Yunus i

Buku nangkambelai Yunus

Popailodoa

Buku Yunus ei nampotutura nangkambelai Nabi Yunus ana Amitai, to noparata peboha Alatala hi to Israel tempo Yerobeam, ana Yoas, nawali magau to Israel i Samaria (2Raj. 14:25). Buku ei nontani hante buku nabi ntanina rara Buku to Nagaha, apa ihina moma peboha lako Alatala ba patudu nabi to raparata hi todea. Naupawee buku ei nampotutura nangkambelai hadua nabi to nampalaika pekio Alatala.

Nabi Yunus laitudu Alatala rau ngata bohe Niniwe i Asyur bona naulikara to Niniwee mancororamo lako doha-dohara. To Niniwe ee bali to Israel, etu pade moma'i nadota Yunus rau moparata lolita Alatala hi hira. Laitutura mui rara buku ei bewa Alatala nampahiloi baraka-Na noparenta pade ahi rara-Na hi humawee to laipajadi-Na. Hipa Alatala ee mai moma'i laipokono Yunus.

Tutura nangkambelai Yunus ei patudu hi to pobaha ane Alatala moma nampelihi tauna pade patudu bona nemo mohipa ewa Yunus to moma nagoe nampahilo kancoro tauna to nadoha. Apa pokono-Napi Alatala noampuni pade nampakahalama manuhia. Moma'i pokono-Na nampahuku pade nampakaropo ngata manuhia, naupa ngata ee mai bali todea-Na to Israel.

Rara buku Yunus pade buku-buku Potipa to Nahae ntanina, hanga Alatala to laiuli-Na hi Musa laitulihi, ‘YHWH,’ laipatoli rara baha Moma nawali PUE. Hanga-Na ee mai laitulihi hante huruf to nabohe pura, nontani lako atu-Na to laitulihi, ‘Adonai’ to laipatoli rara baha Moma nawali Pue.

Ihi buku ei

1. Yunus nampalaika pekio PUE (1:1-17)

2. Hambaya Yunus (2:1-10)

3. Kancoro to Niniwe (3:1-10)

4. PUE nampopahiloi hi Yunus bewa kabohe towe-Na hi tau ntanina (4:1-11)