ompi-ompi, to mingki ku'ulika komi iwei: Wotota ei ihi pade raa aga, to mamala mamate bo mapope. Wotota ei moma mamala mehua i rara poparentaa Alatala i huruga, apa i huruga moma naria kamatea. 51 Epe belo komi, kukewoka komi to laipopalerui Alatala lako ilodo iwei: Ane marata nculipi Pue Yesus, mariatadapa to poma mamate. Naupawee humaweeta mei rabaliki, belo to natuwutadapa belo mui to namateramo. 52 Hampiniri mata humaweeta rabaliki, tempo malaeka Pue mampopomoni tarompe to kahuduana. Habana tempo tarompe to kahuduana rapopomoni, tauna to namateramo rapakatuwu nculi hante woto to moma mamala mamate, pade humaweeta mei rabaliki. 53 Apa wotota to mamala mamate bo mapope ei kana rahambei hante woto to moma mamala mamate bo mapope. 54 Ane rahambeidimi woto to mamala mamate bo mapope hante woto to moma mamala mamate bo mapope, rapaganaimi mei lolita Pue to laitulihi iwei, “Alatala nampadagi kamatea. Momami naria kamatea.”
55 “He kamatea, nadagimoko.
He kamatea, momami naria barakamu mampakaheha manuhia.”
56 Baraka kamatea to nampakaheha manuhia neumba lako doha. Pade doha naria habana manuhia nantiboki atura rara patudu Taurat. 57 Naupawee kana mosukuruta hi Alatala, apa nopabetami Pueta Yesus Kristus pade kita mui laiwaika popabeta. 58 Etumo, ompi-ompi to laipotoweku, pakaroho rarami, nemo mokarara, pade mokehi moto oa komi rara bago Pue! Apa ncanimi motomi, ane nohangu rara komi hante Pue humawee to ipobagomi naria bununa.