Tutura Nangkambelai Rasul-Rasul
Popailodoa
Buku ei buku karonguna to laitulihi Lukas, nopadola ihi buku Kareba Belo to laitulihina. Rara bukuna to rongu ee mai laitulihikana hi Teofilus, hadua tauna to nariami laipatudu nangkambelai Pue Yesus(Luk. 1:1-4). Ewa kabiahaa to potulihi buku tempo ee mai, kakonona bukuna ee moma wuwu laitulihikana hi Teofilus, naupawee bona rabaha bo raepera mui madea tau ntanina.
Rara buku karonguna ei, Lukas nampotutura to laibabeira to neparahaya hi Pue Yesus, nopamula lako kateongko Pue Yesus rau huruga. Rara buku ei roduara rasul Pue Yesus to koropokona laipojarita. Hira ee mai to laikahangai Petrus (pasal 1–12) pade Paulus (pasal 13–28). Rara buku ei, tabaha mei napa koropoko patudura rasul Pue Yesus (rapana 2:32-33, 36, 38-39; 4:12; 13:26-33, 38-39; 16:31).
Kapoma-Na Pue Yesus nateongko rau huruga, laiulika-Nara rasul-Na iwei, “Ane manaudimi mei Inoha to Nagaha hi komi, mitarimami baraka, pade komi mei mawali habi-Ku i Yerusalem pade i humangkulili Yudea bo Samaria duu marata i wuntu dunia.” (Kis. 1:8). Eemile koropoko ihi buku ei. Inoha to Nagaha moto nampawaikara to neparahaya hi Pue Yesus baraka bona mamalara mampotolele Kareba Belo, pamula-mulana i Yerusalem, napu ee i Yudea pade i Samaria, duuna i ngatara to moma Yahudi, pade kahuduana narata i Roma.
Pamula-mulana to neparahaya hi Pue Yesus ee mai to Yahudi aga, pade Kareba Belo ee mai laiparata muntu hi to Yahudi moto mui (11:19). Naupawee nadeara to Yahudi moma namparahaya Kareba Belo ee mai. Napu ee Kareba Belo laiparata mui hi to moma Yahudi (hilo 13:45-46; 18:6; 28:28). Rara pasal 15, Lukas nampojarita libu bohe to laibabeira rasul Pue Yesus i Yerusalem. Rara polibuara ee mai laibotuhira ane to moma Yahudi to neparahaya hi Pue Yesus momaramo rapahuru mantuku patudu Taurat. Apa humaweera to neparahaya hi Kristus belo to Yahudi ba to moma Yahudi laipakahalamaramo habana kabohe towe Alatala (15:11).
Ihi buku ei
1. Bagora rasul Pue Yesus i Yerusalem (1:1–7:60)
2. Kareba Belo laipotolele i Samaria pade Yudea (8:1–12:25)
3. Pomakoa Paulus pamulana (13:1–14:28)
4. Libu bohe i Yerusalem (15:1-35)
5. Pomakoa Paulus karongkanina (15:36–18:22)
6. Pomakoa Paulus katolungkanina (18:23–21:16)
7. Paulus laitarungku i Yerusalem pade i Kaisarea (21:17–26:32)
8. Pomakoa Paulus rau i Roma (27:1–28:31)