Kareba Belo to Laitulihi Lukas
Popailodoa
Lukas ee mai hadua dokutoro to nampodohe Paulus rara pomakoana nangkeni Kareba Belo. (Hilo Kol. 4:14; 2Tim. 4:11; Flm. 24.) Laipeputuna humawee tutura nangkambelai Yesus lako hi tau-tauna to nangincani (Luk. 1:1-2). Nahudupi laipeputuna, laitulihinami Kareba Belo ei hi hadua balailo to laikahangai Teofilus. Teofilus ee mai nariami laipatudu nangkambelai Yesus. Hanga Teofilus ee mai batuana: ‘To nampotowe Alatala’ ba ‘To laipotowe Alatala’. Patuju Lukas notulihi buku ei, moma bona nabaha Teofilus aga, naupawee bona madea tauna to mobaha bo mangepe kareba to laitulihi rara buku ei, belo tauna to neparahayaramo, belo mui tauna to mingki mangincani patudu nangkambelai Yesus to laipotolele tempo ee.
Rara buku ei mai, Lukas nampotutura patuju Yesus narata i dunia ei. Patuju Yesus ee mai mampali tauna to nahalatara pade mampakahalamara (Luk. 19:10), moma wuwu hira to Yahudi, naupawee humawee tauna (Luk. 2:10; 2:30-32; 3:6; 24:47). Rara buku Kareba Belo ei, laitulihi nangkambelai towe Yesus hi tau-tauna to natuwu nakahiahi (Luk. 6:20; 7:22; 14:12-13; 21:1-4), nangkambelai towe-Na hi tauna to nadoha (Luk. 5:30; 7:37-50; 15:1-2), nangkambelai towe-Na hi hira bangkele (Luk. 7:11-17; 8:2-3; 10:38-42; 13:10-13; 21:1-4; 23:27-31), pade towe-Na hi ngana-ngana (Luk. 8:41-42; 54-55; 9:38-42; 9:46-48; 18:15-17).
Ihi buku ei
1. Patuju buku ei (1:1-4)
2. Pangotea Yohanes to Pediu pade pangotea Yesus (1:5–2:52)
3. Yesus laidiu pade laipehori Magau Heta (3:1–4:13)
4. Pobago Yesus i Galilea (4:14–9:50)
5. Pobago Yesus rara pomakoa-Na rau i Yerusalem (9:51–19:27)
6. Mingku kahuduana Yesus i ngata bohe Yerusalem (19:28–23:56)
7. Yesus natuwu nculi pade nampoperawa woto-Na hi hira to nantuku-'I (24:1-53)