Pomakoa Paulus rau i Yerusalem
21
1 Nahudupa kami nopahabi hi hira penatua lako Efesus ee, laipalahi kamiramo i hee pade kapopola neongkomo kami hante kapala tahi rau lewuto Kos. Kanailena naratamo kami i lewuto Rodos. Lako hee, nadolamo kami rau i Patara. 2 I Patara, lairata kami kapala tahi to medipo rau i Fenisia. Nencawimo kami i kapala tahi ee pade neongkomo kami. 3 Narawami lewuto Siprus mali pangkai kami. Naupawee nadola kami rau i Siria. Nehani kami i Tirus apa kapala to ihawi kami ee mampopanau bara to ikenina i hee. 4 Pitu eo kami no'oha i hee. Laitako kamira tauna to neparahaya hi Yesus, pade hira nampatagi Paulus bona nemo'i rau Yerusalem. Netagira habana Inoha to Nagaha nopanuntura. 5 Naupawee, temponapi kapala to ihawi kami ee meongko, laipalahi kamiramo pade neongkomo kami nopadola pomakoa kami. Humaweera tauna to neparahaya hi Yesus ee, hante bangkelera bo anara, nampabawa kami duu narata i hawaliku ngata. Narata i talinti notingkodu puramo kami nohambaya. 6 Napupa kami nehabi, nencawimo kami i kapala tahi pade nanculiramo tauna to neparahaya hi Yesus ee rau i houra.7 Lako Tirus eemo kami nokapala tahi duu narata i Ptolemais. Narata ria, rau mui kami nampatako pade nampatabera ompi-ompi to hangu kaparahayaa. Haeo kami no'oha dohera i hee. 8 Kanailena, neongko muimo kami lako Ptolemais ee rau i Kaisarea. Karata kami i ria, raumo kami no'oha i hou Filipus, to nampotolele Kareba Belo. Hia eemi wengi hadua lako pitu dua to laipelihi jumaa i Yerusalem nampatulungira rasul. 9 Opo dua anana bangkele pura. Anana eera mai natoronaaramo pade humaweera namala noparata peboha Alatala. 10 Bahangkua eo kami no'oha i hee, neongami lako Yudea hadua nabi to laikahangai Agabus. 11 Tumai'i hi kami pade nangala pampou peko Paulus. Laipouna paana pade palena moto hante pampou peko ee pade nojaritami, “Iulina Inoha to Nagaha, ewa ei mei tumpu pampou peko ei rahilura to Yahudi i Yerusalem pade rapopewai hi hira to moma Yahudi bona raduahira'i.”
12 Nangepe lauria, kami hante hira to neparahaya hi Yesus i Kaisarea ee nangulika Paulus bona nemo mpuu'i rau Yerusalem. 13 Naupawee Paulus nampahonoi kami, “Napa pade nakeo komi? Nampakagero raraku lau komi. Nahadia'amo rahokora i ria. Nau rapatehi mui'a habana hanga Pue Yesus, nahadia'amo.”
14 Moma iepena napa to iuli kami, alaana nentuu laumo kami nangulika'i. Iuli kami, “Palelemi dota Pue to madupa.”
15 Bahangkua eo kahae kami no'oha i Kaisarea. Naliu ee nangkanimpumo kami pade neongkomo kami rau Yerusalem. 16 Bahangkua dua to neparahaya hi Yesus lako Kaisarea nantuku kami. Laipakenira kami rau i hou Manason to Siprus, apa i ria kami mei mo'oha. Nahaemi Manason ee neparahaya hi Yesus.
Paulus nampotomuka Yakobus i Yerusalem
17 Karata kami i Yerusalem, ompi-ompi to hangu kaparahayaa nampotomu kami hante goe rarara. 18 Kanailena, raumo kami nampotomuka Yakobus. Hee purara humawee penatua i Yerusalem. 19 Laitabenaramo Paulus. Nahudu ee, laituturana purami Paulus to laibabei Alatala rara bagona nokarebai Kareba Belo hi tauna to moma Yahudi.
20 Nangepe lauria, humaweera to i hee nampaune Alatala. Napu ee laiulikara'i Paulus, “Ompi kami Paulus, bona muncani, nadea ncobumo tauna to Yahudi neparahaya hi Yesus. Hira ee mai to natigu nanturuhi patudu Taurat to laiparata Musa. 21 Naupawee, ieperami ane iko nopatudu to Yahudi to natida i ngatara to moma Yahudi bona rabakahara patudu Musa, nemo ratinira anara pade nemora mantuku ada to Yahudi. 22 Tantu raepera mei peongamu ei. Aji, bewamo? 23 Aginalau mutuku jarita kami. Naria opo dua doheta ei to notiparamo hi Pue. 24 Koimoko dohera mobabei ada pampegaha woto mantuku patudu agama Yahudi. Bayarimi kurban to rapakera mepue bona mamalara rakokulori halaku tanda ane laipaganairami potipara hi Pue. Ane wee, rancanirami humawee tauna ane napa to laiepera nangkambelai iko moma nakono. Apa rahilorami mei ane iko moto mui nanturuhi patudu Taurat. 25 Nangkambelai to moma Yahudi to neparahaya hi Yesus, laipakatu kamimi hura nangkambelai atura-atura to laibotuhi kami. Ihi hura ee, nemora mangkoni napa to laikeni nepue hi pue ntanina, nemora mangkoni raa, nemora mangkoni binata to namate laibaga pade nemora mogau hala.”
26 Kanailena, raumi Paulus dohera to opo dua ee mobabei ada pampegaha woto. Napu ee raumi Paulus i Hou Alatala mangkewo ane bahangkua eopi pade mahududi pampegaha wotora. Mahudupi eo pampegaha wotora ee pade hore-horerada mobabei pojujua kurban.
Paulus laihoko
27 Lau mahudupi pitu eo pobabeia ada pampegaha woto ee, bahangkua dua to Yahudi lako propinsi Asia nampahilo Paulus i Hou Alatala. Napu ee laipaukeira todea pade laihokora Paulus. 28 Pade nongarera nanguli, “Epe komi to Israel, merapi tulungi! Eimi tauna to i rima-rima nopatudu mampaewata to Yahudi, patudu Taurat pade Hou Alatala ei. Moma wuwu ee, laikenina muipi tauna to moma Yahudi nehua i Hou Alatala, nampakarumu Hou Alatala to Nagaha ei.” 29 Iulira lauria, apa laihilora Trofimus to Efesus laipodohe Paulus i rara ngata. Pekirira, Paulus nangkeni tauna ee rau Hou Alatala.
30 Nogeho humangata Yerusalem. Humawee tauna nokumeno nahiromu i Hou Alatala. Laihokora Paulus pade laidiira rau i hawaliku karawaa Hou Alatala. Tempo ee mui womo karawaa Hou Alatala laiwunta. 31 Hamalira nampehimukui mampatehi'i, naria tauna rau nangkewoka komandaa tantara ane nogeho humangata Yerusalem. 32 Lauparia, dungku raumi komandaa ee nampahiromura bahangkua dua kapitee hante tantarana pade pari-parira rau i pogehoa ee. Hangka todea eera nampanaa komandaa hante tantarana narata, nentuuramo nangkadungkui Paulus. 33 Komandaa tantara ee nampamohuki Paulus pade nampahoko'i, pade laituduna tantarana mampahilu Paulus hante rongu rante. Napu ee nepekunemi komandaa tantara ee, hema'i Paulus kakonona pade napa to laibabeina. 34 Nariara lako todea ee nongare nanguli ewa ee, naria mui to nanguli ewa ei. Nogeho mpuu tauna hampena komandaa tantara ee moma incanina napa to kakonona nawali tempo ee. Etu pade laituduna bona Paulus rakeni i po'ohaara tantara. 35 Pentodera i oda, nogeho muiramo todea ee hampena Paulus laikowara tantaradimi. 36 Todea eera mai netuku pade nongare nanguli, “Patehimi tauna etu!”
Paulus nampotolawai wotona
37 Hangka para rakeni mehuami i rara po'ohaa tantara, nepekunemi Paulus hi komandaa tantara ee, “Mamala'a mojarita hodi tuama?”
Nehono komandaa ee, “Namalakotana nobaha Yunani? 38 Ane iwee, momako to Mesir to bou-bou ei nopakeni opo ncobu to powao nampaewa to poparenta pade nopakenira rau i tongo mpada to nabai?”
39 Nehono Paulus, “Moma. Aku ei to Yahudi lako Tarsus, ngata bohe to laidulu ncani i propinsi Kilikia. Kuperapi bona rawai'a loga mojarita hante todea lauria.” 40 Laipaliupi mojarita, raumi Paulus nokangkore i oda pade no'ongko palena hi todea eera mai. Nalinoramo hodi tauna. Napu ee nojaritami Paulus hante baha Ibrani.