Hura Paulus rau hi jumaa i Roma
Popailodoa
Tempo Paulus notulihi hura ei hi jumaa i Roma, Roma ee mai ngata katidaa Magau Bohe Roma to laiuli Kaisar. Tempo ee mai, Magau Bohe Roma noparenta nadea mpuu ngata i dunia.
Paulus notulihi hura ei hi hira to neparahaya hi Pue Yesus i Roma. Patuju Paulus notulihi hura ei mai mopatudura nangkambelai koropoko patudu Kareba Belo, apa poma naria Paulus ba rasul ntanina rau noparata Kareba Belo hi hira. (Hilo Rm. 1:8-15.)
Naupawee naria amiramo tauna to neparahaya hi Pue Yesus i Roma. Moma incani napa pade nariara to neparahaya ee mai. Naria to nanguli, tauna to neparahaya eera mai to Yahudi to nangepe Kareba Belo to iparata Petrus i Yerusalem tempo eo bohe Pentakosta. (Hilo Kis. 2:1-13, 41.) Panculira i Roma, laiparatara hi dohe-dohera i hou-hou pepuea to Yahudi nangkambelai Kareba Belo to iepera i Yerusalem. Lako hira to Yahudi to neparahaya hi Yesus habana Kareba Belo to iepera i hou-hou pepueara ee mai, nopamulami naria jumaa-jumaa Kristus i Roma. Etu pade naria bahangkua kahiromua jumaa Kristus i hou-houra to neparahaya hi Yesus i Roma. (Hilo Rm. 16:5, 14, 15.) Naria muira to Yahudi to neparahaya hi Yesus to nangkewokara to moma Yahudi nangkambelai Kareba Belo ee mai, hampena nelabipi kadeara to moma Yahudi to nawali to pantuku Yesus.
Tempo Klaudius nawali Magau Bohe Roma, laipopalainara humawee to Yahudi lako Roma. Ane moma nahala, lauria nadupa mpae 49. Naupawee bahangkua mpae lako hee, laipaliuramo nanculi rau i Roma. (Hilo Kis. 18:2 pade Rm. 16:3.) Jumaa Kristus to pamulana ntoto nobaha hura Paulus ei, habagia kodi to Yahudi pade habagia bohe to moma Yahudi. Hira to moma Yahudi ei mai laipahara mui patudu agama to Yahudi. Hira nawali jumaa Kristus apa laiepera Kareba Belo lako to Yahudi to neparahaya hi Pue Yesus.
Tempo Paulus notulihi hura ei, lau mahudumi pomakoana katolungkanina nangkarebai Kareba Belo. Naria to nanguli, potulihina hurana ei tempona natida i Yunani tolu mula kahaena. (Hilo Kis. 20:2-3.) Tempo ee mai nahudu'imi noparata Kareba Belo i propinsi Siria, Kilikia, Galatia, Asia, Makedonia pade Akhaya. Pade noliwo'imi meongko rau mangkeni doi petulungi hi jumaa Alatala to netowei i Yerusalem, mantakora to i Roma pade mopamula mangkarebai Kareba Belo i Spanyol. (Hilo Rm. 1:10-13; 16:22-29).
Koropoko hura Paulus ei laitulihi i rara pasal 1:17 to nanguli iwei, “Apa i rara Kareba Belo ee mai Alatala nampopahiloi bewa-'I mampemakono manuhia i tingoo-Na. Hangaa aga dalana, kana meparahayata hi Alatala. Apa naria laitulihi rara Buku to Nagaha iwei, ‘Tauna to laipemakono habana peparahayana, kana matuwu duu kahae-haena.’ ”
Ihi buku ei
1. Tabe pade jarita pamulana (1:1-15)
2. Ihi patudu hura ei (1:16-17)
3. Humawee manuhia nadoha i tingoo Alatala (1:18–3:20)
4. Bewa manuhia mamala rapemakono i tingoo Alatala (3:21–5:21)
5. Tauna to neparahaya hi Yesus laibakaha lako baraka doha bo atura patudu Taurat pade laiwaika Inoha to Nagaha bona mamalara matuwu mantuku dota Alatala (6:1–8:39)
6. Napa pade nadea to Yahudi tempo ei momaramo nawali todea Alatala (9:1–11:36)
7. Ingku to mahipato halaku tauna to nantarima ahi rara Alatala (12:1–15:13)
8. Bago Paulus nangkarebai Kareba Belo hi tau-tauna to moma Yahudi, pade liwo Paulus rau i Roma (15:14-33)
9. Tabe kahuduana (16:1-27)