Nangkambelai towe
13
1 Naupa mamala'a mampake humawee baha manuhia bo baha malaeka, ane moma maria toweku, nahibali moto'a hante goo ba gima to wule narimboho monina, moma naria ihina. 2 Naupa maria pampakuleaku moparata peboha Alatala, maria mui pampakuleaku mangincani hangu hangaa hampena laipahaku liwo-liwo to laipopalerui Alatala, pade maroho mpuu peparahayaku hampena mamala'a mampopoencu bulu, ane moma maria toweku, moma'a nobunu. 3 Naupa humawee to naria hi aku kupopewai hi to nakahiahi, pade wotoku kupopewai rapapuhi, ane moma maria toweku, humawee lauria moma naria bununa.4 Tauna to naria towena natantu ami nohabara'i, nabelo rarana, moma'i nohiri, moma'i nampaune wotona moto pade moma'i nahombo. 5 Moma'i nobabei ingku to nepakaea pade moma'i nampomaihi wotona moto. Moma'i nadoli nahodo pade moma'i noboli kahalaa tau ntanina. 6 Moma laipokagoena ane maria tauna nobabei ingku to nadaa. Naupawee laipokagoena ingku to nanoro. 7 Tauna to naria towena nohabara'i nangkolo humawee kahehaa rara katuwuna, laiparahayana moto oa dohena, moma naria hangkania naronto harumakaana nau napa to mawali rara katuwuna pade nohabara'i nantingohi hangu hangaa.
8 Towe ee mai moma maria kahuduana. Pampakulea noparata peboha Alatala hangkani tempo kana mahudu. Pampakulea nampake baha Inoha Alatala hangkani tempo kana mentuu. Pade pampakulea nangincani hangu hangaa hangkani tempo kana maronto. 9 Habana pampakulea nangincani hangu hangaa pade pampakulea noparata peboha Alatala naria kakuraana. 10 Naupawee ane maratadimi mei tempona, Alatala moto mei to mampakaganata, pade pampakuleata to naria kakuraana ee marontomi apa momami raparaluu.
11 Tempo kakodiakudipi, aku nojarita ewa ngana, raraku ewa ngana pade pampekiriku ewa ngana. Nabohe'apa, moma'amo nohipa ewa ngana. 12 Habana tempo ei, kita ewa tauna to nampanaa hangu hangaa i rara padoma pade moma'i narawa belo laihilota. Naupawee marata mei tempona hangu hangaa ee, tahilo matami. Tempo ei poma incanita belo hangu hangaa. Naupawee marata mei tempona tancani belomi hangu hangaa ee, nahibali hante Alatala nangincanita. 13 Aji, tempo ei naria tolu ngaa to kana tababei. Pamulana batena motota meparahaya hi Alatala. Karongaana batena motota mampaharumaka tipa Alatala. Pade katoluna batena motota momepotowe. Lako to tolu ngaa ee mai, pomepotowe ee to koropokona.