Pampakulea to laiwaika Inoha to Nagaha kana rapake mampakaroho jumaa
14
1 Pehimukui mpuu bona mamala komi mampotowe tau ntanina pade pehimukui muimi bona mitarima pampakulea lako Inoha to Nagaha, koropokona pampakulea moparata peboha Alatala. 2 Hema to nampake baha Inoha to Nagaha, moma'i nojarita hi manuhia, naupawee hi Alatala. Apa moma hema to nangincani napa to iulina. Habana Inoha to Nagaha nopanuntu'i nanguli hangu hangaa to laipopalerui. 3 Naupawee hema to noparata peboha Alatala, hia nojarita hi manuhia. Hia nampakaroho peparahaya jumaa, nopatudu bo nampakasana rarara. 4 Hema to nampake baha Inoha to Nagaha, hia nampakaroho peparahayana moto. Naupawee hema to noparata peboha Alatala, hia nampakaroho peparahaya jumaa. 5 Dotaku bona humaweemi mampake baha Inoha to Nagaha, naupawee nelabi ntotopi kabelona ane humaweemi moparata peboha Alatala. Habana tauna to noparata peboha Alatala neliupi pobununa lako tauna to nampake baha Inoha to Nagaha. Naupawee nabelo moto mui ane tauna to nampake baha Inoha to Nagaha ee mai mobatuani napa to iulina bona jumaa to mangepe marohoki peparahayara.6 Aji ompi-ompi, ane rapana tulau'a hi komi pade mampake baha Inoha to Nagaha, moma naria bununa hi komi. Naupawee ane tulau'a pade kupadolaka komi napa to laikewoka-Na'a Alatala ba lolita-Na to poma incanimi ba moparata peboha-Na ba mopatudu'a hi komi, ee mai naria bununa. 7 Nahibali hante parewa to moma naria inohana naupawee nomoni, ewa tulali pade kahapi, ane tabubua ratawui pade rakado'i bewa rancani ulia to laipopomonina? 8 Pade ane tarompe moma'i natantu monina ratawui, natantu amimi moma maria tantara to mahiromu rau mohiwali. 9 Wee moto mui komi to nampake baha Inoha to Nagaha. Ane moma'i manoto napa to iulimi, bewa rancanira tauna to iulimi? Moma naria bununa to iulimi apa komi nahibali hante tauna to nampojaritaka ngolu.
10 Nadea ngaa baha i dunia ei, moma muikuwo ncaniku hangkua kadeana. Naupawee humawee baha naria batuana. 11 Ane maria tauna mampojaritaka'a hante baha to moma incaniku batuana, tauna ee laihiloku ewa to rata'i. Hia mui nangkahilo'a ewa to rata. 12 Wee moto mui hante komi. Laipehimukuimi mpuu bona mitarima pampakulea lako Inoha to Nagaha. Naupawee to koropokona, kana mipake mpuu pampakulea ee bona mampakaroho peparahaya jumaa.
13 Etumo, butu tauna to nampake baha Inoha to Nagaha, kana mohambaya'i, bona Alatala mampawaika'i pampakulea mobatuani to iulina hante baha Inoha to Nagaha ee mai. 14 Habana ane mohambaya'a mampake baha Inoha to Nagaha, kakonona inohaku aga to nohambaya, naupawee pekiriku moma. 15 Aji, napa to kana kubabei? Ei mai to kana kubabei: Mohambaya'a hante inohaku, pade mohambaya mui'a hante pekiriku. Moulia'a mampaune Alatala hante inohaku, pade moulia mui'a mampaune Alatala hante pekiriku. 16 Habana ane mosukuruko hi Alatala mampake baha Inoha to Nagaha, natantu amimi tau ntanina to naria i hee moma mamala manguli “amin” habana posukurumu ee, apa moma incanira napa to iulimu. 17 Naupa neliu mpuu kabelona posukurumu ee mai, moma'i naria bununa habana moma'i nampakaroho peparahaya tau ntanina.
18 Nosukuru'a hi Alatala, habana laiwaika'a pampakulea nampake baha Inoha to Nagaha neliu lako hi komi pura. 19 Naupawee rara kahiromua jumaa laipokonokupi nopatudu tauna hante nanguli alima mati baha to namala laipaha. Ee mai neliupi kabelona lako ncobu matina rara baha Inoha to Nagaha to moma'i laipaha.
20 Ompi-ompi, nemo komi mampekiri ewa ngana kodi. Komi kana mampekiri ewa tauna to nabohemi. Naupawee ane nangkambelai to nadaa, komi kana mampekiri ewa ngana kodi to poma incanina noingku to nadaa. 21 Rara patudu Taurat naria laitulihi iwei,
“Pue nanguli, ‘Mojarita-'A mei hi todea-Ku ei
mampake tauna to nontani bahara
pade mampake ngudura to rata,
naupawee moma muira madota mangepe-'A.’ ”
22 Etumo, kakonona pampakulea nampake baha Inoha to Nagaha ee mai hangu tanda to laiwaika hi tauna to moma neparahaya, moma laiwaika hi tauna to neparahaya. Bo pampakulea noparata peboha Alatala ee mai tanda to laiwaika hi tauna to neparahaya, moma hi tauna to moma neparahaya. 23 Aji, rapana hangu jumaa mahiromu pade butu tauna mampake baha Inoha to Nagaha, pade mehuaramo tauna to mingki mangincani Kareba Belo ba tauna to pomara neparahaya, apa moma mei raulira nagilamo komi? 24 Naupawee ane humaweemi moparata peboha Alatala, pade mehua tauna to poma neparahaya ba to mingki mangincani Kareba Belo, peboha Alatala to miparata ee mampakanoto rarana ane nadea dohana i tingoo Alatala, hampena ewa to laibotuhimi'imi. 25 Humawee to laipopaleruina i rara bongona rancanimi, pade motingkodu'i mepue hi Alatala pade manguli, “Mpuu-mpuu Alatala naria i lentongomi!”
Atura-atura rara kahiromua jumaa
26 Aji ompi-ompi, nabelo mpuu ane tempomi mahiromu, maria to moulia mampaune Pue, maria to mopatudu, maria to mopadola to laikewo Alatala, maria to mampake baha Inoha to Nagaha, maria to mobatuani napa to iuli hante baha Inoha to Nagaha ee mai, pade humaweena lauria kana mibabei mampakaroho peparahaya jumaa. 27 Ane maria komi to mampake baha Inoha to Nagaha, rodua aga. Nadea ntotomi tolu dua. Pade nemora mojarita mahintou, kana momehambeira hadua bo hadua, pade kana maria hadua tauna to mobatuani to iulira hante baha Inoha to Nagaha ee mai. 28 Ane moma maria to mobatuani, hira to nampake baha Inoha to Nagaha ee mai weturamo mowotu rara kahiromua jumaa. Mamala motora mojarita hi Alatala naupawee mojarita rara bongora aga.
29 Hira to laiwaika pampakulea moparata peboha Alatala, rodua ba tolu dua lako hi hira kana moparata peboha Alatala ee mai pade to ntanina mopantarui napa to iulira, ba lako hi Alatala mpuudi ba moma. 30 Naupawee ane maria to ntanina to noncuna i hee ngkali mantarima to laikewo Alatala, tauna to bulana nojarita ee mai kana mentuu mojarita. 31 Apa humaweemi mamala moparata peboha Alatala hadua bo hadua, bona humaweemi mamala meguru pade marohoki rarami. 32 Tauna to laiwaika pampakulea noparata peboha Alatala, kana nabuku mantanee rarana, ncanina bulauma'i mentuu mojarita. 33 Habana moma ipokono-Na Alatala pogambara to nagado. To ipokono-Na pogambara to nanone aga, ewa kabiahaa i humawee jumaa Alatala.
34 Rara kahiromua jumaa, bangkele nemora mowotu, apa momara laipaliu mojarita. Hira kana matundu ewa to laiuli mui rara patudu Taurat. 35 Ane maria to mingki rancanira, rapekunera hi balailora i houdimi. Habana moma mahipato bangkele mojarita rara kahiromua jumaa.
36 Lolita Alatala moma narata lako hi komi. Pade moma mui wuwu hi komi lolita Alatala laiparata. 37 Ane maria tauna to manguli hia nabi ba naria pampakulea to laiwaika Inoha to Nagaha hi hia, kana napangaku ane napa to laiulikaku komi ee mai, parenta Pue. 38 Naupawee ane moma'i napangaku, nemo'i miepe.