Paulus rau Makedonia pade Yunani
20
1 Nanonepi pogehoa ee, Paulus nopahiromu tauna to neparahaya hi Yesus i Efesus pade laipakarohona rarara. Napu ee, nehabimi neongko rau i propinsi Makedonia. 2 Nahobo propinsi ee laidaokina rau hi tauna to neparahaya hi Yesus, nampawaikara nadea patudu to nampakaroho rarara. Napu ee raumi i Yunani. 3 Tolu mula'i no'oha i ria. Nahadiami ke meongko rau Siria mencawi kapala tahi, naria to nangkewoka'i kareba ane to Yahudi noliwo mampatehi'i. Alaana laibotuhina manculiki'i mantara i propinsi Makedonia. 4 Paulus laipodohera Sopater ana Pirus lako Berea, Aristarkhus pade Sekundus lako Tesalonika, Gayus lako Derbe, Timotius, pade Tikhikus bo Trofimus lako propinsi Asia. 5 Humaweera ee rau noilodo pade nampopea kami i Troas. 6 Naliupi eo bohe Roti to Moma Lairagii, neongkomo kami nampalahi Filipi nencawi kapala tahi. Ka'alima eona naratamo kami i Troas pade notomu hante hira. Pitu eo kami no'oha i ria.Eutikhus laipakatuwu nculi lako kamateana
7 Eo pamulana mingku ee, tempo kami nahiromu notubi-tubi roti pade nangkoni hingkani-ngkani, Paulus nampojaritakara tauna to i hee duu ntongo bengi, apa noliwo'i kamailena meongkomi. 8 Kami nahiromu i gandaria katolu uncuna. I gandaria ee mai nadea poindo laitutuni. 9 Hadua kabilaha to ikahangai Eutikhus noncuna i kumbeo. Apa nahae gaga'i Paulus nojarita, naroo mpuumihana mata Eutikhus hampena natepaleta'i i kumbeo ee pade nanawu lako lolo gandaria katolu uncuna ee. Pehompora dohena rau mampaongko'i, bila namatemi. 10 Naupawee Paulus nehompo rau nampoturui woto kabilaha ee pade laikapuina. Iulina, “Nemo majuu rarami. Natuwu nculimi.” 11 Panculi Paulus rau i gandaria to i lolona, laitiranami roti pade nangkoni hangkaniramo. Nahudu nangkoni, nahaeradapa nojarita duuna hampepulo. Napu ee, neongkomi Paulus. 12 Pade kabilaha to natuwu nculi ee laibawarami rau i houna, pade nagoe mpuu rarara.
Pomakoa Paulus lako Troas rau Miletus
13 Noilodomo kami neongko rau i Asos nencawi kapala tahi. I riadamo kami motomu hante Paulus ewa pebohana hi kami, apa Paulus nomako mpaa moto'i rau i Asos. 14 Notomupa kami i Asos, nencawimi Paulus dohe kami i kapala tahi pade nadolamo kami rau i Metilene. 15 Lako hee nokapala tahi dolamo kami pade kanailena noliumo kami i lewuto Khios. Kanailena mui naratamo kami i lewuto Samos. Naliu haeo, naratamo kami i Miletus. 16 Tungkaina Paulus moma nehani i Efesus bona nemo maronto mara logana i propinsi Asia. Apa mahomi'i rau i Yerusalem modapa eo bohe Pentakosta.
Peboha Paulus hi penatua-penatua jumaa Efesus
17 Lako Miletus, Paulus nantudu tauna mangulika humawee penatua i Efesus bona marata purara olu i Miletus. 18 Naratarapa penatua ee, iulikanaramo, “Ompi-ompi, laincanimi bewa katuwuku laipodohemi hinungkai karataku i propinsi Asia. 19 Aku nampobagoka Pue moma hante kahomboku. Rara pobagoaku ee nadea ue mataku natudo pade nadea kahehaa lairataku apa to Yahudi noliwo mampatehi'a. 20 Laincanimi moto ane moma'a nakoroa nobabei hangu hangaa to mamala mampakaroho peparahayami. Laipatuduku komi i kadeaa tauna pade butu potomuata i hou-houmi moto. 21 Laipalingaiku oara to Yahudi bo to moma Yahudi bona mancorora lako dohara, manculira hi Alatala pade meparahayara hi Yesus Pueta. 22 Welau ei, mantuku dota Inoha to Nagaha, kana rau'a i Yerusalem. Moma ncaniku napa mei to madupa hi aku i ria. 23 To incaniku, i butu-butu ngata pomakoaku, laikewoka-Na'amo Inoha to Nagaha ane kana ratarungku'a mei pade kana maheha kuepe. 24 Naupawee, moma tapariku tuwuku, ahalana mamala'a mampakahudu bago to laiparahayaka-Na'a Pue Yesus pade matigu moto'a duu kahuduana mangkarebai Kareba Belo nangkambelai kabohe towe Alatala.
25 Ompi-ompiku, narata'amo hi komi pade laiparatakumi bewa Alatala noparenta halaku Magau. Welau ei laincanikumi ane moma'amo mei maria mihilo. 26 Etu pade welau ei, mpuu-mpuu ku'ulika komi, ane maria komi mei to mamate pade moma mehua huruga, etu moma halaku. 27 Moma'a naria nampalaika bagoku nopandolaka komi nangkambelai humawee liwo Alatala. 28 Etumo, jagai wotomi, pade jagai humawee jumaa to laiwaika-Na komi Inoha to Nagaha mipodoo. Apa laiongkomo komi nawali to mampodoo jumaa. Kana mijagai belo jumaa ewa to poewu nojagai bimbana. Apa Yesus Pueta namate pade raa-Na natudo nampatolohi doha jumaa bona mawali todea Alatala. 29 Apa laincaniku, ane rau'adamo, maratara mei hi komi tauna to nadaa ingkura ewa serigala to naheke. Hira etu mei mampakahilaka jumaa to ipodoomi. 30 Bo lako hi komi moto mei, meumba tauna to mangkarebai kareba to moma nakono. Rababeira ewa ee, bona tauna to neparahayaramo hi Yesus malipo pade mantukura. 31 Etumo, maingahawo! Linga komi, tolu mpae'a, butu eona bo butu bengina, moma'a naria nentuu hante ue mata nopaguru komi pura.
32 Aji ompi-ompi, welau ei kujuju komi hi Pue bona Napodohe moto oa komi pade mipairara moto oa lolita nangkambelai kabohe towe Alatala. Lolita ee mai nabaraka mampakaroho komi, mampawaika komi rahi to laipahadia Alatala hi humawee tauna to laipelihi-Na nawali todea-Na. 33 Moma'a naria mingki mangala bulawa, halaka ba waru lako hi tau ntanina. 34 Ncanimi moto, ane nobago moto'a nampakagana humawee napa to iparaluuku pade to iparaluura doheku to nantuku'a. 35 Rarana hangu hangaa to laibabeiku, laipahiloikumo komi ane hante nobago ntomo, mamalata mantulungi tauna to moma ibukura nobago. Kana talinga napa to iuli Pue Yesus, ‘Morahitapa mewai lako rawaika.’ ”