Ponikaa i ngata Kana
2
1 Roeo naliu lako kajadia lauria, naria ponikaa i ngata Kana to i Galilea. Tempo ee mai tina Yesus naria i ria. 2 Yesus pade ana-ana guru-Na mui laioka rau ponikaa ee mai. 3 Hangka napupi ue anggur i pohuhaa ee mai, tina Yesus nanguli hi Yesus, “Momami naria ue anggur, napu purami.”4 Iuli Yesus hi tina-Na, “Napa patujumu nangulika-'A lauria? Poma tempona Kupahiloi hema-'A kakonona.”
5 Naupawee tina Yesus nangulikara to nobago i pohuhaa ee mai, “Babeimi napa to Natuduka komi.”
6 I hee naria ono pobolia ue to laibabei lako watu to rapake mokabohi pale mantuku adara to Yahudi. Kadea ihi butu pobolia ue ee mai maria hatu lite. 7 Yesus nangulikara to pobago i pohuhaa ee mai, “Kahini purami pobolia ue etu maponu hante ue.” Laikahinira mpuumi duuna naponu. 8 Napu ee iulika-Na muira Yesus, “Talau hodi ue etu pade kenimi hi to pangkeni huha.” Laitalaura mpuumi hodi ue ee pade laikenira hi to pangkeni huha.
9 To pangkeni huha nampetami ue to nawali ue anggurmi ee mai. Moma incanina lako rima ue anggur ee laiala, hira to pobago i pohuhaa ee aga to nangincani lako rima ue anggur ee mai. Napu'i nampetami ue to nawali ue anggurmi ee, to pangkeni huha ee mai nangkio pongante balailo, 10 pade nangulika'i, “Biahana tauna mopainu to ratana hante ue anggur to nabelo olu. Maoharapa manginu pade nawaikarada ue anggur to moma nabelo gaga. Naupawee iko noboli ue anggur to nabelo duu ei.”
11 Laumiria pamulana ntoto Yesus nobabei tanda to nepakahera. Laibabei-Na ee i ngata Kana to i Galilea. Hante to laibabei-Na lauria, Yesus nampahiloi kabohe baraka-Na, pade ana-ana guru-Na neparahaya hi Hia.
12 Napu ee raumi Yesus i Kapernaum hingkani-ngkani hante tina-Na, ompi-ompi-Na pade ana-ana guru-Na. Bahangkua eora aga no'oha i Kapernaum.
Yesus nampakagaha Hou Alatala
13 Parapi eo bohe Paskah to Yahudia, neongkomi Yesus rau i Yerusalem. 14 I karawaa Hou Alatala lairata-Na to pobalu-balu japi, bimba, tonci bangkebodo, pade hira to pohula doi noncuna i hee. 15 Yesus nobabei poweba lako kaloro pade laiwura-Na purara lako karawaa Hou Alatala hante bimba pade japira. Doira to pohula doi laibure-Na i tana pade mejara laibaliangko-Na. 16 Iulika-Nara to pobalu tonci bangkebodo ee, “Ala pura humawee ei lako hei, nemo mibabei hou Tuama-Ku mawali pasar.” 17 Lauparia lailingarami ana guru-Na, ane naria amimi laitulihi rara Buku to Nagaha iwei, “Toweku hi hou-Mu ewa apu to mampakapapu raraku.”
18 To pangkeni to Yahudi nangulika Yesus, “Hema to nantudu-Ko? Pahiloi kami to nepakahera halaku tanda hampena namala-Ko nobabei to ewa ee rau.”
19 Nehono Yesus hi hira, “Pakaropomi Hou Alatala ei mai, pade rarana tolu eo Kubangu nculi'i.”
20 Nehonora to pangkeni to Yahudi, “Opo mpulu ono mpae kahaena Hou Alatala ei laibangu, bewa pade tolu eo moto'i Mubangu?” 21 Bo Hou Alatala to laipatuju Yesus ee mai woto-Na moto. 22 Natuwu nculipi Yesus lako kamatea-Na, lailingarami ana guru-Na ane humaweena iuli-Na amimi, pade laiparahayara to laitulihi rara Buku to Nagaha pade napa to iuli Yesus.
23 Tempo Yesus i Yerusalem bula eo bohe Paskah ee mai, nadea tauna neparahaya hi Hia, apa laihilorami tanda-tanda to nepakahera to laibabei-Na. 24 Naupawee momara laiparahaya-Na Yesus, apa laincani-Na ihi rara humawee tauna. 25 Moma paraluu maria tauna mangkewoka-'I nangkambelai manuhia, apa laincani-Na bewa rara humawee manuhia.