Yunus 2

Hambaya Yunus

1 Lako rara ntai bau to nampaome'i ee mai, nohambayami Yunus hi PUE, Alatalana, 2 iulina:

“PUE,

rara kahehaaku nohambaya'a,

pade laihonoi-Mu'amo.

Laiepe-Mu'amo nekakai

lako lentongo duniara to mate.

3 Laitadi-Mu'a i rara kandalaa tahi,

hudu i kandalaana ntoto.

Ue tahi nampatikuhi'a,

pade humawee balumba-Mu nampabungu'a.

4 Pekiriku, ‘Laipopalai-Mu'amo lako tingoo-Mu,

momami kuhilo hou-Mu to nagaha.’

5 Nono mamate'amo laipatikuhi ue tahi to nampabungu'a,

pade tamomo tahi nampawewe wooku,

6 i puu bulu rara tahi. Natala'a duu i dunia to unena ntoto;

natebihoki womona i talikuaku duu kahae-haena.

Naupawee, Iko, PUE Alatalaku,

laiongko-Mu'a lako rara dayo.

7 Rara katidoa inohaku

lailingakumo-Ko, PUE,

pade naratami hambayaku hi Iko,

i rara hou-Mu to nagaha.

8 Hira to natigu nepue hi pue ntanina to moma naria bununa

nampalahi PUE to nampotowera.

9 Naupawee hante ulia posukuru, ku'une hanga PUE,

pade kupopewai kurbanku hi PUE.

Humawee to laitipaku hi PUE kana kupakadupa.

Kahalamaa narata lako hi PUE!”

10 Nahudu Yunus nohambaya, nololitami PUE hi bau ee. Etu pade bau ee mai nampalua nculi Yunus i lorena.