Pehuku Alatala hi humawee tauna
2
1 Ompi-ompi, nau hema muiko, momako mamala mampahalai tau ntanina, apa moma muikokowo natebakaha lako hala. Ane muhalai tau ntanina, kakonona wotomu moto to laihalaimu. Apa iko to nampahalai tau ntanina, laibabeimu moto muikowo ingku to ewa ee. 2 Laincanita ane Alatala nampahuku tauna to noingku ewa ee, natantu amimi pobotuhi-Na nakono. 3 Iko manuhia, laihalaimu tauna to nobabei ingku to nadaa, bo iko, iwee moto mui ingkumu. Iulimu iko, momako Nahuku Alatala? 4 Nemo mupandaente belo rara Alatala pade pohabara-Na to nabohe mpuu hi iko. Kana mulinga, patuju kabelo rara Alatala hi iko bona mopanuntuko mancoro lako dohamu. 5 Naupawee nakoo gaga raramu pade momako nadota nancoro lako dohamu. Hante ingkumu to ewa ee mai, iko motomi to nampatambai kantomo pehuku to mutarima i eo kahudua dunia, tempo hodo bo pehuku Alatala to nanoro rapakadupa. 6 Alatala mei mampabalahi humawee tauna mantuku ingkura moto. 7 Naria tauna to natigu nobabei ingku belo habana nampaharumaka pampemabohe, pebila pade katuwua to moma maria kahuduana lako Alatala. Hi tauna to ewa ee Nawaika Alatala katuwua to moma maria kahuduana. 8 Naupawee naria mui tauna to natuwu nampomaihi wotora moto. Momara nadota nanturuhi patudu to nakono. To laituruhira dota rarara to nadaa aga. Tauna to ewa ee mamparata hodo pade pehuku lako Alatala. 9 Humawee tauna to nadaa ingkura, mamparata kahehaa pade kapepaa, pamula-mulana to Yahudi, napu ee to moma Yahudi. 10 Naupawee humawee tauna to noingku belo, mamparata pampemabohe, pebila pade kanonea rara, pamula-mulana to Yahudi, napu ee to moma Yahudi. 11 Habana Alatala moma-'I nampelihi tauna.12 Humawee tauna to moma Yahudi moma incanira patudu Taurat. Ane mobabei dohara kana Nahukura Alatala, naupawee momara Nahuku mantuku patudu Taurat. Humawee tauna to Yahudi laipatudu manturuhi patudu Taurat. Ane mobabei dohara kana Nahukura Alatala mantuku patudu Taurat. 13 Apa moma tauna to nangepe patudu Taurat to Napemakono Alatala, naupawee tauna to nampoingkuka patudu Taurat to Napemakono. 14 Tau-tauna to moma Yahudi moma incanira patudu Taurat. Naupawee ane maria lako hi hira pampekirira moto nopakenira noingku belo ewa to laitulihi rara patudu Taurat, naupa moma incanira patudu Taurat ee, napa to laipekirira eemi to nawali patudu Taurat hi hira. 15 Hante iwee hira nampopahiloi ane ihi patudu Taurat natetulihi i rarara. Laincanita ee mai apa naria tempona pekirira to i rarara ee nampahalai wotora moto, pade naria mui tempona pekirira to i rarara ee nanguli ane nakono hi hira. 16 Aji, Alatala mei mampabotuhi humawee tauna. Ee mei madupa tempo Alatala mampahuku humawee manuhia mantuku pampekirira to nateleru i rarara. Pehuku Alatala ee mei Nababei Kristus Yesus. Eemi ihi Kareba Belo to laikarebaiku.
Patudu Taurat pade ada popatini moma mampakahalama to Yahudi
17 Bewa komi to Yahudi? Komi nampentidai patudu Taurat. Laipolingami wotomi, apa pekirimi todea to laipelihi Alatala komi. 18 Laincanimi dota Alatala, pade laipatudu komi nangkambelai patudu Taurat hampena laincanimi uma to nabelo pade uma to moma nabelo. 19 Laiparahayami mpuu ane komi to nopanuntu to buro, to nangkeni kabaa hi tauna to i kalimauana, 20 to nopagurura to nadoyo, pade to nopatudura tauna to pomara naria laipatudu, apa laincanimimi patudu Taurat hampena laipekirimi nataualu komi pade nahipato komi mopatudura tau ntanina. 21 Aji, komi nopatudu tau ntanina. Napa pade moma patudumi wotomi moto? Komi nopatudu, “Nemo mangio.” Napa pade komi moto nangio? 22 Komi nopatudu, “Nemo mogau hala.” Napa pade komi moto nogau hala? Komi nampodaa humawee pue ntanina. Napa pade komi moto namparampaki ihi hou pepuea hi pue ntanina? 23 Komi nampolinga patudu Taurat. Napa pade komi moto nantiboki patudu Taurat? Hante ingkumi lauria laipoporemi Alatala. 24 Ewa naria laitulihi i rara Buku to Nagaha iwei, “Habana komimi hampena hanga Alatala laipoporera tauna to moma Yahudi.”
25 Laitini naria ami bununa, ane matigu komi manturuhi patudu Taurat. Naupawee ane mitiboki patudu Taurat, momami naria bununa popatinimi. 26 Aji, ane tauna to moma Yahudi to momara laitini manturuhi napa to laituntu patudu Taurat, Alatala mampopohibalira hante tauna to Yahudi to laitini. 27 Kahuduana mei, tauna to moma laitini pade nampoingkuka patudu Taurat kana mampahalai komi, apa naria patudu Taurat hi komi pade laitini komi, naupawee laitibokimi patudu Taurat ee mai. 28 Habana to laiuli to Yahudi, moma hira to laipomulika to Yahudi, pade to laiuli petini, moma petini to laibabei i wotota. 29 Naupawee to laiuli koro to Yahudi, tauna to rarana mpuu-mpuu to Yahudi. Pade to laiuli koro to laitini, tauna to rarana laitini Inoha Alatala, moma to laitini nantuku patudu to laitulihi. Tauna to ewa ee mai mantarima peune lako Alatala, moma lako manuhia.