Yohanes i

Kareba Belo to laitulihi Yohanes

Popailodoa

Buku ei laitulihi Yohanes hadua lako ana guru Pue Yesus. Yohanes ei mai hadua to nampahilo mata humawee to nadupa to laitulihi rara buku ei.

I rara buku ei Yesus laiuli Lolita Alatala. Hiami to laihuro Alatala narata i dunia, nawali manuhia pade natida dohe manuhia. Patuju Yohanes notulihi buku ei, bona humawee tauna to mobaha buku ei mamparahaya ane Yesus ee mai Ana Alatala. Hiami Magau to Pepakahalama to laitipa Alatala, pade hema to meparahaya hi Hia mamparata katuwua to moma maria kahuduana. (20:21).

Rara pasal 2 duuna pasal 12, Yohanes nampotutura pitu ngaa tanda to nepakahera to laibabei Pue Yesus. Tanda-tanda ee mai nampakanoto ane Yesus ee mpuu-mpuu Magau to Pepakahalama to nabaraka.

Rara pasal 13 duuna pasal 17 Pue Yesus nangulikara ana guru-Na ane Hia mei kana rahoko. Laipatudu-Nara pade laipakaroho-Na rarara.

Rara pasal 18 duuna pasal 21 Pue Yesus laihoko, laibotuhi, namate pade natuwu nculi i eo katoluna.

Ihi Buku Ei

1. Pamulana: Lolita Alatala to nawali manuhia (1:1-18)

2. Yohanes to Pediu pade ana guru Pue Yesus to pamulana (1:19-51)

3. Bago to laipobago Yesus i lentongo todea (2:1–12:50)

4. Patudu Pue Yesus hi ana-ana guru-Na (13:1–17:26)

5. Yesus namate laisalib pade natuwu nculi i eo katoluna (18:1–21:25)