Katuwu nculi Yesus
16
1 Naliupi eo Pentuua to Yahudi, Maria Magdalena, Salome pade Maria tina Yakobus nangoli lana wongi rau raelaikara wataloka Yesus. 2 Hampepulo, eo pamulana mingku ee mai, neberepi eo, rauramo i dayo Yesus. 3 Nonepekuneramo hore hira, “Hema mei to moduliakata watu bohe ee ria lako womo dayo?” 4 Naupawee namohurapa i dayo Yesus laihilora watu bohe ee mai nateduliami lako womo dayo. 5 Lauparia nehuaramo i rara dayo. Nakonce mpuura apa laihilora hadua kabilahaa nowaru to nabula noncuna i mali kanara. 6 Naupawee kabilaha ee mai nangulikara, “Nemo maeka! Laincaniku ane komi nampali Yesus to Nazaret, to laisalib ee. Moma-'I naria i hei bo, apa laipakatuwu nculi-'Imi. Hilo, eimi poduleara wataloka-Na. 7 Aji, dungku koimo komi mangulikara ana guru-Na pade Petrus ane laipoilodoi-Namo komi rau i Galilea. I riadimi mei pade mihilo-'I, ewa to iulika-Na amimo komi.”8 Napu ee, nehuwuramo lako rara dayo ee mai pade nokumeno nalai habana naeka pade naingu mpuu rarara. Moma napa-napa iulira hi tauna, keni ekara.
[Pakabokora moto nangkewo hi Petrus hante dohe-dohena humawee to laibohakara. Napu ee Yesus moto nantudu ana-ana guru-Na bona mangkarebai hi humawee tauna i dunia, lako mataeo duu kaholoa nangkambelai kareba belo lako Alatala. Kareba belo ee mai nangkewokata dala bona tarata katuwua duu kahae-haena. Kareba ee mai nagaha pade moma nobali duu kahae-haena.]
Yesus bahangkua ngkani nampoperawa woto-Na pade nampahuro ana-ana guru-Na
[ 9 Yesus natuwu nculi lako kamatea-Na hampepulo eo mingku. Pamulana ntoto-'I nampoperawa woto-Na hi Maria Magdalena. Maria Magdalena ee naria'i wengi laipehuai papitu inoha to nadaa, pade Yesus nampopalaira lako wotona. 10 Lauparia raumi Maria Magdalena nangkewokara to pantuku Yesus napa to nadupa. Tempo ee mai to pantuku Yesus ee bulara nakeo keni kadua rarara. 11 Naupawee pangepera to pantuku Yesus ee kareba ane natuwu nculimi Yesus pade laihilona motomi Maria Magdalena, kareba ee mai moma'i laiparahayara.
12 Napu ee Yesus nampoperawa woto-Na hante tari-Na to ntani hi rodua ana guru-Na, to bulara nomako rau hawaliku ngata. 13 Lauparia, ana guru-Na to rodua ee mai, nanculiki rau rara ngata pade nangkewo hi humawee to pantuku Yesus napa to laihilora, naupawee moma oa laiparahayara kareba ee mai.
14 Kahuduana Yesus nampoperawa woto-Na hi hampulu hadua ana guru-Na, bulara nangkoni. Laipakahodo-Nara habana moma laiparahayara kareba to iepera pade nakoo gaga rarara hampena moma iparahayara to iuli dohe-dohera to nampahilo mata ane natuwu nculi-'Imi lako kamatea. 15 Lauparia Yesus nangulikara ana guru-Na, “Koimo komi i humangkulili dunia, mangkarebai Kareba Belo hi humawee to natuwu. 16 Hema to meparahaya pade radiu, kana rapakahalama. Naupawee hema to moma meparahaya, kana rahuku. 17 Tau-tauna to neparahaya eera mai Nawaika Alatala baraka mobabei tanda-tanda to nepakahera. Hira mei mampopalai anudaa-anudaa mampake hanga-Ku, pade mojaritara hante baha-baha to poma'i naria laipeguruira. 18 Hira mei mangkakamu ule pade naupa rainura rahu to mepakamate, momara mahilaka, pade ane rabolira palera hi tau-tauna to nohaki, tauna eera mei mauri.”]
Yesus nateongko rau huruga
[ 19 Nahudupi Pue Yesus nojarita iwee hi ana-ana guru-Na, nateongko-'Imi rau i huruga pade noncuna i mali pangkana Alatala. 20 Napu ee rauramo ana guru-Na nangkarebai Kareba Belo i rima-rima. Pue nobago dohera pade nampawaikara pampakulea mobabei tanda to nepakahera to nampakaroho lolita Alatala to laikarebaira.]