Paulus i Efesus
19
1 Bulana Apolos i Korintusdipi, Paulus tempona nodaoki ngata-ngata to i buluna duuna narata i Efesus. I ria lairatana bahangkua dua tauna to neparahaya hi Yesus. 2 Nepekunemi Paulus hi hira, “Tempomi neparahaya hi Yesus, laitarimamimi Inoha to Nagaha?”Nehonora, “Poma. Bewami kitarima, bo laiepe kami moto poma naria.”
3 Lauparia, nepekune muimi Paulus, “Ane wee, nantuku patudu hema komi laidiu?”
Nehonora, “Nantuku patudu Yohanes to Pediu.”
4 Lauparia Paulus nangulikara, “Pediu Yohanes ee tandana ane tauna to laidiu ee nancoromi lako dohana. Naupawee Yohanes mui nangulika to Israel bona kana meparahayara hi Hia to marata puri, to laikahangai Yesus.”
5 Nangepe lauria, laipopewairami wotora laidiu rara hanga Pue Yesus. 6 Podamana Paulus tanuanara, nehompomi Inoha to Nagaha hi hira, pade nopamularamo nojarita nampake baha Inoha to Nagaha pade noparata peboha Alatala. 7 Maria hampulu rodua kadeara.
8 Tolu mula kahaena Paulus rau i hou pepuea to naria i hee pade nabia'i nopatudu bo nampomehonokara tauna i hou pepuea ee bona raparahayara bewa Alatala noparenta halaku Magau. 9 Naupawee, naria moto muira bahangkua dua to nakoo rarara pade momara neparahaya. I tingoo todea to nahiromu ee laipoporera patudu nangkambelai Yesus. Etu pade palahinaramo pade raumi laipodohera tau-tauna to neparahaya hi Yesus ee, i pohikolaa Tiranus. Butu eona'i nonehula pekiri hante tau-tauna to i pohikolaa ee. 10 Rompae kahaena Paulus nobabei ewa ee hampena humawee tauna to natida i propinsi Asia nangepe lolita Pue, belo to Yahudi, belo mui to moma Yahudi. 11 Alatala nampawaika Paulus baraka nobabei hangu hangaa to nepakahera to moma naria hibalina. 12 Pahapu ba kae to naria laipake Paulus aga rakenikara to pohaki, dungku naurimi hakira pade inoha to nadaa nehuwu lako rara wotora.
Ana-ana Skewa
13 Tempo ee naria bahangkua dua to Yahudi to naria pangincanira nodadao nampopalai anudaa to nampehuai tauna. Laipehobara nampake hanga Pue Yesus. Iulikara anudaa ee, “Hante baraka Yesus to laikarebai Paulus kupopalaiko!”
14 Pitu dua ana imam to i matana to laikahangai Skewa mui nobabei lauria. 15 Naupawee, anudaa ee nampahonoira, “Yesus laincaniku, Paulus mui laincaniku. Komi ei, hema komi?” 16 Tauna to laipehua anudaa ee nampakawantuhira pade nampauko purara hampena netibora lako hou tauna ee hante naweho pade momaramo nowaru.
17 Humawee to no'oha i Efesus, belo to Yahudi, belo mui to moma Yahudi nangepe kajadia ee. Etu pade naeka purara pade natetambaiki pampabilara hanga Pue Yesus. 18 Nadea tauna to neparahayaramo hi Yesus narata nangaku i tingoo todea, ane naria muirahawo nobabei hangu hangaa to ewa ee. 19 Lako hi hira ee mai nadea to pedoti nopalimpuru bukura pade laipapuhira i tingoo todea. Ane rareke oli humawee buku ee, maria alima mpulu ncobu doi halaka.a 20 Lako kajadia-kajadia ewa ee, nantambai potolele lolita Pue pade nantambai mui baraka lolita ee.
Demetrius nampopogeho ngata Efesus
21 Napu kajadia ee, noliwomi Paulus rau i Yerusalem mantara Makedonia pade Akhaya. Iulina, “Mapu'a rau Yerusalem, kana rau mui'a i Roma.” 22 Lauparia laituduna rodua dohe hampobagoana to laikahangai Timotius pade Erastus mampelodoi'i rau Makedonia. Naupawee, hia nabolidipi bahangkuapi kahaena i propinsi Asia.
23 Tempo eemi neumba pogehoa habana patudu nangkambelai Yesus. 24 Apa naria hadua tauna to laikahangai Demetrius, to potampa halaka. Hia biahana nobabei lako halaka hou-houa ewa tari hou pepuea hi dewi Artemis. Lako bagona ee mai, nadea mpuu rahira tuka to nobago hi hia. 25 Laipahiromuna humawee to pobagona hante to potampa halaka ntanina pade iulikanara, “Ompi-ompi, laincanita hingkani ane nadea mpuu rahita lako bagota ei. 26 Hilomi motomi pade iepemi motomi napa to laibabei Paulus. Nadeamo tauna lailanaina pade laipahalatarana hante patuduna to nanguli ane rewa-rewa to laibabei manuhia moma'i alatala mpuu. Moma wuwu i Efesus ei, ke nono i humawee ngata i propinsi Asiami nelanai bo nepahalatara. 27 Ane ewa ee mai, rapopore doomi to laipobagota. Moma mui wuwu ee, hou pepuea hi dewi Artemis mui momami rabila pade kabohe hanga dewi Artemis ratodu-todu. Bo dewi Artemis ee to laipepue humawee to Asia bo humangkulili dunia.”
28 Nangepe lauria, neumba hodora pade nongareramo, “Unemi dewi Artemis, dewi to laipueta to Efesus!” 29 Nogeho humangata. Humawee todea to nogeho ee mai nampabinincai Gayus pade Aristarkhus to Makedonia nehua i rara hou peronoa. Gayus pade Aristarkhus ee mai to nampodohe Paulus rara pomakoana. 30 Mingki'i Paulus rau mampotomukara todea to nogeho ee mai, naupawee tauna to neparahaya hi Yesus i ria nantagi'i. 31 Bahangkua dua to nabohe pangkana lako propinsi Asia moto nantudu tauna nangulika Paulus bona nemo'i mehua i rara hou peronoa ee.
32 Hamali ee tauna to nahiromu i hou peronoa momara nentuu nongare. Naria to nanguli iwei, naria to nanguli iwee. Apa nadeara to nahiromu ee moma incanira napa patuju kahiromuara ee. 33 To Yahudi nampatumo hadua to laikahangai Aleksander i tingoo todea. Pade nariara to nogeho ee nangulika'i napa to nadupa. Lauparia Aleksander no'ongko palena bona rawaika'i loga mojarita. 34 Hangka laincanira ane to Yahudi'i, nongareki lauramo maria rojaa kahaena, iulira, “Unemi Artemis, dewi to laipueta to Efesus!”
35 Naupawee to potulihi ngata ee namala nampakalinora tauna ee. Iulina, “Todea Efesus, humawee tauna nangincani ane Efesus eimi to nampiara hou pepuea hi dewi Artemis pade patungna to nanawu lako langi. 36 Moma hema haduaa mamala mampabili lauria. Etumo, kalinomo olu. Nemo hampa-hampana mobabei hangu hangaa. 37 Tauna eira laikenimi rumai, bo momara namparampaki ihi hou-hou pepueata ba nampopore hanga pueta dewi Artemis. 38 Aji, ane Demetrius pade hira to nobago hi hia mingki mampangaduka tauna, palelemi rakenira uruhiara etu rau i pobotuhia. Naria pobotuhia. To poparenta mui naria motora. 39 Bo ane naria ntanina patujumi, etu kana rapolibui hante todea. 40 Apa napa to nadupa welau ei, mampakaheha kita moto. Namalata rauli ne'ewa hi to poparenta apa moma naria tanceta nangkambelai napa pade nadupa pogehoa ei.” Napupi nanguli lauria, laipakagaronaramo todea ee.