Kareba Belo to laitulihi Matius
Popailodoa
Moma laincani hema kakonona to notulihi buku ei, apa moma naria laiuli rara buku ei hema to potulihi. Naria bahangkua dua to nataualu Buku to Nagaha tempo ei nanguli moma Matius to notulihi buku ei. Naupawee mantuku to laiulira to Karahitee lako owi, buku ei laitulihi Matius, hadua lako hampulu rodua ana guru Yesus. Matius ei hadua to peduhu paja to laikahangai Lewi rara buku Markus pade buku Lukas (Mrk. 2:14-17; Luk. 5:27-32). Ihi buku to laitulihi Matius ei mai Kareba Belo to nampojarita nangkambelai katuwu Yesus i dunia, kamate-Na pade katuwu nculi-Na. Buku ei mui nopandola ane Yesus eemi Magau to Pepakahalama to laitipa Alatala lako owi.
Patuju Matius notulihi buku ei bona hira to Yahudi to neparahaya hi Yesus pamulana mangincani mpuu ane Yesus eemi Magau to Pepakahalama to laitipa Alatala lako owi, habana hira to Yahudimi to lako owi laipelihi Pue Alatala nawali todea-Na pade to namparahaya lolita-Na to laitulihi rara Buku to Nagaha to laikahangai Buku Potipa to Nahae. Etu pade rara bukuna ei, nadea ngkani Matius nangala baha rara Buku Potipa to Nahae bona rancanira to Yahudi ane Yesus eemi to nopaganai tipa Pue Alatala to laiparatara nabi lako owi nangkambelai Magau to Pepakahalama to laitipa Alatala.
Iulina mui Matius rara buku ei, hema-hema to mamparahaya Yesus Kristus halaku to Pepakahalama, ra'ampuni doha-dohara pade raratara katuwua to moma maria kahuduana.
Ihi buku ei
1. Pangotea Yesus pade pamula bago-Na (1:1–4:25)
2. Patudu Yesus i lolo bulu (5:1–7:29)
3. Tanda-tanda to nepakahera to laibabei Yesus nampakanoto ane nabaraka mpuu-'I (8:1–9:34)
4. Patudu Yesus hi ana-ana guru-Na kapomara laihuro-Na rau moparata Kareba Belo (9:35–11:1)
5. To nadupa i Galilea to nampakanoto ane Yesus eemi Magau to Pepakahalama (11:2–12:50)
6. Yesus nopatudu nangkambelai poparentaa Alatala nampake porapa (13:1-52)
7. Bago Yesus i ngata-ngata to namohu hante Galilea pade i Galilea (13:53–17:27)
8. Patudu Yesus hi ana-ana guru-Na nangkambelai ingku to mahipato rapoingkukara to pantuku-Na (18:1-35)
9. Pomako Yesus rau i Yerusalem, pehua-Na Yerusalem pade pampahonoi-Na pepekuneara to pangkeni to Yahudi (19:1–23:39)
10. Patudu Yesus nangkambelai napa mei to madupa ane mamohupi tempo kahudua dunia (24:1–25:46)
11. Kamate Yesus pade katuwu nculi-Na (26:1–28:20)