Hura Paulus rau hi jumaa i Roma
Tabe
1
1 Lako Paulus, batua Kristus Yesus, to laikio nawali rasul pade laipelihi bona mangkarebai Kareba Belo lako Alatala. 2 Kareba Belo ee mai laitipa-Na amimi Alatala lako ilodo pade laikarebaira nabi pade laitulihi rara Buku to Nagaha. 3 Kareba Belo ee mai nampojarita Ana Alatala. Halaku manuhia, Ana Alatala ee muli Magau Daud. 4 Naupawee, Hia ee mui Ana Alatala. Ee mai laipakanoto Alatala tempo-Na nampakatuwu nculi Ana-Na lako kamatea-Na hante baraka Inoha to Nagaha. Ana Alatala ee Yesus Kristus, Pueta. 5 Lako hi Yesus ee muimi laitarimaku kabohe towe Alatala. Laipajadi-Na'a rasul bona mopanuntu humawee tauna i dunia ei meparahaya bo matigu hi Pue Yesus Kristus. 6 Komi to i ngata Roma mui, laikio-Namo komi Alatala nawali todea to nantuku Yesus Kristus. 7 Hura ei laipakatuku hi komi to natida i Roma, to laipotowe Alatala pade laikio-Na nawali todea-Na. Mohambaya'a bona kabohe towe pade katuwu to nanone lako Alatala Tuamata, pade lako Pueta Yesus Kristus mampodohe komi.Paulus mingki rau i Roma
8 Pamula-mulana nosukuru'a hi Alatala hante petulungi Yesus Kristus, apa neparahayamo komi hi Yesus pade peparahayami ee laiepe tauna i humangkulili duniami. 9 Ane nohambaya'a, lailingaku moto oa komi. Alatala moto habiku ane napa to laiuliku lauria nakono. Hiami Alatala to laipobagokaku hante raraku mpuu. To laipobagoku, noparata Kareba Belo nangkambelai Ana-Na. 10 Nohambaya'a hi Alatala, bona hante dota Alatala maria logaku tulau mampatako komi. 11 Apa mingki'a motomu hante komi bona mampakaroho peparahayami hante pampakulea to laitarimaku lako Inoha to Nagaha. 12 Patujuku bona ane ritu'a dohemi, peparahayaku mampakaroho rarami pade peparahayami mampakaroho raraku. Aji, mamalata momepakaroho mporara. 13 Ompi-ompi, dotaku bona mincani ane nadea ngkani'amo noliwo tulau hi komi, naupawee duu ei naria oadipi to nampalawa'a. Mingki'a tulau mobago ritu, bona kuhilo muikuwo wua lako to kupobago hi komi, ewa wua to laihiloku hi hira tauna to moma Yahudi i ngata ntanina. 14 Kana kuparata Kareba Belo ee mai, belo hi hira to no'oha i ngata bohe, belo mui hi hira to no'oha i ngata kodi, belo hi hira to naria hikolara, belo mui hi hira to moma naria hikolara, habana nabohe mpuu towe Alatala hi aku. 15 Etu pade mingki mpuu'a mangkarebai Kareba Belo hi komi to natida i Roma.
Bewa Alatala mampemakono manuhia i tingoo-Na
16 Moma'a naea nangkarebai Kareba Belo, apa Kareba Belo ee mai roho Alatala to nampakahalama humawee tauna to neparahaya. Pamula-mulana to Yahudi, napu ee to moma Yahudi. 17 Apa i rara Kareba Belo ee mai Alatala nampopahiloi bewa-'I mampemakono manuhia i tingoo-Na. Hangaa aga dalana, kana meparahayata hi Alatala. Apa naria laitulihi rara Buku to Nagaha iwei, “Tauna to laipemakono habana peparahayara, kana matuwu duu kahae-haena.”
Hodo Alatala hi manuhia to moma nampangaku-'I halaku Alatala
18 Lako huruga Alatala nampopehuwu hodo-Na hi humawee manuhia to moma nengkoru hi Hia pade to nadaa ingkura. Ingkura to nadaa ee mai nampalawa tau ntanina mangincani patudu to nakono nangkambelai Alatala. 19 Apa napa to mamala rancanira manuhia nangkambelai Alatala nanotomi hi hira, habana laipakanoto-Nami Alatala. 20 Baraka Alatala to moma maria kahuduana pade hipa-Na halaku Alatala moma ami'i namala laihilo. Naupawee hinungkai dunia laipajadi, humawee lauria namala laihilo lako humawee to laipajadi-Na. Aji moma naria dalana manuhia mampemakono ingkura i tingoo Alatala. 21 Apa naupa manuhia nangincani Alatala, moma-'I laipemabohera halaku Alatala, pade momara nosukuru hi Hia. Manuhia wule nampekiri to moma naria bununa. Pampekirira nadoyo, pade rarara nawali nalimau. 22 Hira nanguli nataualura, bo nadoyorada. 23 Alatala to natuwu duu kahae-haena moma laipemabohera. To laipemabohera, patung-patung to laibabei ewa tari manuhia, tonci-tonci, binata-binata to nopaa opo pade binata-binata to nengkanele, to kana mamate pura.
24 Etu pade laipalele-Nara Alatala noingku nantuku dota rarara to nadaa, alaana nobabei gau to nadaaramo hore hira moto. 25 Patudu Alatala to nakono laihapuakara, pade patudu kalowo laudi to laiparahayara. Momara nadota nepue hi Alatala. To laipuera pade to laipobagokara, to laipajadi Alatala ee laudi, bo Alataladi to mahipato raune duu kahae-haena. Amin.
26 Etu pade Alatala nampalelera nobabei dota rarara to nepakaea. Pade bangkele-bangkelera momaramo nogau ewa kahipatoana. Pogau to laibabeira momami pogau to nahipato. 27 Wee moto mui balailo-balailora momaramo nogau hante bangkelera ewa kahipatoana. Neliu gaga dota rarara momepogau hore hira balailo. Alaana nobabei to nepakaearamo hore hira balailo, pade i rara wotora laitarimara pehuku to nahipato hante ingkura to nahala. 28 Momara nadota nampabila Alatala, alaana Alatala nampalelera nampekiri hangu hangaa to nadaa, hampena hira nobabei gau to moma nahipato. 29 Rarara naponu hante hangu hangaa to nadaa, ingkura nadaa, naliu gantara pade nadaa rarara. Hira naponu hante hingki rara. Bagora nepatehi, nobungka, nebagiu, nampakagero katuwu tau ntanina pade netunturaka. 30 Hira etu mai to pepakudaa, to nampodaa Alatala, to moma naria adara, to nampolinga wotora moto, to nahombo pojaritara, to nataualu nobabei to nadaa, pade to moma nanturuhi totuara. 31 Moma naria unto woora, momara namala raparahaya, moma naria towera pade moma naria ahi rarara hi tau ntanina. 32 Naupa laincanira atura Alatala ane humawee to nobabei ingku ewa lauria kana rahuku mate, momara naeka. Apa moma wuwu laibabeira ingku to nadaa ee mai, nahituju muirapa hante tauna to nobabei ingku ee.